ກະຊວງ ຖວທ ໄດ້ຈັດກອງປະຊຸມເຜີຍແຜ່ກ່ຽວກັບ ສະກັດກັ້ນຕ້ານການຄ້າມະນຸດ 4 ແຂວງພາກໃຕ້

ໃນວັນທີ 2 ກໍລະກົດ 2019 ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ໄດ້ຈັດກອງປະຊຸມສະກັດກັ້ນຕ້ານການຄ້າ ມະນຸດ ຂຶ້ນທີ່ຫ້ອງປະຊຸມສະພາປະຊາຊົນແຂວງອັດຕະປື.

ພາຍໃຕ້ການເປັນປະທານຂອງທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະ ທ່ອງ ທ່ຽວ ທັງເປັນຄະນະກຳມະການຕ້ານການຄ້າມະນຸດລະດັບຊາດ ມີພະນັກງານຈາກຂົງເຂດ ຖວທ 4 ແຂວງພາກໃຕ້ຄື: ແຂວງຈຳ ປາສັກ, ສາລະວັນ, ເຊກອງ ແລະ ອັດຕະປື.
ໃນທີ່ກອງປະຊຸມ ທ່ານ ສະຫວັນຄອນ ຣາຊມຸນຕີ ໄດ້ກ່າວໄຂກອງປະຊຸມວ່າ: ບັນຫາການຄ້າມະນຸດແມ່ນເປັນ ອາດສະຍາກຳຂ້າມ ຊາດຮ້າຍແຮງ ການຄ້າມະນຸດແມ່ນການລະເມີດ ສິດທິພື້ນຖານຂອງຄວາມເປັນມະນຸດຂັ້ນຮ້າຍແຮງ ສົ່ງຜົນກະທົບໂດຍກົງທາງ ດ້ານຮ່າງກາຍ ແລະ ຈິດໃຈຂອງຜູ້ຖືກເຄາະຮ້າຍ ຕໍ່ສັງຄົມ, ຄອບຄົວ ແລະ ການພັດທະນາປະເທດຊາດ ການຄ້ານມະນຸດມີຜົນກຳ ໄລມະຫາສານເປັນອັນດັບສອງຂອງໂລກ ຫຼື ປະມານ 150 ຕື້ໂດລ້າ ຕໍ່ປີ ຮອງຈາກການຄ້າຂາຍຢາເສບຕິດ ຕາມການຄາດຄະເນ ຂອງບັນດາອົງການສາກົນທີ່ເຮັດວຽກຕ້ານອາດສະຍາກຳດັ່ງກ່າວ. ໃນປັດຈຸບັນ ມີຜູ້ຖືກເຄາະຮ້າຍຈາກການຄ້າມະນຸດໃນທົ່ວໂລກຫຼາຍກວ່າ 40 ລ້ານຄົນ, ເດັກນ້ອຍ ແລະ ແມ່ຍິງ ກວມເອົາ 71% ເຂດພາກພື້ນ ອາຊີ ແລະ ປາຊີຟີ ເປັນເຂດທີ່ມີຜູ້ຖືກເຄາະຮ້າຍຫຼາຍທີ່ສຸດໃນໂລກໂດຍກວມເອົາ 65% ຂອງຈຳນວນຜູ້ຖືກເຄາະຮ້າຍໃນທົ່ວໂລກ.
ບັນຫາການຄ້າມະນຸດໄດ້ເກີດຂຶ້ນຢ່າງກວ້າງຂວາງ ແລະ ມີຫຼາຍຮູບແບບເປັນຕົ້ນແມ່ນ: ຮູບແບບການເຄື່ອນຍ້າຍແຮງງານ, ການອົບພະຍົບຂອງປະຊາກອນໂລກ ແລະ ອື່ນໆ. ສະເພາະ ສປປ ລາວ ພົ້ນເດັ່ນ: ແມ່ນຮູບແບບຕວົະຍົວະຫຼອກຫຼວງໄປທ່ອງ ທ່ຽວ, ໄປຂາຍເຄື່ອງ, ໄປເສີບອາຫານ ການຂົນຂວາຍເອົາແຮງງານລາວ ໄປອອກແຮງງານແບບຜິດກົດໝາຍ ແລະ ຂົນຂວາຍ ເອົາແມ່ຍິງລາວໄປແຕ່ງດອງກັບຄົນຕ່າງປະເທດ ດ້ວຍຮູບແບບໝັ້ນໝາຍແອບແຝງ ແລະ ອື່ນໆ.
ບັນດາຜູ້ເຂົ້າຮ່ວມກອງປະຊຸມໄດ້ຮັບຟັງກົດໝາຍວ່າດ້ວຍການຕ້ານການຄ້າມະນຸດ ເຊິ່ງປະກອບມີ 9 ພາກ, 91 ມາດຕາ ຮັບຟັງ ລະບຽບການແຕ່ງດອງ ແລະ ການຊ່ວຍເຫຼືອແມ່ຍິງລາວຜູ້ຖືກເຄາະຮ້າຍຢູ່ຕ່າງປະເທດ ຈາກຂະບວນການຄ້າມະນຸດ, ສະພາບ ການເຄື່ອນຍ້າຍແຮງງານຢູ່ ສປປ ລາວ ທັງພາຍໃນ ແລະ ຕ່າງປະເທດ, ຍັງມີສະພາບການຄ້າມະນຸດຢູ່ແຂວງອັດຕະປື ພ້ອມດຽວ ກັນ ກອງປະຊຸມ ບັນດາຜູ້ເຂົ້າຮ່ວມຍັງໄດ້ປຶກສາຫາລືຄົ້ນຄວ້າປະກອບຄຳເຫັນ ເພື່ອເຮັດວຽກງານການຕ້ານການຄ້າມະນຸດ ໃຫ້ໄດ້ ຮັບການຈັດຕັ້ງປະຕິບັດຢ່າງມີປະສິດທິຜົນ.
(ແຫຼ່ງຂໍ້ມູນຈາກ: ກົມສື່ມວນຊົນ)