ຍົກລະດັບທັກສະໃນການຜະລິດລາຍການວິທະຍຸ ແລະ ໂທລະພາບອອນລາຍໃນວຽກງານສື່ມວນຊົນ.

ໃນຕອນເຊົ້າຂອງວັນທີ 2 ກໍລະກົດ 2019, ທີ່ສະຖານນີວິທະຍຸກະຈາຍສຽງແຫ່ງຊາດ ໄດ້ຈັດພິທີເປີດຊຸດຝຶກອົບຮົມວ່າດ້ວຍ "ທັກສະການຜະລິດລາຍການວິທະຍຸ ແລະ ໂທລະພາບອອນລາຍ" ເຊິ່ງຈັດຂຶ້ນໂດຍ ສະມາຄົມນັກຂ່າວແຫ່ງປະເທດລາວ ໂດຍໄດ້ຮັບອະນຸມັດຈາກກະຊາວຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ການຮ່ວມມືກັບສະມາຄົມນັກຂ່າວວິທະຍຸ ແລະ ໂທລະພາບ ແຂວງເພັດສະບູນ ປະເທດໄທ.

ພາຍໃຕ້ການເປັນປະທານກ່າວເປີດໂດຍ ທ່ານ ສີພາ ນົງລາດ ຮອງປະທານສະມາຄົມນັກຂ່າວແຫ່ງປະເທດລາວ ແລະ ຄະນະຮັບຜິດຊອບຈັດງານຈາກສະຖານນີວິທະຍຸກະຈາຍສຽງແຫ່ງຊາດ, ໜັງສືພິມພາສາຕ່າງປະເທດ ເຊິ່ງມີນັກວິທະຍາກອນຈາກປະເທດໄທ ນຳໂດຍທ່ານ ອົງອາດ ລາດຈັນ ແອດມິນຂອງສື່ອອນລາຍສະກາຍນິວສ໌ ແຂວງເພັດສະບູນ ປະເທດໄທ. ແລະ ນັກສຳມະນາກອນຈາກຫລາຍພາກສ່ວນ ທັງສູນກາງ ແລະ ທ້ອງຖິ່ນ.
ຈຸດປະສົງໃນການຈັດຊຸດຝຶກອົບຮົມໃນຄັ້ງນີ້ແມ່ນຈັດຂຶ້ນພາຍໃຕ້ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານວິຊາການເພື່ອພັດທະນາທັກສະຄວາມຮູ້ກ່ຽວກັບການຜະລິດລາຍການວິທະຍຸ ແລະ ໂທລະພາບ ໂດຍນຳໃຊ້ສື່ແບບໃຫມ່ ບັນການັກຂ່າວ, ນັກສຳມະນາກອນຂອງລາວເຮົາຈະໄດ້ຮຽນຮູ້ກ່ຽວກັບເຕັກນິກອຸປະກອນ, ເຄື່ອງມືການສື່ສານແບບໃຫມ່ ໂດຍສະເພາໂທລະສັບມືຖືເພື່ອເກັບກຳ, ຜະລິດ ແລະ ລາຍງານຂ່າວ ດ້ວຍຄວາມວ່ອງໄວ ແລະ ທັນການກວ່າເກົ່າ ໃນຮູບແບບພາຍໃຕ້ສະຖານະການຕ່າງໆ ໂດຍສາມາດຮັບປະກັນຄຸນນະພາບ ແລະ ປະສິດທິພາບໄດ້ເປັນຢ່າງດີ.