ນາຍົກລັດຖະມົນຕີ ເນັ້ນໃຫ້ທຸກພາກສ່ວນປະກອບສ່ວນ ໃນການແກ້ໄຂຄວາມທຸກຍາກຂອງປະຊາຊົນ

ຂປລ. ທ່ານ ທອງລຸນ ສີສຸລິດ ນາຍົກລັດຖະມົນຕີ, ທັງເປັນ ປະທານ ຄະນະຊີ້ນໍາ ລະດັບຊາດ ກ່ຽວກັບ ວຽກງານ ແຂ່ງຂັນ-ຍ້ອງຍໍຮັກຊາດ ແລະ ພັດທະນາ ຮຽກຮ້ອງ ມາຍັງ ບັນດາ ຜູ້ປະກອບການ ທຸກພາກສ່ວນ ເສດຖະກິດ, ຜູ້ມີປະສົບການ, ມີກໍາລັງແຮງ, ມີທຶນຮອນ, ມີນ້ຳໃຈ ເສຍສະຫລະ, ລວມທັງ ປະຊາຊົນ ບັນດາເຜົ່າ ທຸກຊັ້ນຄົນ ປະກອບສ່ວນ ເຂົ້າຮ່ວມ ການຈັດຕັ້ງ ປະຕິບັດ ແນວທາງ ນະໂຍບາຍ ຂອງພັກ ແລະ ແຜນພັດທະນາ ຊົນນະບົດ ເພື່ອແກ້ໄຂ ຄວາມທຸກຍາກ ຂອງປະຊາຊົນ.

ທ່ານ ນາຍົກລັດຖະມົນຕີ ກ່າວໃນກອງປະຊຸມ ຊຸກຍູ້ຂະບວນການ ແຂ່ງຂັນຮັກຊາດ ແລະ ພັດທະນາ ຕິດພັນກັບການ ພັດທະນາ ຊົນນະບົດ ເພື່ອແກ້ໄຂ ຄວາມທຸກຍາກ ຂອງປະຊາຊົນ ໃນວັນທີ 28 ມິ ຖຸນາ 2019 ທີ່ນະຄອນຫລວງ ວຽງຈັນ, ໂດຍມີ ຄະນະຊີ້ນໍາ ລະດັບຊາດ ກ່ຽວກັບ ການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ, ພ້ອມດ້ວຍ ບັນດາສະມາຊິກ ລັດຖະບານ, ລັດຖະມົນຕີ, ເຈົ້າຄອງນະຄອນ ຫລວງວຽງຈັນ, ເຈົ້າແຂວງ, ຜູ້ຕາງໜ້າ ຫົວໜ່ວຍ ທຸລະກິດ, ຜູ້ປະກອບການ ແລະ ພາກສ່ວນອື່ນໆ ທີ່ກ່ຽວຂ້ອງ 300 ກວ່າທ່ານ ເຂົ້າຮ່ວມ. ການພັດທະນາ ຊົນນະບົດ ຫລື ການຫັນເສດຖະກິດ ທໍາມະຊາດ ໄປສູ່ເສດຖະກິດສິນຄ້າ ແມ່ນບາດກ້າວ ບຸກທະລຸ ໃນການແກ້ໄຂ ຄວາມທຸກຍາກ ຂອງປະຊາຊົນ ດ້ວຍການຂຸດຄົ້ນ ແລະ ສຸມແຫລ່ງທຶນຕ່າງໆ, ຊຶ່ງທັງໝົດນີ້ ແມ່ນໜ້າທີ່ ແລະ ຄວາມຮັບຜິດຊອບ ຂອງທົ່ວພັກ, ທົ່ວລັດ ແລະ ທົ່ວປວງຊົນ, ຂອງສະມາຊິກພັກ, ພະນັກງານ, ທະຫານ, ຕໍາຫລວດ, ຕະຫລອດຮອດນັກທຸລະກິດ, ນັກພັດທະນາກອນ ແລະ ປະຊາຊົນບັນດາເຜົ່າທຸກເພດ, ທຸກໄວ. ພວກເຮົາດໍາເນີນ ກອງປະຊຸມທົບທວນ ການເຂົ້າຮ່ວມ ພັດທະນາ ຊົນນະບົດ ຂອງບັນດາ ຫົວໜ່ວຍທຸລະກິດ, ຜູ້ປະກອບການ ແລະ ປະຊາຊົນ ບັນດາເຜົ່າ ໂດຍຜ່ານ ຂະບວນການ ແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍ ວຽກງານ 3 ສ້າງເຂົ້າສູ່ລວງເລິກ ທົ່ວປະເທດ ໃນຄັ້ງນີ້, ແມ່ນທ່າມກາງ ບັນຍາກາດ ທີ່ທົ່ວພັກທົ່ວລັດ ແລະ ທົ່ວປວງຊົນ ພວກເຮົາ ກໍາລັງສຸມໃສ່ ປະຕິບັດວຽກງານ ໄລຍະທ້າຍຂອງການ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ VIII ແລະ ກໍແມ່ນໄລຍະ ທີ່ທຸກຂະແໜງການ ທັງສູນກາງ ແລະ ທ້ອງຖິ່ນ ກໍາລັງຈະດໍາເນີນ ກອງປະຊຸມໃຫຍ່ 3 ຂັ້ນ ເພື່ອກະກຽມ ໃຫ້ແກ່ກອງປະຊຸມ ຄັ້ງທີ XI ຂອງພັກ.
ໂອກາດນີ້, ທ່ານ ຄໍາໝັ້ນ ສູນວິເລີດ ລັດຖະມົນຕີ ກະຊວງພາຍໃນ, ຮອງປະທານຄະນະຊີ້ ນໍາລະດັບຊາດ ກ່ຽວກັບການ ແຂ່ງຂັນ-ຍ້ອງຍໍຮັກຊາດ ແລະ ພັດທະນາ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອ ສືບຕໍ່ ຊຸກຍູ້ຂະບວນ ການແຂ່ງຂັນຮັກຊາດ, ສ້າງບ້ານພັດທະນາ ແລະ ຜັນຂະຫຍາຍວຽກງານ 3 ສ້າງ ສູ່ລວງເລິກໃນທົ່ວປະເທດ, ໂດຍມີຈຸດປະສົງ ເພື່ອເຊີນຜູ້ປະກອບການ ທີ່ດຳເນີນທຸລະກິດ ຢູ່ ສປປ ລາວ ປະກອບສ່ວນ ທາງດ້ານ ກໍາລັງແຮງ ແລະ ຫົວຄິດ ປະດິດສ້າງ ເຂົ້າຮ່ວມ ໃນການພັດທະນາ ຊົນນະບົດ ເພື່ອແກ້ໄຂ ຄວາມທຸກຍາກ ຂອງປະຊາຊົນ. ຍ້ອນລັດຖະບານ ເຫັນໄດ້ວ່າ ພາກທຸ ລະກິດ ມີກໍາລັງແຮງ, ມີນໍ້າໃຈຮັກຊາດ, ມີທຶນ, ມີຄວາມສາມາດ ໃນການດຳເນີນ ທຸລະກິດ, ມີເຄືອຂ່າຍ ທາງທຸລະກິດ, ມີຕະຫລາດ, ມີກົນໄກ ການຈະລາຈອນ ສິນຄ້າ ແລະ ການບໍລິການ ທີ່ມີຄຸນນະພາບ ແລະ ມີຄວາມມຸ່ງມາດ ປາຖະໜາ ທີ່ຈະປະກອບສ່ວນ ເຂົ້າໃນການ ພັດທະນາ ຊົນນະບົດ ເພື່ອແກ້ໄຂ ຄວາມທຸກຍາກ ຂອງປະຊາຊົນ ບັນດາເຜົ່າ ດັ່ງທີ່ເຄີຍມີຕົວແບບທີ່ດີ ແລະ ມີນັກພັດທະນາ ດີເດັ່ນແຫ່ງຊາດ ມາແລ້ວ ໃຫ້ໄດ້ຢ່າງໜັກແໜ້ນ ແລະ ທົ່ວເຖິງ. ສໍາລັບເນື້ອໃນ ການພັດທະນາ ຊົນນະບົດ ເພື່ອແກ້ໄຂ ຄວາມທຸກຍາກທີ່ສະເໜີ ໃຫ້ພາກທຸລະກິດມີ ຄື: ເຂົ້າຮ່ວມພັດທະນາ ຊົນນະບົດ ຮອບດ້ານ ຕາມທິດ ສ້າງຊົນນະບົດໃໝ່, ເຂົ້າໄປດຳເນີນ ກິດຈະກຳຕ່າງໆ ໃນການລົງທຶນ ໃສ່ສົ່ງເສີມ ການຜະລິດ ເປັນສິນຄ້າ ແລະ ການບໍລິການ, ເຂົ້າຮ່ວມພັດທະນາ ພື້ນຖານ ໂຄງລ່າງ ຮັບໃຊ້ການຜະລິດ ແລະ ການບໍລິການ, ເຂົ້າຝຶກອົບຮົມ ຍົກລະດັບວິຊາຊີບ, ພັດທະນາ ຊາວກະສິກອນ ແລະ ຖັນແຖວວິຊາການ ໃຫ້ຊຳນິຊຳ ນານ. ຂະບວນການ ຄັ້ງນີ້, ຕ້ອງໄດ້ສຸມໃສ່ ໃນການລະດົມ ບັນດາຜູ້ປະກອບການ ໃນການເຂົ້າຮ່ວມລົງ ທຶນຮ່ວມ ກັບປະຊາຊົນ ໂດຍສະເພາະ ແມ່ນຊຸກຍູ້ ໃຫ້ຜູ້ປະກອບການ ຂະໜາດກາງ ແລະ ຂະໜາດນ້ອຍ ຊ່ວຍໃຫ້ເຂົາເຈົ້າ ມີທ່າແຮງ ໃນການຜະລິດ, ການປຸງແຕ່ງ ແລະ ການຊອກຫາ ຕະຫລາດ ເຊິ່ງສອດຄ່ອງ ກັບທິດຂະບວນການ ແຂ່ງຂັນຮັກຊາດ ແລະ ພັດທະນາ ຕິດພັນກັບການ ພັດທະນາ ຊົນນະບົດ ເພື່ອແກ້ໄຂ ຄວາມທຸກຍາກ ຂອງປະຊາຊົນ.
ທ່ານ ຄໍາໝັ້ນ ສູນວິເລີດ ສະແດງຄວາມເຊື່ອໝັ້ນວ່າ: ຖ້າຫາກບັນດານັກທຸລະກິດ, ຜູ້ປະກອບການ ແລະ ພັດທະນາກອນ ຮ່ວມແຮງຮ່ວມໃຈ ກັບບັນດາກະຊວງ, ອົງການຂັ້ນສູນກາງ ແລະ ອົງການປົກຄອງ ທ້ອງຖິ່ນແຕ່ລະຂັ້ນ ດ້ວຍນໍ້າໃຈ ຮັກຊາດ ອັນແທ້ຈິງ, ພ້ອມກັບ ການສະໜັບ ສະໜູນ ຈາກບັນດາ ປະເທດເພື່ອນມິດ ແລະ ອົງການຈັດຕັ້ງສາກົນ ສືບຕໍ່ເພີ່ມກໍາລັງເຫື່ອແຮງ, ສະຕິປັນຍາ, ທຶນ ຮອນ, ເຕັກນິກ ແລະ ວິຊາການ ເຂົ້າໃສ່ການ ພັດທະນາຊົນນະບົດ, ແນ່ນອນ ພວກເຮົາ ຈະສາມາດ ແກ້ໄຂ ໄດ້ຄວາມທຸກຍາກ ຂອງປະຊາຊົນ, ຂະບວນການ ແຂ່ງຂັນ ຮັກຊາດ, ສ້າງບ້ານພັດທະນາ ແລະ ຜັນຂະຫຍາຍ ວຽກງານ 3 ສ້າງ ສູ່ລວງເລິກ ໃນທົ່ວປະເທດ ຂອງພວກເຮົາ ທີ່ຈະມີການສະຫລຸບ ຕີລາຄາ ປະເມີນຜົນໃນປີ 2020 ກໍຈະໄດ້ຮັບ ຜົນສໍາເລັດ ຢ່າງສະຫງ່າງາມ.