ຜົນກອງປະຊຸມລັດຖະບານເປີດກວ້າງ ຄັ້ງທີ I ແລະ ຜົນກອງປະຊຸມຊຸກຍູ້ຂະບວນການຮັກຊາດ ແລະ ພັດທະນາ ຕິດພັນກັບການພັດະນາຊົນນະບົດເພື່ອແກ້ໄຂຄວາມທຸກຍາກ

ຂປລ. ກອງປະຊຸມລັດຖະບານເປີດກວ້າງ ຄັ້ງທີ I ປີ 2019 ໄດ້ໄຂຂຶ້ນໃນວັນທີ 26-27 ມິຖຸນາ 2019 ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍມີບັນດາ ຮອງນາຍົກລັດຖະມົນຕີ, ສະມາຊິກລັດຖະບານ, ເຈົ້າຄອງນະຄອນ ຫລວງວຽງຈັນ, ເຈົ້າແຂວງທົ່ວປະເທດ, ຜູ້ຕາງໜ້າອົງການຈັດຕັ້ງພັກ, ສະພາແຫ່ງຊາດ, ອົງການຕຸລາ ການ, ອົງການ ໄອຍະການ ປະຊາຊົນສູງສຸດ, ສູນກາງ ແນວລາວ ສ້າງຊາດ, ສະຫະພັນ ນັກຮົບເກົ່າ ແຫ່ງຊາດ, ອົງການມະຫາຊົນ, ພ້ອມດ້ວຍແຂກຖືກເຊີນ ເຂົ້າຮ່ວມຢ່າງພ້ອມພຽງ.

ທ່ານ ຈະເລີນ ເຢຍປາວເຮີ ລັດຖະມົນຕີ ປະຈຳສຳນັກງານນາຍົກລັດຖະມົນຕີ, ໂຄສົກລັດຖະ ບານ ກ່າວໃນພິທີຖະແຫລງຂ່າວໃນວັນທີ 28 ມິຖຸນາ 2019 ນີ້ວ່າ: ກອງປະຊຸມລັດຖະບານເປີດກວ້າງໃນຄັ້ງນີ້, ເປັນກອງປະຊຸມຜັນຂະຫຍາຍ ແລະ ຈັດຕັ້ງປະຕິບັດຜົນສໍາເລັດກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີX ແລະ ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ 8. ກອງປະຊຸມໄດ້ພ້ອມກັນສຸມໃສ່ຄົ້ນຄວ້າ ແລະ ປະກອບຄໍາເຫັນ ດ້ວຍຄວາມຮັບຜິດຊອບສູງ ແລະ ກົງໄປກົງມາ ຕໍ່ 3 ກຸ່ມເນື້ອໃນສຳຄັນດັ່ງນີ້:
ສະຫລຸບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍປີ 2019; ທິດທາງແຜນພັດ ທະນາເສດຖະກິດ-ສັງຄົມ, ແຜນງົບປະມານ ແລະ ແຜນການລົງທຶນຂອງລັດ ປະຈໍາປີ 2020; ຕີລາຄາການຈັດຕັ້ງປະຕິບັດຄໍາສັ່ງເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານ ໃນການດໍາເນີນທຸລະກິດຢູ່ ສປປ ລາວ ແລະ ບັນຫາພົ້ນເດັ່ນຈຳນວນໜຶ່ງ. ສະຫລຸບຕີລາຄາ ກ່ຽວກັບການແກ້ໄຂໄພພິບັດໃນຂອບເຂດທົ່ວປະເທດ ແລະ ການກະກຽມຄວາມພ້ອມ ເພື່ອຮັບມືກັບໄພພິບັດທີ່ອາດຈະເກີດຂຶ້ນໃນຕໍ່ໜ້າ. ການສະຫລຸບຕີລາຄາ ການຈັດຕັ້ງປະຕິບັດຄໍາສັ່ງເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້ ໃນໄລຍະ 3 ປີທີ່ຜ່ານມາ ແລະ ທິດທາງຕໍ່ໜ້າ.
ຜົນຂອງການປຶກຫາລື ແລະ ພິຈາລະນາ ມີດັ່ງນີ້:
ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະແຜນເງິນຕາໃນ 6 ເດືອນຕົ້ນປີ ກໍຄື 6 ເດືອນທ້າຍປີ 2019 ແລະ ທິດທາງປີ 2020 ນັ້ນ, ລັດຖະບານໄດ້ລາຍງານຕໍ່ກອງປະຊຸມເທື່ອທີ 7 ຂອງສະພາແຫ່ງຊາດຊຸດທີ 8 ແລະ ສະພາແຫ່ງຊາດໄດ້ມີມະຕິຮັບ ຮອງເລກທີ 01/ສພຊ, ລົງວັນທີ 7 ມິຖຸນາ 2019 ແລ້ວ, ແຕ່ກອງປະຊຸມ ກໍໄດ້ສະຫລຸບສັງລວມຕື່ມວ່າ: ການພັດທະນາເສດຖະກິດ-ສັງຄົມ ໂດຍລວມດຳເນີນໄປຕາມແຜນການທີ່ວາງໄວ້, ເສດຖະກິດມະຫາພາກຍັງສືບຕໍ່ຢູ່ໃນທ່າຂະຫຍາຍຕົວ, ພວກເຮົາຮັກສາໄດ້ສະຖຽນລະພາບດ້ານການເມືອງ ຢ່າງໜັກແໜ້ນ, ສັງ ຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີ, ການຄຸ້ມຄອງລັດ ແລະ ຄຸ້ມຄອງສັງຄົມດ້ວຍກົດ ໝາຍ ແລະ ລະບຽບການມີຄວາມເຂັ້ມງວດຂື້ນກ່ວາເກົ່າ, ບົດບາດຂອງປະເທດເຮົາໃນເວທີສາກົນ ໄດ້ຮັບການເຊີດຊູສູງຂຶ້ນຢ່າງຕໍ່ເນື່ອງ.
ເຖິງຢ່າງໃດກໍ່ຕາມ, ກອງປະຊຸມ ກໍ່ໄດ້ຕີລາຄາຢ່າງກົງໄປກົງມາວ່າ ພວກເຮົາຍັງມີຄວາມສ່ຽງ, ມີດ້ານອ່ອນຄົງຄ້າງ ທີ່ຕ້ອງໄດ້ສູ້ຊົນບຸກບືນແກ້ໄຂຕື່ມ. ຈາກນັ້ນ, ກອງປະຊຸມກໍໄດ້ເປັນເອກະພາບກຳນົດວຽກຈຸດສຸມສຳຄັນສຳລັບ 6 ເດືອນທ້າຍປີ ເພື່ອຮັບປະກັນການຈັດຕັ້ງປະຕິບັດ ໃຫ້ບັນລຸຕາມແຜນການທີ່ວາງໄວ້ ແລະ ມະຕິ 01 ຂອງສະພາແຫ່ງຊາດເປັນຕົ້ນ:
ຕ້ອງສຸມໃສ່ຄຸ້ມຄອງການເກັບລາຍຮັບໃຫ້ຄົບຖ້ວນ ແລະ ໄປຕາມກົດໝາຍ, ລະບຽບການກຳນົດຢ່າງເຂັ້ມງວດ, ໃຫ້ບັນດາກະຊວງທີ່ມີລາຍຮັບ ແລະ ທ້ອງຖິ່ນເອົາໃຈໃສ່ຖືວຽກງານນີ້ເປັນໃຈກາງ. ພ້ອມກັນນີ້, ກໍຕ້ອງເອົາໃຈໃສ່ຄຸ້ມຄອງລາຍຈ່າຍ ແລະ ເຂັ້ມງວດຈັດຕັ້ງປະຕິບັດນະໂຍບາຍປະຢັດ.
ຕ້ອງເອົາໃຈໃສ່ຄຸ້ມຄອງເສດຖະກິດມະຫາພາກ, ສູ້ຊົນໃຫ້ບັນລຸບັນດາຄາດໝາຍຕົວເລກ ມະຫາພາກໃນແຜນພັດທະນາເສດຖະກິດ-ສັງຄົມ; ຮັກສາສະຖຽນລະພາບເງິນຕາ, ອັດຕາແລກປ່ຽນ ແລະ ອັດ ຕາເງິນເຟີ້ໃຫ້ຢູ່ໃນເກນທີ່ກຳນົດໄວ້.
ສຸມໃສ່ຈັດຕັ້ງປະຕິບັດ 8 ມາດຕະການກະຕຸ້ນເສດຖະກິດ ຊຶ່ງລັດຖະບານ ໄດ້ມອບໜ້າທີ່ຄວາມຮັບຜິດຊອບໃຫ້ແຕ່ລະຂະແໜງການແລ້ວ, ຄຽງຄູ່ກັບການຈັດຕັ້ງປະຕິບັດຄຳສັ່ງ 02 ຢ່າງເຂັ້ມງວດ.
ເອົາໃຈໃສ່ຊຸກຍູ້ການຈັດຕັ້ງປະຕິບັດ ໂຄງການລົງທຶນຂອງລັດ ແລະ ສືບຕໍ່ແກ້ໄຂໜີ້ສິນໂຄງການລົງທຶນຂອງລັດຕາມນະໂຍບາຍຂອງລັດຖະບານ.
ບັນດາຂະແໜງການ ແລະ ທ້ອງຖິ່ນ ຕ້ອງຕັ້ງໜ້າຈັດຕັ້ງປະຕິບັດນະໂຍບາຍສົ່ງເສີມ ແລະ ອະ ນຸຍາດການລົງທຶນຕາມສິດ, ພາລະບົດບາດຂອງຕົນ, ອັນໃດເກີນສິດ ຈຶ່ງສະເໜີມາຍັງລັດຖະບານ ແລະລັດຖະບານ ກໍ່ຈະເອົາໃຈໃສ່ພິຈາລະນາແກ້ໄຂໃຫ້ທັນການ.
ເອົາໃຈໃສ່ຊຸກຍູ້ການຜະລິດໃນລະດູຝົນ, ກະກຽມປ້ອງກັນ ແລະ ແກ້ໄຂບັນຫາພະຍາດລະບາດສັດ ແລະ ສັດຕູພືດ, ເລັ່ງລັດການຜະລິດສິນຄ້າ ໂດຍສະເພາະສິນຄ້າກະສິກຳສົ່ງອອກ.
ສືບຕໍ່ເພີ່ມທະວີເອົາໃຈໃສ່ ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍສະເພາະຕ້ອງນຳໃຊ້ມາດຕະການຕ່າງໆ ສະກັດກັ້ນ ແລະ ຕ້ານກົນອຸບາຍຫັນປ່ຽນໂດຍສັນຕິຂອງພວກບໍ່ຫວັງດີ ທີ່ຜ່ານສື່ສັງຄົມອອນລາຍ, ການຕ້ານບັນຫາຢາເສບຕິດ ຕ້ອງເອົາໃຈໃສ່ເຮັດຢ່າງແຂງແຮງກວ່າເກົ່າ, ທຸກພາກ ສ່ວນຕ້ອງຮ່ວມມືຊ່ວຍກັນ.
ຜັນຂະຫຍາຍ ແລະ ຈັດຕັ້ງປະຕິບັດ ມາດຕະການ 6 ເດືອນທ້າຍປີ 2019 ທີ່ກອງປະຊຸມສະພາແຫ່ງຊາດໄດ້ຮັບຮອງຕາມມະຕິ ສະບັບເລກທີ 01/ສພຊ, ລົງວັນທີ 07 ມິຖຸນາ 2019.
ສຳລັບທິດທາງແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາປີ 2020 ນັ້ນ, ລັດຖະບານມອບໃຫ້ບັນດາກະຊວງ, ທ້ອງຖິ່ນ ສືບຕໍ່ຄົ້ນຄວ້າ, ກະກຽມໃຫ້ລະອຽດ, ຮັດກຸມ ແລະ ທັນຕາມກຳນົດເວລາ, ທັງສອດຄ່ອງກັບຕາມຄວາມສາມາດຕົວຈິງຢູ່ໃນຈິດໃຈບຸກບືນ ແລະ ບຸກທະລຸ.
ສຳລັບບັນຫາພົ້ນເດັ່ນຈຳນວນໜຶ່ງກອງປະຊຸມໄດ້ເຫັນດີເປັນເອກະພາບດັ່ງນີ້:
ການຈັດຕັ້ງປະຕິບັດຄຳສັ່ງເລກທີ 02/ນຍ: ຕ້ອງຮີບຮ້ອນ ສືບຕໍ່ສຸມໃສ່ປັບປຸງຕົວຊີ້ວັດຕ່າງໆ ເປັນ ຕົ້ນແມ່ນ ຕົວຊີ້ວັດທີ່ຍັງບໍ່ທັນມີຄວາມຄືບໜ້າ, ສູ້ຊົນແກ້ໄຂສິ່ງອຸດຕັນ (ດ້ານນິຕິກຳ, ກົນໄກ ແລະ ຂັ້ນຕອນປະຕິບັດ ທີ່ເຫັນວ່າຍັງເປັນການກົດໜ່ວງໃຫ້ສຳເລັດເປັນກ້າວໆ), ຄຽງຄູ່ກັບການສືບຕໍ່ປະຕິບັດນະ ໂຍບາຍ 3 ເປີດ ແນໃສ່ເຮັດໃຫ້ການດຳເນີນທຸລະກິດຢູ່ພາຍໃນປະເທດເຮົາງ່າຍຂຶ້ນ ແລະ ທຸລະກິດສາ ມາດຂະຫຍາຍຕົວໄດ້. ບັນດາຂະແໜງການຕ້ອງເອົາໃຈໃສ່ຊີ້ນຳ ແລະ ຊຸກຍູ້ພະນັກງານວິຊາການຂອງຕົນໃຫ້ປະຕິບັດວຽກງານດັ່ງກ່າວນີ້ ດ້ວຍຄວາມຮັບຜິດຊອບສູງ.
ການປັບປຸງໂຄງສ້າງລາຄາໄຟຟ້າ: ໄດ້ຮັບຮອງດ້ານຫລັກການຕໍ່ການປັບປຸງໂຄງສ້າງລາຄາໄຟຟ້າໃຫ້ສອດຄ່ອງ, ໃນນີ້ສໍາລັບລາຄາໄຟຟ້າຮັບໃຊ້ທີ່ຢູ່ອາໄສ ແມ່ນໃຫ້ປະຕິບັດຕາມລາຄາດຽວ, ໂດຍມີນະ ໂຍບາຍອຸດໜູນ ຕໍ່ເປົ້າໝາຍທີ່ຊົມໃຊ້ໄຟຟ້າຕໍ່າກວ່າ 50 ກິໂລວັດໂມງ. ພ້ອມກັນນັ້ນ, ກໍໃຫ້ປັບປຸງລາຄາໄຟຟ້າຮັບໃຊ້ການຜະລິດກະສິກຳ, ອຸດສາຫະກຳ, ການບໍລິການຕ່າງໆ ໃຫ້ສົມເຫດສົມຜົນ ເພື່ອຮັບປະກັນຊຸກຍູ້ການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນ, ໂດຍມອບໃຫ້ກະຊວງພະລັງງານ ແລະ ບໍ່ແຮ່ ສົມທົບກັບພາກສ່ວນກ່ຽວຂ້ອງ ປັບປຸງຕື່ມກ່ອນຈະປະກາດໃຊ້. ພ້ອມກັນນີ້ ກໍໃຫ້ຄົ້ນຄວ້າປັບຫລຸດຕົ້ນທຶນຂອງການສ້າງເຂື່ອນ ຫລື ໂຮງງານໄຟຟ້າ, ຕົ້ນທຶນຂອງການກໍ່ສ້າງສາຍສົ່ງ, ຕົ້ນທຶນຊື້ໄຟຟ້າຈາກໂຮງງານ, ຕົ້ນທຶນການກູ້ຢືມ ແລະ ອື່ນໆ, ລວມທັງຄົ້ນຄວ້າອອກມາດຕະການຫລຸດຜ່ອນຕົ້ນທຶນຄ່າບໍລິຫານ ແລະ ຄ່າສິ້ນເປືອງຕ່າງໆ ຂອງບໍລິສັດໄຟຟ້າລາວ ຢ່າງສົມເຫດສົມຜົນ.
ການກວດກາ ແລະ ຄຸ້ມຄອງການປູກກ້ວຍ: ປະຊາຊົນລາວປູກກ້ວຍມາແຕ່ດົນນານ, ລັດຖະບານບໍ່ໄດ້ຫ້າມການປູກກ້ວຍ, ແຕ່ຕ້ອງສົ່ງເສີມການປູກກ້ວຍປອດສານພິດ ແລະ ເປັນມິດກັບທຳມະຊາດ ເພື່ອເປັນສິນຄ້າສົ່ງອອກຕ່າງປະເທດ. ມອບໃຫ້ທ້ອງຖິ່ນຕ່າງໆ ເປັນເຈົ້າການສືບຕໍ່ເອົາໃຈໃສ່ກວດກາ ແລະ ຄຸ້ມຄອງໂຄງການປູກກ້ວຍ ທີ່ໄດ້ຮັບການອະນຸຍາດແລ້ວຫັນມາປູກແບບປອດສານພິດ, ໃຫ້ນຳໃຊ້ຝຸ່ນ ຫລື ປຸ໋ຍຊີວະພາບ, ບໍ່ໃຫ້ໃຊ້ສານເຄມີທີ່ເປັນອັນຕະລາຍ. ໃນກໍລະນີກວດເຫັນການກະທຳຜິດກໍໃຫ້ຢຸດຕິ ແລະ ແກ້ໄຂບັນຫາຢ່າງທັນການ. ສຳລັບໂຄງການທີ່ຈະລົງທຶນໃໝ່ ໃຫ້ປະກອບບົດວິພາກເສດຖະກິດ-ເຕັກນິກ ຕາມລະບຽບການການລົງທຶນ ແລະ ລະບຽບການກ່ຽວຂ້ອງຢ່າງເຂັ້ມງວດ. ຄຽງຄູ່ກັນນີ້, ກໍໃຫ້ເອົາໃຈໃສ່ ສົ່ງເສີມການຜະລິດພືດກະສິກຳອື່ນ ທີ່ເປັນມິດຕໍ່ສິ່ງແວດລ້ອມເພື່ອເປັນການດຸ່ນດ່ຽງ ຕາມຄວາມຕ້ອງການຂອງຕະຫລາດ ແລະ ຕາມທ່າແຮງຂອງແຕ່ລະທ້ອງຖິ່ນ.
ການຄຸ້ມຄອງລາຄາສິນຄ້າ ແລະ ການນໍາເຂົ້າສິນຄ້າ: ປັດຈຸບັນລາຄາສິນຄ້າ ແລະ ຄ່າຄອງຊີບແມ່ນສູງ ສົມຄວນທຽບກັບຫລາຍປະເທດໃນອາຊຽນ ຊຶ່ງກະທົບຕໍ່ຊີວິດການເປັນຢູ່ຂອງປະຊາຊົນລວມທັງການສົ່ງເສີມການທ່ອງທ່ຽວ. ກອງປະຊຸມໄດ້ປຶກສາຫາລື ກ່ຽວກັບສາເຫດຕົ້ນຕໍ ທີ່ພາໃຫ້ສິນຄ້າ ແລະ ຄ່າຄອງຊີບແພງ ແລະ ໄດ້ຊີ້ນຳໃຫ້ກະຊວງອຸດສາຫະກຳ ແລະ ການຄ້າ ສົມທົບກັບພາກສ່ວນກ່ຽວຂ້ອງຮີບຮ້ອນຄົ້ນຄວ້າ ແລະ ຊອກຫາວິທີແກ້ໄຂ ເປັນຕົ້ນ ຕ້ອງສົ່ງເສີມການຜະລິດສິນຄ້າພາຍໃນໃຫ້ແຂງແຮງ, ຫລຸດຕົ້ນທຶນການຜະລິດໃຫ້ເໝາະສົມ ແລະ ຄຸ້ມຄອງການນຳເຂົ້າສິນຄ້າຕ່າງໆ ໂດຍສະເພາະສິນຄ້າຍຸດທະສາດ ເຊັ່ນ ນ້ຳມັນ, ໄຟຟ້າເປັນຕົ້ນ.
ການຄຸ້ມຄອງ ແລະ ສົ່ງເສີມການທ່ອງທ່ຽວ: ເອົາໃຈໃສ່ພັດທະນາ ແລະ ຄຸ້ມຄອງແຫລ່ງທ່ອງທ່ຽວເພື່ອຮັກສາໄວ້ຄວາມເປັນທຳມະຊາດ ແລະ ເອກະລັກຂອງຊາດ, ແກ້ໄຂຂັ້ນຂອດທີ່ຕິດພັນກັບການບໍລິການຂອງພາກລັດຢ່າງເປັນລະບົບ, ແກ້ໄຂບັນຫາການເກັບຄ່າຕ່າງໆ ຢູ່ສະຖານທີ່ທ່ອງທ່ຽວ ໃຫ້ສອດຄ່ອງກັບກົດໝາຍ ແລະ ລະບຽບການ. ຊຸກຍູ້ໃຫ້ຜູ້ປະກອບການທ່ອງທ່ຽວ ປັບປຸງການບໍລິການຂອງຕົນໃຫ້ມີຄຸນນະພາບ ສ້າງຄວາມປະທັບໃຈໃຫ້ແກ່ນັກທ່ອງທ່ຽວ, ຫລີກລ່ຽງການເອົາປຽບນັກທ່ອງທ່ຽວ.
ການແກ້ໄຂບັນຫາທີ່ດິນ: ໂດຍສະເພາະບັນຫາການເຊົ່າ ແລະ ສຳປະທານທີ່ດິນລັດ ທີ່ໄດ້ອະນຸ ມັດໄປແລ້ວ, ບາງໂຄງການບໍ່ປະຕິບັດຕາມສັນຍາ, ບໍ່ເສຍພັນທະ ຫລື ເສຍບໍ່ຄົບ ແມ່ນໃຫ້ກະຊວງຊັບ ພະຍາກອນທຳມະຊາດ ແລະ ສິ່ງແວດລ້ອມ ສົມທົບກັບພາກສ່ວນກ່ຽວຂ້ອງຮີບຮ້ອນແກ້ໄຂ ແລະ ປະຕິ ບັດມາດຕະການຢ່າງເຂັ້ມງວດຕໍ່ຜູ້ກະທຳຜິດ. ພ້ອມກັນນັ້ນ, ຕ້ອງຈັດຕັ້ງປະຕິບັດຢ່າງເຂັ້ມງວດຕໍ່ມະຕິເລກທີ 04/ສພຊ, ລົງວັນທີ 10 ມິຖຸນາ 2019 ຂອງສະພາແຫ່ງຊາດ ກ່ຽວກັບການຄຸ້ມຄອງການອອກໃບຕາດິນ, ການແກ້ໄຂການອອກໃບຕາດິນຊ້ຳຊ້ອນ.
ການແກ້ໄຂບັນຫາພະຍາດອະຫິວາໝູອາຟຣິກາ: ກອງປະຊຸມໄດ້ຊີ້ນຳ ໃຫ້ກະຊວງກະສິກຳ ແລະ ປ່າໄມ້ ສົມທົບກັບແຂວງສາລະວັນ ຮີບຮ້ອນແກ້ໄຂບັນຫາດັ່ງກ່າວໃຫ້ທັນການ, ພ້ອມທັງຄົ້ນຄ້ວາທິດທາງ ແລະ ກໍານົດມາດຕະການທີ່ຮັດກຸມກ່ວາເກົ່າ ໃນການຄວບຄຸມ ແລະ ສະກັດກັ້ນ ເພື່ອບໍ່ໃຫ້ແຜ່ລາມໄປສູ່ເຂດອື່ນອີກ ຕາມຫລັກວິທະຍາສາດໃຫ້ທັນການ.
ການພັດທະນາຊັບພະຍາກອນມະນຸດ: ກອງປະຊຸມໄດ້ເຫັນດີເປັນເອກະພາບ ມອບໃຫ້ກະຊວງສຶກສາທິການ ແລະ ກິລາ ສົມທົບກັບຂະແໜງການກ່ຽວຂ້ອງ ຄົ້ນຄວ້າສ້າງແຜນພັດທະນາຊັບພະຍາກອນມະນຸດ ໂດຍອີງໃສ່ຄວາມຮຽກຮ້ອງຕ້ອງການຕົວຈິງຂອງຂະແໜງການ ແລະ ທ້ອງຖິ່ນ ກໍ່ຄື ຕະຫລາດແຮງງານ, ໂຄງປະກອບເສດຖະກິດ ແລະ ຍຸດທະສາດການພັດທະນາເສດຖະກິດ-ສັງຄົມແຫ່ງຊາດ ໃນໄລຍະຍາວ; ເພີ່ມທະວີການໂຄສະນາ, ສ້າງຈິດສໍານຶກ ແລະ ສ້າງຄ່ານິຍົມ ຂອງສັງຄົມຕໍ່ການພັດທະນາວິຊາຊີບສີມືແຮງງານ, ປັບປຸງຍົກລະດັບສະຖາບັນ ຫລື ສູນຝຶກອົບຮົມພະນັກງານໃນແຕ່ລະຂົງເຂດວິຊາສະເພາະ ໃຫ້ມີຄຸນນະພາບ ເພື່ອເປັນສະຖານທີ່ບຳລຸງສ້າງ ແລະ ພັດທະນາພະນັກງານລັດຖະກອນ ໃຫ້ມີຄວາມຮູ້, ຄວາມສາມາດ ແລະ ຕອບສະໜອງໄດ້ການປະຕິບັດໜ້າທີ່ວຽກງານຕົວຈິງ.
ສໍາລັບບົດລາຍງານຄວາມຄືບໜ້າ ກ່ຽວກັບການແກ້ໄຂໄພພິບັດໃນຂອບເຂດທົ່ວປະເທດ ແລະ ການກະກຽມຄວາມພ້ອມ ເພື່ອຮັບມືກັບໄພພິບັດທີ່ອາດຈະເກີດຂຶ້ນໃນ 6 ເດືອນທ້າຍປີ, ກອງປະຊຸມໄດ້ຕີລາຄາສູງ ຕໍ່ການສະໜັບສະໜູນຊ່ວຍເຫລືອຂອງປະເທດຕ່າງໆ ແລະ ອົງການສາກົນ ກໍຄື ປະຊາຊົນ ແລະ ອົງການຈັດຕັ້ງຕ່າງໆພາຍໃນປະເທດ ຕໍ່ການແກ້ໄຂໄພພິບັດຜ່ານມາ. ພ້ອມກັນນີ້, ກອງປະຊຸມໄດ້ປຶກສາຫາລື ແລະ ເຫັນດີເປັນເອກະພາບ ກ່ຽວກັບການສະຫລຸບການແກ້ໄຂໄພພິບັດໃນໄລຍະຜ່ານມາ ແລະ ແຜນກະກຽມຄວາມພ້ອມ ເພື່ອຮັບມືກັບໄພພິບັດ ໃນ 6 ເດືອນ ທ້າຍປີ ເປັນຕົ້ນ: ກຳນົດຍຸດທະສາດໃນການຕອບໂຕ້ໄພພິບັດ ໂດຍການກໍານົດຂັ້ນຕອນການປະຕິບັດງານທີ່ເປັນມາດຕະຖານ ໃນການຕອບໂຕ້ເຫດການໄພພິບັດ, ການຄຸ້ມຄອງ, ການປະສານງານ; ຕິດຕາມ ແລະ ວິເຄາະສະຖານະການ ແນວໂນ້ມໄພພິບັດ ທີ່ອາດຈະເກີດຂຶ້ນຈາກການປ່ຽນແປງຂອງດິນຟ້າອາກາດ, ປະສານສົມທົບແໜ້ນກັບບັນດາຂະແໜງການຂອງສູນກາງ ແລະ ທ້ອງຖິ່ນ ເພື່ອກະກຽມຄວາມພ້ອມດ້ານຕ່າງໆ ຕາມສະພາບຄວາມເປັນຈິງ (ງົບປະມານ, ກຳລັງຄົນ, ພາຫະນະ, ອຸປະກອນ, ເຄື່ອງຊ່ວຍເຫລືອບັນເທົາທຸກ ແລະ ອື່ນໆ); ຮີບຮ້ອນປັບປຸງກົດໝາຍວ່າດ້ວຍການຄຸ້ມຄອງໄພພິບັດ ຕາມຄໍາເຫັນຂອງກອງປະຊຸມສະໄໝສາ ມັນເທື່ອທີ 7 ຂອງສະພາແຫ່ງຊາດ ຊຸດທີ 8 ເພື່ອນໍາສະເໜີ ຄະນະປະຈໍາສະພາແຫ່ງຊາດພິຈາລະນາ ແລະ ປະກາດໃຊ້ໂດຍໄວ ແນໃສ່ເພື່ອເປັນບ່ອນອີງ ໃຫ້ແກ່ການຈັດຕັ້ງປະຕິບັດວຽກງານໄພພິບັດ.
ໃຫ້ເອົາໃຈໃສ່ແກ້ໄຂຂໍ້ຄົງຄ້າງ ການຟື້ນຟູຜົນກະທົບຈາກໄພພິບັດນ້ຳຖ້ວມປີ 2018 ໂດຍສະ ເພາະຢູ່ສະໜາມໄຊ ເປັນຕົ້ນການຊົດເຊີຍໃຫ້ແກ່ປະຊາຊົນ ທີ່ໄດ້ຮັບຜົນກະທົບໂດຍໃຫ້ຮີບຮ້ອນເຈລະຈາກັບບໍລິສັດພັດທະນາເຂື່ອນກ່ຽວກັບຄວາມຮັບຜິດຊອບຂອງບໍລິສັດ.
ບົດສະຫລຸບ ຕີລາຄາການຈັດຕັ້ງປະຕິບັດຄໍາສັ່ງເລກທີ 15/ນຍ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ, ກວດກາການຂຸດຄົ້ນໄມ້, ການເຄື່ອນຍ້າຍໄມ້ ແລະ ທຸລະກິດໄມ້ ໃນໄລຍະ 03 ປີ, ກອງປະຊຸມໄດ້ຕີລາຄາວ່າ ຄະນະສະເພາະກິດ ແລະ ທຸກພາກສ່ວນໄດ້ເອົາໃຈໃສ່ຈັດຕັ້ງປະຕິບັດໜ້າທີ່ຂອງຕົນຢ່າງຈິງຈັງ ແລະ ເຂັ້ມງວດ, ສະພາບການລັກລອບຂຸດຄົ້ນ ແລະ ສົ່ງອອກໄມ້ເຖິງວ່າຫລຸດລົງຫລາຍແຕ່ກໍ່ຍັງມີຢູ່, ສະນັ້ນຈຶ່ງມອບໃຫ້ຄະນະສະເພາະກິດ ສືບຕໍ່ວຽກງານດັ່ງກ່າວນີ້ ແລະ ໃຫ້ບັນດາເຈົ້າແຂວງ ສືບຕໍ່ເຂັ້ມງວດບໍ່ໃຫ້ມີການລັກລອບຕັດໄມ້ ລວມທັງດຳເນີນຕອບໂຕ້ ຂ່າວໃສ່ຮ້າຍບິດເບືອນທີ່ບໍ່ມີຄວາມຈິງ.
ເພື່ອແກ້ໄຂບັນຫາໄມ້ຕົກຄ້າງຢູ່ໂຮງງານປຸງແຕ່ງໄມ້ ແລະ ໄມ້ປູກ, ກອງປະຊຸມໄດ້ເຫັນດີຮັບຮອງການເພີ່ມບັນຊີລາຍການຜະລິດຕະພັນໄມ້ທຳມະຊາດເພື່ອສົ່ງອອກ (ເພີ່ມຂະໜາດຈຳນວນ 6 ລາຍການ ແລະ ຜະລິດຕະພັນໃໝ່ 9 ລາຍການ) ແລະ ລາຍການຜະລິດຕະພັນໄມ້ປູກເພື່ອສົ່ງອອກ (ໄມ້ວິກ, ໄມ້ກະຖິນນະລົງ, ໄມ້ຢາງພາລາ ແລະ ໄມ້ສັກ ແມ່ນສາມາດສົ່ງອອກໄດ້ທຸກຮູບແບບໂດຍມີການປຸງແຕ່ງຫລືບໍ່ປຸງແຕ່ງກໍໄດ້, ສ່ວນໄມ້ປູກອື່ນໆ ໃຫ້ປະຕິບັດຕາມຮູບແບບ ແລະ ລັກສະນະທີ່ກຳນົດໃນລາຍການຜະ ລິດຕະພັນໄມ້ທຳມະຊາດ), ແຕ່ໃຫ້ມີການຄຸ້ມຄອງຢ່າງຮັດກຸມ, ບໍ່ໃຫ້ມີຊ່ອງຫວ່າງເອົາໄມ້ປະເພດອື່ນອອກ.
ໃນຕອນທ້າຍກອງປະຊຸມ, ທ່ານນາຍົກລັດຖະມົນຕີ ໄດ້ຊີ້ນຳໃຫ້ສະມາຊິກລັດຖະບານ, ເຈົ້າຄອງນະຄອນຫລວງວຽງຈັນ ແລະ ບັນດາເຈົ້າແຂວງ ຈົ່ງນຳເອົາເນື້ອໃນຈິດໃຈ ທີ່ໄດ້ຕົກລົງເປັນເອກະພາບ ໃນກອງປະຊຸມຄັ້ງນີ້ ລວມທັງບັນດາວຽກງານທີ່ເປັນຈຸດສຸມ ໃນທ້າຍປີ 2019 ໄປຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດດ້ວຍຄວາມຮັບຜິດຊອບສູງ. ຮຽກຮ້ອງໃຫ້ທຸກຄົນຈົ່ງຍົກສູງຄວາມຮັບຜິດຊອບຂອງຕົນຂຶ້ນອີກລະດັບໜື່ງ, ເຮັດວຽກໃຫ້ຫລາຍ ແລະ ມີປະສິດທິຜົນກວ່າເກົ່າ ເພື່ອພ້ອມກັນຂັບເຄື່ອນການພັດ ທະນາປະເທດຂອງພວກເຮົາ ໄປຕາມທິດທາງທີ່ພັກໄດ້ກຳນົດ ແລະ ລັດຖະບານໄດ້ຜັນຂະຫຍາຍເປັນວິໃສທັດ, ເປັນຍຸດທະສາດ ແລະ ເປັນແຜນພັດທະນາແຕ່ລະໄລຍະ ເພື່ອໃຫ້ບັນລຸຕາມເປົ້າໝາຍ ແລະ ຄາດໝາຍທີ່ວາງໄວ້.
ກ່ຽວກັບຜົນກອງປະຊຸມ ຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບການພັດ ທະນາຊົນນະບົດເພື່ອແກ້ໄຂຄວາມທຸກຍາກ. ໃນວັນທີ 28 ມິຖຸນາ 2019 ພາຍຫລັງກອງປະຊຸມລັດຖະ ບານເປີດກວ້າງໄດ້ປິດລົງ, ລັດຖະບານກໍ່ໄດ້ດໍາເນີນກອງປະຊຸມຊຸກຍູ້ຂະບວນການແຂ່ງຂັນຮັກຊາດ ແລະ ພັດທະນາ ພາຍໃຕ້ຫົວຂໍ້ "ການພັດທະນາຊົນນະບົດ ເພື່ອແກ້ໄຂຄວາມທຸກຍາກຂອງປະຊາຊົນ" ເພື່ອທົບທວນຄືນການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາໃນໄລຍະຜ່ານມາ ພ້ອມທັງ ຊຸກຍູ້ໃຫ້ພາກທຸລະກິດ ເຂົ້າຮ່ວມໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ. ກອງປະຊຸມໄດ້ສະແດງຄວາມຊົມເຊີຍ ຕໍ່ພາກທຸລະກິດເປັນຕົ້ນ ພາກທຸລະກິດເອກະຊົນ ທີ່ໄດ້ຕັ້ງໜ້າປະ ກອບສ່ວນເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນບັນດາເຜົ່າ.
ໃນໂອກາດນີ້, ທ່ານນາຍົກລັດຖະມົນຕີ ໄດ້ຕາງໜ້າໃຫ້ສູນກາງພັກ ແລະ ລັດຖະບານ ໂອ້ລົມຕໍ່ກອງປະຊຸມ ທ່ານໄດ້ຮຽກຮ້ອງມາຍັງບັນດາຜູ້ປະກອບການ, ທຸກພາກສ່ວນເສດຖະກິດ, ຜູ້ມີປະສົບການ, ມີກໍາລັງແຮງ, ມີທຶນຮອນ, ມີນ້ຳໃຈເສຍສະຫລະ, ລວມທັງປະຊາຊົນບັນດາເຜົ່າທຸກຊັ້ນຄົນປະກອບສ່ວນເຂົ້າຮ່ວມການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ແຜນພັດທະນາຊົນນະບົດເພື່ອແກ້ໄຂຄວາມທຸກຍາກຂອງປະຊາຊົນ ກໍຄື ການປະຕິບັດຂະບວນການແຂ່ງຂັນຮັກຊາດ-ພັດທະນາ ເພື່ອໃຫ້ຊົນນະບົດຂອງປະເທດເຮົາໄດ້ຮັບການພັດທະນາຢ່າງທົ່ວເຖິງ, ຄວາມທຸກຍາກຂອງປະຊາຊົນ ໄດ້ຮັບການແກ້ໄຂຢ່າງໜັກ ແໜ້ນ, ປະເທດຊາດມີຄວາມຈະເລີນວັດທະນາຢ່າງບໍ່ຢຸດຢັ້ງ. ມອບໃຫ້ບັນດາກະຊວງ ແລະ ແຂວງຕ່າງໆ ຈົ່ງອຳນວຍຄວາມສະດວກ, ໃຫ້ໂອກາດແກ່ພາກທຸລະກິດ ປະກອບສ່ວນເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມຄວາມສາມາດຕົວຈິງ ດ້ວຍຄວາມສະໝັກໃຈ.
ທ້າຍສຸດນີ້, ຂ້າພະເຈົ້າໃນນາມໂຄສົກລັດຖະບານ ຂໍຮຽກຮ້ອງມາຍັງບັນດາພະນັກງານ, ສະມາ ຊິກພັກ, ລັດຖະກອນ, ກໍາມະກອນ, ນັກຮຽນຮູ້ປັນຍາຊົນ, ປະຊາຊົນບັນດາເຜົ່າ, ຊັ້ນຄົນຕ່າງໆຊາວຕ່າງດ້າວຜູ້ບໍ່ມີສັນຊາດ ທີ່ດຳລົງຊີວິດຢູ່ລາວ, ນັກທຸລະກິດພາກລັດ ແລະ ເອກະຊົນ ລວມທັງນັກທຸລະກິດຕ່າງປະເທດ ທີ່ມາລົງທຶນຢູ່ລາວ ຈົ່ງພ້ອມກັນເຊີດຊູນໍ້າໃຈເປັນເຈົ້າປະເທດຊາດ, ສາມັກຄີເປັນຈິດໜຶ່ງໃຈດຽວ, ເດັດດ່ຽວຜ່ານຜ່າອຸປະສັກຕ່າງໆ, ສູ້ຊົນເຂົ້າຮ່ວມຈັດຕັ້ງປະຕິບັດວຽກງານສໍາຄັນຕ່າງໆ ທີ່ລັດຖະ ບານວາງອອກໃຫ້ປະກົດຜົນເປັນຈິງ ເພື່ອຜົນປະໂຫຍດຂອງຊາດ, ຂອງປະຊາຊົນ ແລະ ຂອງພວກເຮົາໝົດທຸກຄົນ. ພ້ອມກັນນີ້, ໃຫ້ຍົກສູງສະຕິລະວັງຕົວຕໍ່ຜູ້ບໍ່ຫວັງດີ, ເພີ່ມທະວີຄວາມສາມັກຄີ ເປັນຈິດໜຶ່ງໃຈດຽວ, ເດັດດ່ຽວຕ້ານກົນອຸບາຍຫັນປ່ຽນໂດຍສັນຕິ ຂອງອິດທິກໍາລັງປໍລະປັກ ໃນທຸກຮູບແບບລວມທັງຜ່ານສື່ສັງຄົມອອນລາຍ ເພື່ອບໍ່ໃຫ້ຖືກກົນອຸບາຍແບ່ງແຍກ, ຍຸແຍ່ໃສ່ຮ້າຍປ້າຍສີຂອງພວກຄົນບໍ່ດີຢູ່ພາຍໃນ ແລະ ຕ່າງປະເທດ ໂດຍຜ່ານຮູບແບບຕ່າງໆ.