ກອງປະຊຸມໃຫຍ່ສະຫະພັນແມ່ຍິງ ກະຊວງຖວທ ຄັ້ງທີ VIII

 

ກອງປະຊຸມໃຫຍ່ຄັ້ງທີ VIII ຂອງສະຫະພັນແມ່ຍິງກະຊວງ ຖວທ ເປັນຂີດໝາຍແຫ່ງການສືບຕໍ່ປັບປຸງກໍ່ສ້າງການຈັດຕັ້ງສະຫະພັນແມ່ຍິງຂັ້ນກະຊວງໃຫ້ມີຄວາມໜັກໜັ້ນເຂັ້ມແຂງໄປເລື້ອຍໆ. ໃຫ້ກຽດເປັນປະທານໂດຍທ່ານ ສຈ.ປອ ບໍ່ແສງຄຳ ວົງດາລາ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງຖວທ ແລະ ທ່ານ ດຣ ນາງ ອິນລາວັນ ແກ້ວບຸນຜັນ ກຳມະການສູນກາງພັກ, ເລຂາຄະນະພັກ, ປະທານຄະນະບໍລິຫານສູນກາງສະຫະພັນແມ່ຍິງລາວ.

ສະນັ້ນໃນວາລະດຳເນີນກອງປະຊຸມເປັນເວລາ 1 ວັນເຕັມ ທີ່ຫໍວັດທະນະທຳແຫ່ງຊາດ. ບັນດາຜູ້ແທນສົມບູນກອງປະຊຸມໃຫຍ່ຈະໄດ້ພ້ອມກັນຮັບຟັງ ແລະ ຮັບຮອງເອົາການສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VII ຂອງສະຫະພັນແມ່ຍິງກະຊວງ ແລະ ທິດທາງແຜນການໃນ 5 ປີຕໍ່ໜ້າ; ຈະໄດ້ປ່ອນບັດຄັດເລືອກເອົາຄະນະບໍລິຫານງານສະຫະພັນແມ່ຍິງກະຊວງຊຸດທີ VIII ເພື່ອສືບຕໍ່ຊີ້ນຳ-ນຳພາວຽກງານແມ່ຍິງ ແລະ ຮັບຟັງການໂອ້ລົມຂອງຄະນະການນຳກະຊວງ ແລະ ການນຳຈາກສູນກາງສະຫະພັນແມ່ຍິງລາວເພື່ອເປັນທິດຊີ້ນຳ, ເປັນບ່ອນອີງໃຫ້ແກ່ການນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VIII ກໍ່ຄືການນຳພາຂະບວນການພັດທະນາແມ່ຍິງໃຫ້ກ້າວຂຶ້ນຢ່າງບໍ່ຢຸດຢັ້ງ.
ກອງປະຊຸມໃຫຍ່ຄັ້ງນີ້ ມີຜູ້ແທນສົມບູນເຂົ້າຮ່ວມທັງໝົດ 243 ສະຫາຍ. ໃນນັ້ນຄະນະບໍລິຫານງານສະຫະພັນແມ່ຍິງກະຊວງ 10 ສະຫາຍ; ຄະນະສະຫະພັນແມ່ຍິງຮາກຖານ 30 ສະຫາຍ; ຄະນະໜ່ວຍສະຫະພັນແມ່ຍິງ 101 ສະຫາຍ; ສະມາຊິກສະຫະພັນແມ່ຍິງ 102 ສະຫາຍ;
-ຜູ້ແທນສົມບູນເຂົ້າການປະຕິວັດຫຼັງປີ 1975 ຈຳນວນ 243 ສະຫາຍ.
-ຜູ້ແທນສົມບູນທີ່ເປັນສະມາຊິກພັກທັງໝົດ 160 ສະຫາຍ.
-ຜູ້ແທນສົມບູນເປັນຊົນເຜົ່າລາວ: 229 ສະຫາຍ.
-ຜູ້ແທນສົມບູນເປັນຊົນເຜົ່າຜູ້ໄທ: 02 ສະຫາຍ.
-ຜູ້ແທນສົມບູນເປັນຊົນເຜົ່າມົ້ງ: 04 ສະຫາຍ.
-ຜູ້ແທນສົມບູນເປັນຊົນເຜົ່າໄທແດງ: 01 ສະຫາຍ.
-ຜູ້ແທນສົມບູນເປັນຊົນເຜົ່າກຶມມຸ: 05 ສະຫາຍ.
-ຜູ້ແທນສົມບູນເປັນຊົນເຜົ່າຍວນ: 01 ສະຫາຍ.
-ຜູ້ແທນສົມບູນເປັນຊົນເຜົ່າລື້: 01 ສະຫາຍ.