ທ່ານ ບຸນທອງ ຈິດມະນີ ເຄື່ອນໄຫວວຽກງານ ຢູ່ແຂວງອັດຕະປື

ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະ ມົນຕີ ປະທານ ຄະນະກວດກາສູນກາງພັກ ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມຄະນະໄດ້ໄປຢ້ຽມຢາມ ແລະ ເຮັດວຽກຢູ່ເມືອງສະໜາມໄຊ ແຂວງອັດຕະປື ເມື່ອວັນທີ 18 ມິຖຸນາຜ່ານມາ.

ໂດຍໃຫ້ກຽດຕ້ອນຮັບຈາກທ່ານ ອຸ່ນຫຼ້າ ໄຊຍະສິດ ຄະນະປະຈໍາພັກແຂວງ ຮອງເຈົ້າແຂວງໆ ອັດຕະປື, ມີຄະນະພັກ, ຄະນະນໍາຂອງ ເມືອງ, ບັນດາຫ້ອງການອ້ອມຂ້າງເມືອງ, ພະນັກງານ, ທະຫານ, ຕໍາຫຼວດ ພ້ອມດ້ວຍປະຊາຊົນພາຍໃນແຂວງດັ່ງກ່າວ. ການ ເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້, ແມ່ນໄດ້ຮັບຟັງການລາຍງານສະ ພາບການຈັດຕັ້ງປະຕິບັດວຽກງານຮອບດ້ານ ຂອງຄະນະພັກ-ອໍານາດການປົກຄອງເມືອງສະໜາມໄຊ ໃນການກະກຽມສ້າງຂະບວນການດໍາເນີນກອງປະຊຸມໃຫຍ່ ແຕ່ລະຂັ້ນ; ລາຍງານກ່ຽວກັບການຈັດຕັ້ງປະຕິບັດມະຕິກອງປະຊຸມໃຫຍ່ແຕ່ລະຂັ້ນ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມຂອງເມືອງ ແລະ ຮັບຟັງລາຍງານກ່ຽວກັບສະພາບການຟື້ນຟູ ແລະ ການ ຊ່ວຍເຫຼືອບັນເທົາທຸກໃຫ້ແກ່ປະຊາຊົນຜູ້ປະສົບໄພ ຈາກເຫດການເຂື່ອນ D ຂອງໂຄງການເຂື່ອນໄຟຟ້າເຊປຽນ-ເຊນຳ້ນ້ອຍແຕກພັງ ໂດຍສະເພາະແມ່ນວຽກງານຈັດສັນທີ່ຢູ່ອາໄສໃຫ້ ແກ່ປະຊາຊົນ ໂດຍໄດ້ແບ່ງອອກເປັນ 3 ໄລຍະຄື:

    ໄລຍະທີ 1 ແມ່ນໄລຍະສຸກເສີນ ຊຶ່ງໄດ້ກອບກູ້ເອົາປະຊາຊົນຜູ້ປະສົບໄພໄປເຕົ້າໂຮມກັນມີທັງໝົດ 11 ຈຸດພັກເຊົາ (ໃນນີ້ພາຍໃນ ແຂວງແມ່ນ 9 ຈຸດ), ໄລຍະທີ 2 ແມ່ນການຈັດສັນທີ່ພັກຊົ່ວຄາວຊຶ່ງມີເຮືອນເຫຼັກ ແລະ ເຮືອນສໍາເລັດຮູບໃນ 5 ສູນ (ສູນຫາດ ຍາວ ບ້ານໃໝ່ 133 ຄອບຄົວ; ສູນດົງບາກ ບ້ານໃໝ່ 68 ຄອບຄົວ, ບ້ານທ່າຫີນມີ 221 ຄອບຄົວ ແລະ ຄຸ້ມໂຄກກ່ອງ 50 ຄອບ ຄົວ; ສູນດອນບົກ ບ້ານທ່າ ແສງຈັນ 126 ຄອບຄົວ; ສູນຕະມໍຢອດ ບ້ານຫີນລາດ 176 ຄອບຄົວ ແລະ ບ້ານຕະມໍຢອດ 45 ຄອບ ຄົວ; ສູນປິນດົງ ບ້ານສະໝອງໃຕ້ ມີ 90 ຄອບຄົວ); ໄລຍະທີ 3 ແມ່ນການຈັດສັນທີ່ຢູ່ອາໄສຖາວອນ ຊຶ່ງມີເຮືອນ 5 ປະເພດ, ມີ 841 ຫຼັງ, ໄດ້ຈັດສັນດິນປຸກສ້າງໃຫ້ແຕ່ລະຄອບຄົວ 20x40 ແມັດ ແລະ ຈັດສັນເນື້ອທີ່ທໍາການຜະລິດ 2.140 ເຮັກຕາ (ປັດຈຸບັນ ບຸກເບີກໄດ້ແລ້ວ 1.741 ເຮັກຕາ) ໂດຍໄດ້ແບ່ງຕາມແຮງງານສົມບູນຕົວຈິງຂອງແຕ່ລະຄອບຄົວ.

     ນອກຈາກນັ້ນ, ຍັງມີວຽກງານກໍ່ສ້າງພື້ນຖານໂຄງລ່າງເປັນຕົ້ນແມ່ນ: ຂົວ, ທາງ, ໂຮງຮຽນ, ໂຮງໝໍ, ສຸກສາລາ, ຫ້ອງການ ບ້ານ ພ້ອມສະໜອງເບ້ຍໄມ້ກິນ ໝາກ ແລະ ແນວພັນເຂົ້າໃຫ້ປະຊາຊົນ. ໃນຕອນບ່າຍຂອງມື້ດຽວກັນ, ທ່ານ ບຸນທອງ ຈິດມະນີ ພ້ອມຄະນະ ໄດ້ເຮັດວຽກຮ່ວມກັບຄະນະພັກ-ຄະນະນໍາ, ອົງການປົກຄອງແຂວງອັດຕະປື ໂດຍທ່ານຮອງເຈົ້າແຂວງໄດ້ລາຍງານສະ ພາບລວມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງຮອບດ້ານໃນ ໄລຍະ 3 ເດືອນຕົ້ນປີ ໂດຍສະເພາະ ແມ່ນການຈັດເກັບລາຍຮັບງົບປະມານໄດ້ທັງໝົດ 15,75 ຕື້ກີບ, ເທົ່າກັບ 12,88% ຂອງແຜນການປີ, ລາຍຮັບພາຍໃນແຂວງ ປະຕິບັດໄດ້ 11,58 ຕື້ກີບ, ເທົ່າກັບ 13,73% ຂອງແຜນການປີ, ມູນຄ່າການນໍາເຂົ້າ-ສົ່ງອອກ ປະຕິບັດໄດ້ 26,45 ລ້ານໂດລາ, ເທົ່າກັບ 22,07% ຂອງແຜນການ. ນອກຈາກນັ້ນ, ຍັງໄດ້ຮັບຟັງລາຍງານກ່ຽວກັບການກະກຽມກອງປະຊຸມໃຫຍ່ 3 ຂັ້ນຂອງອົງ ຄະນະພັກແຕ່ລະບັ້ນ ຊຶ່ງໄດ້ຈັດຕັ້ງເຊື່ອມຊຶມບັນດານິຕິກໍາກໍ່ສ້າງພັກ-ພະ ນັກງານໃຫ້ຄະນະພັກຮາກຖານ, ໜ່ວຍພັກຮາກຖານ ພ້ອມແຕ່ງຕັ້ງຄະນະຊີ້ນໍາເພື່ອຊີ້ນໍາ-ນໍາພາເປັນເອກະພາບ ແລະ ໄປລວງດຽວກັນ. ປັດຈຸບັນ ບັນດາຮາກຖານພັກອ້ອມຂ້າງ ແຂວງ ນັບທັງທະຫານ-ຕໍາຫຼວດ ມີທັງໝົດ 146 ຮາກຖານ ໄດ້ສໍາເລັດກອງປະຊຸມໃຫຍ່ແລ້ວຈໍານວນ 47 ຮາກຖານ ເທົ່າກັບ 32,19% ຊຶ່ງໃນຕໍ່ໜ້າຄະນະພັກ-ຄະນະນໍາແຂວງຈະໄດ້ສືບຕໍ່ຊີ້ນໍາ-ນໍາພາ ແລະ ຊຸກຍູ້ການກະກຽມດໍາເນີນກອງປະຊຸມໃຫຍ່ຮາກ ຖານພັກອ້ອມຂ້າງແຂວງ, ອ້ອມຂ້າງເມືອງໃຫ້ສໍາເລັດພາຍໃນປີ 2019.

   ໂອກາດນີ້, ທ່ານ ບຸນທອງ ຈິດມະນີ ໄດ້ໃຫ້ກຽດໂອ້ລົມ ແລະ ມີທິດຊີ້ນຳຕໍ່ຄະນະພັກ-ຄະນະນໍາຂອງແຂວງ, ເມືອງ ຕະຫຼອດຮອດ ພໍ່ແມ່ປະຊາຊົນ ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ຄະນະນຳແຂວງ, ເມືອງ ທີ່ໄດ້ມີຄວາມຕັດສິນໃຈສູງໃນການຊີ້ ນຳ-ນຳພາວຽກງານຮອບດ້ານ, ໂດຍສະເພາະແມ່ນຈັດຕັ້ງປະຕິບັດການຟື້ນຟູສະພາບການເປັນຢູ່ຂອງປະຊາຊົນຜູ້ໄດ້ຮັບຜົນກະ ທົບ ແລະ ຟື້ນຟູສະພາບແວດລ້ອມ-ສັງຄົມ ພາຍຫຼັງເຫດເຂື່ອນສັນນໍ້າ D ຂອງໂຄງການເຂື່ອນໄຟຟ້າເຊປຽນ-ເຊນຳ້ນ້ອຍແຕກ ພັງ ແລະ ໄດ້ເນັ້ນໃຫ້ຄະນະພັກ, ອົງການປົກຄອງແຕ່ລະຂັ້ນຈົ່ງພ້ອມກັນສືບຕໍ່ນຳພາ-ຊີ້ນຳການຈັດສັນພື້ນທີ່ທໍາການຜະລິດໃຫ້ ແກ່ປະຊາຊົນ, ປຸກລະດົມໃຫ້ປະຊາຊົນຫັນມາປູກພືດເປັນສິນຄ້າເພື່ອສ້າງລາຍຮັບໃຫ້ຄອບຄົວ, ສຸມໃສ່ການແກ້ໄຂຄວາມທຸກຍາກ ຂອງປະຊາຊົນໄປຄຽງຄູ່ກັບວຽກງານປ້ອງກັນຊາດປ້ອງກັນຄວາມສະຫງົບ ເພື່ອເຮັດໃຫ້ສັງຄົມມີຄວາມເປັນລະບຽບຮຽບຮ້ອຍ, ຮຽກຮ້ອງໃຫ້ຄະນະພັກ, ສະມາຊິກພັກ, ພະນັກງານ-ລັດຖະກອນຈົ່ງຕັ້ງໜ້າຈັດຕັ້ງປະຕິບັດວຽກງານຕາມໜ້າທີ່ຄວາມຮັບຜິດ ຊອບຂອງຕົນດ້ວຍຈັນຍາບັນ, ມີສະຕິຕໍ່ການຈັດຕັ້ງ, ເປັນເຈົ້າການເຄົາລົບ ແລະ ປະຕິບັດມະຕິ, ຄໍາສັ່ງ, ກົດລະບຽບຂອງພັກ, ກົດໝາຍ ແລະ ລະບຽບການຂອງລັດ ທັງສູ້ຊົນຈັດຕັ້ງປະຕິບັດວຽກງານ 3 ສ້າງໃຫ້ປະກົດຜົນເປັນຈິງ, ພ້ອມກັນນັ້ນ ກໍໃຫ້ສືບຕໍ່ ກະກຽມການດໍາເນີນກອງປະຊຸມໃຫຍ່ 3 ຂັ້ນຂອງອົງຄະນະພັກແຕ່ລະຂັ້ນໃຫ້ທ່ວງທັນຕາມເວລາທີ່ໄດ້ກໍານົດໄວ້.
(ແຫຼ່ງຂ່າວຂໍ້ມູນຈາກ: ໜັງສືພິມ ປະຊາຊົນ)