ພາສີແຂວງບໍ່ແກ້ວ ແກ້ໄຂລົດບໍ່ຖືກຕ້ອງ 5 ເດືອນ 191 ຄັນ

ຂປລ. ກອງກວດກາພາສີປະຈຳແຂວງບໍ່ແກ້ວ ທີ່ຂຶ້ນກັບກອງຄຸ້ມຄອງພາສີ I (ແຂວງຫລວງນ້ຳທາ-ແຂວງບໍ່ແກ້ວ) ໄດ້ຮັບການ ເອົາໃຈໃສ່ໃຫ້ທິດຊີ້ນຳຈາກອົງການປົກຄອງທ້ອງຖິ່ນຢ່າງເປັນປົກກະຕິ, ມີການປະສານສົມທົບກັບບັນດາຂະແໜງການທີ່ກ່ຽວ ຂ້ອງ ໃນການປະຕິບັດວຽກງານວິຊາສະເພາະຕາມພາລະບົດບາດ, ຕາມຂອບເຂດ, ສິດໜ້າທີ່ ແລະ ບັນດານິຕິກໍາຕ່າງໆຜ່ານ ການປະຕິບັດໜ້າທີ່ໃນໄລຍ 5 ເດືອນຕົ້ນປີ 2019 ສາມາດແກ້ໄຂຄະດີລົດນໍາເຂົ້າບໍ່ຖືກຕ້ອງໄດ້ທັງໝົດ 191 ຄັນ.

ໃນນັ້ນ, ເປັນລົດໃຫຍ່ 137 ຄັນ, ລົດຈັກ 54 ຄັນ ແລະ ປັບໃໝຕາມລະບຽບການ, ພ້ອມທັງເກັບລາຍຮັບເຂົ້າງົບປະມານແຫ່ງລັດ ບັນລຸເກືອບ 5 ຕື້ກີບ.
ທ່ານ ສັນສຸສິນ ວົງສາທອນ ຮອງຫົວໜ້າ ກອງຄຸ້ມຄອງພາສີ I ຫົວໜ້າ ກອງກວດກາພາສີປະຈຳແຂວງບໍ່ແກ້ວ ເປີດເຜີຍວ່າ: ຜ່ານມາກອງກວດກາພາສີປະຈຳແຂວງບໍ່ແກ້ວ ໄດ້ເອົາໃຈໃສ່ໃນການກວດກາສິນຄ້າ, ຕ້ານ ແລະ ສະກັດກັ້ນການຄ້າຂາຍເຖື່ອນ, ຕິດຕາມການເຄື່ອນຍ້າຍສິນຄ້າເຄື່ອງຂອງພາຍໃນຕາມລະບຽບກົດໝາຍທີ່ກຳນົດໄວ້, ປັດຈຸບັນມີພະນັກງານ-ເຈົ້າໜ້າທີ່ພາສີ ທັງໝົດ 9 ຄົນ, ຍິງ 1 ຄົນ, ພະນັກງານຊ່ວຍວຽກ 2 ຄົນ. ໃນປີ 2019 ໄດ້ຮັບຕົວເລກແຜນການໃນການຈັດເກັບລາຍຮັບເຂົ້າງົບ ປະມານແຫ່ງລັດ ຈໍານວນ 12 ຕື້ກີບ, ເພີ່ມຂຶ້ນຈາກ ປີ 2018 ປະມານ 9,25 ຕື້ກີບ, ເຊິ່ງໃນໄລຍະ 5 ເດືອນຜ່ານມາ ກອງກວດກາ ພາສີແຂວງບໍ່ແກ້ວໄດ້ສືບຕໍ່ແກ້ໄຂຄະດີລົດນໍາເຂົ້າບໍ່ຖືກຕ້ອງດັ່ງກ່າວສຳເລັດຜົນເປັນຢ່າງດີ.
ກອງກວດກາສີພາສີປະຈຳແຂວງບໍ່ແກ້ວ ສາມາດປະຕິບັດໜ້າທີ່ວິຊາສະເພາະດ້ວຍຄວາມສະດວກໃນການພົວພັນວຽກງານກັບຜູ້ ປະກອບການຕ່າາໆ. ນັບທັງ ສາງເກັບມ້ຽນສິນຄ້າເວລາມີການຢຶດສິນຄ້າ ແລະ ອຸປະກອນຮັບໃຊ້ ເປັນຕົ້ນ ແມ່ນລະບົບເອເລັກໂຕ ນິກເຊື່ອມຕໍ່ກັບກົມພາສີ, ນໍາໃຊ້ລະບົບ C2000 ການເຂົ້າຂໍ້ມູນທາງດ້ານພາສີເພື່ອສະຫລຸບລາຍງານໃຫ້ຂັ້ນເທິງ, ການເຂົ້າຂໍ້ມູນ ຫັກລົບແຜນເພື່ອຄຸ້ມຄອງການລົງທຶນທີ່ໄດ້ຮັບອະນຸຍາດການຍົກເວັ້ນ ພາສີອາກອນຈາກຄະນະຄຸ້ມຄອງການລົງທຶນຂັ້ນແຂວງ ເພື່ອປະກອບເອກະສານທາງດ້ານພາສີຢູ່ດ່ານພາສີບ່ອນນຳເຂົ້າ. ທີ່ສໍາຄັນແມ່ນການເອົາໃຈໃສ່ສຶກສາອົບຮົມວຽກງານແນວຄິດ- ການເມືອງແກ່ພະນັກງານ, ທັງມີການກວດກາ, ມີການແບ່ງຄວາມຮັບຜິດຊອບໃນການເວນຍາມຕ້ານການເຄື່ອນໄຫວສະກັດ ກັ້ນຕາມຈຸດຕ່າງໆທີ່ີມີຄວາມສ່ຽງໃນການລັກລອບສິນ ຄ້າ, ມີການແຕ່ງຕັ້ງໜ່ວຍສະເພາະກິດ ແລະ ບັນຫາອື່ນໆໄປພ້ອມກັນ ຈຶ່ງ ເຮັດໃຫ້ການເກັບລາຍຮັບບັນລຸຕາມແຜນການທີ່ວາງໄວ້.
ທ່ານ ສັນສຸສິນ ວົງສາທອນ ໃຫ້ຮູ້ອີກວ່າ: ປີ 2019 ກອງກວດກາພາສີແຂວງບໍ່ແກ້ວ ໄດ້ຮັບຕົວເລກເກັບລາຍຮັບເຂົ້າງົບປະມານ ລັດເພີ່ມຂຶ້ນຈາກປີ 2018 ສູງພໍສົມຄວນ ແລະ ເປັນສິ່ງທ້າທາຍທີ່ຈະຕ້ອງບຸກບືນສູ້ຊົນ, ພ້ອມກັນ ປະຕິບັດຢ່າງເຂັ້ມງວດ ແລະ ມີຄວາມຮັບຜິດຊອບສູງ ໂດຍສະເພາະສືບຕໍ່ແກ້ໄຂລົດນຳເຂົ້າບໍ່ຖືກຕ້ອງ, ນັບທັງລົດທີ່ຕິດປ້າຍລັດບໍລິຫານບຸກຄົນນຳໃຊ້ທີ່ມີຢູ່ໃນ ສະຖິຕິຂອງແຂວງ ແລະ ສືບຕໍ່ແກ້ໄຂລົດທີ່ນຳເຂົ້າມາຮັບໃຊ້ເຂດເສດຖະກິດ ພິເສດສາມລ່ຽມຄຳທີ່ມີໃນບັນຊີ, ປະສານສົມທົບກັບ ທຸກພາກສ່ວນທີ່ກ່ຽວຂ້ອງເພື່ອເຮັດໜ້າທີ່ວຽກງານຕ້ານ ແລະ ສະກັດກັ້ນການລັກລອບສິນຄ້າໜີພາສີໃຫ້ມີຄວາມເຂັ້ມແຂງ. ເພື່ອເຮັດໃຫ້ການຈັດເກັບລາຍຮັບເຂົ້າງົບປະມານໄດ້ຕາມແຜນການ ຫລື ລື່ນແຜນການ.
 (ແຫຼ່ງຂໍ້ມູນຈາກ: ໜັງສືພິມ ປະເທດລາວ)