ທ່ານຮອງນາຍົກລັດຖະມົນຕີຕິດຕາມສະພາບການຟື້ນຟູໄພພິບັດຢູ່ເມືອງສະໜາມໄຊ

ຂປລ. ວັນທີ 2 ພະຈິກ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດແກ້ໄຂໄພພິບັດລະດັບຊາດ ພອ້ມດວ້ຍຄະນະໄດ້ລົງຢຽ້ມຢາມ ແລະ ຕິດຕາມຄວາມຄືບໜ້າ ການຟື້ນຟູຊີວິດ ການເປັນຢູ່ຂອງປະຊາຊົນ ຜູ້ທີ່ໄດ້ຮັບຜົນກະທົບ ຈາກໄພພິບັດທີ່ເກີດຂຶ້ນ ຢູ່ທີ່ເມືອງສະໜາມໄຊ, ແຂວງອັດຕະປື, ໂດຍການໃຫ້ກຽດຕ້ອນຮັບຂອງ ທ່ານ ສຸກສະໄໝ ຈັນທະມາດ ຮອງເຈົ້າແຂວງອັດຕະປື ພ້ອມດ້ວຍອໍານາດການປົກເມືອງ ແລະ ປະຊາຊົນເມືອງສະໜາມໄຊ ໃຫ້ການຕ້ອນຮັບຢ່າງເອົາອຸ່ນ.

ໂອກາດດັ່ງກ່າວ ທ່ານ ສອນໄຊ ສີພັນດອນ ພ້ອມດ້ວຍຄະນະ ໄດ້ຢ້ຽມຢາມໂຄງການການກໍ່ສ້າງບ້ານພັກຊົ່ວຄາວ ຈຸດບ້ານຕະມໍຢອດ ເພື່ອຍົກຍ້າຍຈັດສັນປະຊາຊົນຢູ່ຍ້ານຫີນລາດ ເຂົ້າມາຢູ່ຊົວຄາວ ເພື່ອລໍຖ້າການຈັດສັນບ້ານພັກທີ່ຖາວອນ ໃຫ້ແກ່ເຂົາເຈົ້າໃນຕໍ່ໜ້າ, ຈຸດດັ່ງກ່າວ ຕາມແຜນແມ່ນຈະບຸກເຮືອນພັກຊົວຄາວທັງໜົດ 196 ຫຼັງ, ປະຈຸບັນນີ້ ການປຸກສ້າງແມ່ນໄດ້ສໍາເລັດໄປແລ້ວ 50 ຫຼັງ ຄາດວ່າຈະສາມາດດໍາເນີນການປຸກສ້າງໃຫ້ສໍາເລັດ ແລະ ຍົກ ຍ້າຍ ປະຊາຊົນບ້ານຫີີນລາດເຂົ້າໄປຢູ່ ໃນທ້າຍເດືອນພະຈິກນີ້. ເຮືອນຊົວຄາວດັ່ງກ່າວ ເປັນເຮືອນຮ້ານເຫຼັກສໍາເລັດຮູບ ເປັນລະບົບຄົບຊຸດ ລວມມີ ໄຟຟ້າ, ພັດລົມ, ລະບົບນໍ້າສະອາດ, ວິດຖ່າຍ ຢູ່ແຕ່ລະຫຼັງ ແລະ ອື່ນໆ.
ຈາກນັ້ນທ່ານຮອງນາຍົກລັດຖະມົນຕີ ພ້ອມດ້ວຍຄະນະໄດ້ໄປຢຽ້ມຢາພໍ່ແມ່ປະຊາຊົນຢູ່ທີ່ ພັກ ຊົ່ວຄາວຢູ່ຈຸດບ້ານປີ່ນດົງ ທີ່ໄດ້ນໍາພໍ່ແມ່ປະຊາຊົນບ້ານສະໜອງໃຕ້ ເຂົ້າມາຢູ່ຊົ່ວຄາວ ຈຸດດັ່ງກ່າວມີທັງໝົດ 89 ຄອບຄົວ, ມີ 330 ຄົນ, ນອກ ນີ້ທ່ານຮອງນາຍົກລັດຖະມົນຕີ ຍັງໄດ້ໄປຢຽ້ມຢາມເບີ່ງພໍ່ແມ່ປະຊາຊົນຢູ່ເຂດບ້ານຈັດສັນຊົ່ວຄາວ ເຂດຈຸດບ້ານດົງບາກ ປະຈຸບັນ ຈຸດພັກເຊົາຊົ່ວຄາວດັ່ງກ່າວໄດ້ສຳເລັດການກໍ່ສ້າງເຮືອນພັກຊົ່ວຄາວຈຸດດົງບາກ ຈຳນວນ 45 ຫຼັງ, ມີ 306 ຫ້ອງ, ໄດ້ ຍ້າຍປະຊາຊົນທັງ ໝົດ ບ້ານທ່າຫີນ 221 ຄອບຄົວ, ບ້ານໃໝ່ 63 ຄອບຄົວ. ລວມແລ້ວໄດ້ຍ້າຍປະຊົນເຂົ້າ 2 ສູນ ຄື: ຈຸດບ້ານຫາດຍາວ ແລະ ຈຸດບ້ານດົງບາກ ທັງ ໝົດຈຳນວນ 457 ຄອບຄົວ.
ໃນການລົງຢຽ້ມຢາມໃນຄັ້ງນີ້ ທ່ານ ສອນໄຊ ສີພັນດອນ ຍັງໄດ້ມອບລົດບັນທຸກຂະໜາດນ້ອຍ ຈໍານວນ 6 ຄັນ ໃຫ້ແກ່ອໍານາດການປົກຄອງບ້ານໃນ 6 ບ້ານ ທີ່ໄດ້ຮັບຜົນກະທົບ ແລະ 1 ຄັນໃຫ້ແກ່ອໍານາດການປົກຄອງເມືອງສະໜາມໄຊ ເພື່ອນໍາໃຊ້ເຂົ້າໃນການວຽກງານການພາຍໃນບ້ານ ແລະ ຂົນສົ່ງເຄື່ຶອງຊ່ວຍເຫຼືອບັນເທົາທຸກໃຫ້ປະຊາຊົນ. ລວມມູນຄ່າທັງໝົດ 1 ຕື້ກວ່າກີບ.
ພາຍຫຼັງທີ່ສໍາເລັດການລົງຕິດຕາມຄວາມຄືບໜ້າ ໃນການຟື້ນຟູໄພພິບັດຢູ່ທີ່ເມືອງສະໜາມໄຊແລ້ວ, ໃນຕອນເຊົ້າຂອງວັນທີ 3 ພະຈິກ 2018, ທ່ານ ສອນໄຊ ສີພັນດອນ ໄດ້ສືບຕໍ່ໃຫ້ກຽດໂອ້ລົມຕໍ່ອໍານາດການປົກຄອງແຂວງອັດຕະປື.
ກ່ອນອື່ນ ທ່ານ ສຸກສະໄໝ ຈັນທະມາດ ຮອງເຈົ້າແຂວງໆອັດຕະປື ໄດ້ລາຍງານ ໃຫ້ຊາບກ່ຽວກັບການຈັດສັນທີ່ພັກຊົ່ວຄາວໃຫ້ຊາບວ່າ: ມາຮອດປະຈຸບັນ ການຈັດສັນທີ່ພັກຊົ່ວຄາວ ໃຫ້ຜູ້ປະສົບໄພໃນແຕ່ລະຈຸດ ສາມາດປະຕິບັດໄດ້ດັ່ງນີ້: ຈຸດດົງບາກ: ເນື້ອທີ່ 120 ເຮັກຕາ; ຈຸດຄຸ້ມດອນບົກ: ເນື້ອທີ່ 60 ເຮັກຕາ ມາຮອດປະຈຸບັນສາມາດປະຕິບັດສຳເລັດແລ້ວ 100%, ຈຸດຄຸ້ມປິນດົງ: ເນື້ອທີ່ 56 ເຮັກຕາ ມາຮອດປະຈຸບັນສາມາດປະຕິບັດໄດ້ 53% ແລະ ຈຸດຄຸ້ມຕໍມະຢອດ: ເນື້ອທີ່ 60 ມາ ຮອດປະຈຸບັນສາມາດປະຕິບັດໄດ້ 70%; ສໍາລັບວຽກງານການຊອກຄົ້ນຜູ້ສູນຫາຍ ຢູ່ພາກສະໜາມ: ມາຮອດປະຈຸບັນ ສາມາດຊອກຄົ້ນໄດ້ ທັງໝົດ 38 ສົບ ແລະ ເສຍຊີວິດຢູ່ ໂຮງໝໍ 6 ຄົນ ລວມຈໍາຜູ້ເສຍຊີວິດທັງໝົດ 44 ສົບ. ສໍາ ລັບທິດທາງໃນການຟື້ຟູ: ການຟື້ນຟູໄລຍະສັ້ນ: ນຳພາປະຊາຊົນອານາໄມພື້ນທີ່ ເພື່ອຈັດສັນຍົກຍ້າຍເຂົ້າຢູ່, ສະໜອງແນວພັນພືດ, ສັດໃຫ້ປະຊາຊົນເພື່ອໃຫ້ມີ ວຽກເຮັດງານທຳ; ສ້ອມແປງແຄ້ມພັກຊົ່ວຄາວ ຢູ່ ມສ ສະໜາມໄຊ ເພື່ອຍ້າຍ ນັກຮຽນຈາກເຕັນເຂົ້າຮຽນ. ສຸມໃສ່ການກໍ່ສ້າງຂົວ 4 ແຫ່ງໃຫ້ສໍາເລັດ ແລະ ກະ ກຽມ ລົງມືກໍ່ສ້າງຂົວເບເລ 5 ແຫ່ງ.ການຟື້ນຟູໄລຍະກາງ: ສຸມໃສ່ວຽກງານຕັດຕາຜ້າຜັງບ້ານທັງ 4 ຈຸດໃຫ້ສໍາເລັດ ແລະ ຈັດສັນທີ່ຢູ່ທໍາກິນໃຫ້ປະຊາຊົນ ເປັນຕົ້ນ ການປູກຝັງ-ລ້ຽງສັດ ແລະ ໂຮງຮຽນ, ໂຮງໝໍ, ສຸກສາລາ ແລະ ສິ່ງອຳນວຍຄວາມສະດວກອື່ນໆ; ສັງລວມໂຄງການພັດທະນາພື້ນຖານໂຄງລ່າງຂົວ-ທາງ ໃນເບື້ອງຕົ້ນ: ເສັ້ນທາງ 9004 ຫາແຍກ 18A, ຂົວ 5 ແຫ່ງ, ທາງຊົນນະບົດ ແລະ ວຽກ ກໍ່ສ້າງຜັງກຸ່ມບ້ານຈັດສັນ ໃໝ່. ການຟື້ນຟູໄລຍະຍາວ: ວຽກສ້າງຜັງກຸ່ມບ້ານ, ສ້າງໂຮງຮຽນມັດທະຍົມຕອນຕົ້ນ ເຂດຈັດສັນດົງບາກ ເປັນໂຮງຮຽນ ມສ ເພື່ອຮັບຮອງການເພີ່ມຂຶ້ນ ຂອງຊັ້ນມັດທະຍົມຕອນຕົ້ນ; ສ້າງຫໍພັກ ນັກ ຮຽນມັດທະຍົມຕົ້ນທັງ 4 ແຫ່ງ ໃຫ້ນັກຮຽນທີ່ຢູ່ຫ່າງໄກທີ່ບໍ່ສາມາດທຽວ ຮຽນປະຈຳວັນໄດ້; ອອກໃບຕາດິນ, ສ້າງຈິດສຳນຶກກ່ຽວກັບການຖິ້ມຂີ້ເຫຍື່ອ ແລະ ຮັກສາສະພາບແວດລ້ອມ, ຄຸ້ມຄອງ ແລະ ນຳໃຊ້ສ້າງຈຸດວັດແທກນໍ້າ-ອຸຕຸ; ສະໜອງ ລະບົບໄຟຟ້າ ເຂົ້າຮັບ ໃຊ້ເຂດທີ່ພັກຖາວອນ 4 ຈຸດ (ດົງບາກ, ດອນບົກ, ປີ່ນດົງ, ຕະມໍຢອດ), ປັບປຸງລະບົບໄຟຟ້າເມືອງ ສະໜາມໄຊ ເພື່ອຮັບປະກັນສະຖຽນລະພາບ, ຕິດຕັ້ງລະບົບໄຟເຍືອງທາງເທດສະບານເມືອງສະໜາມໄຊ (ລະບົບໂຊລາເຊວ). ສ້າງສູນ ຂໍ້ມູນ ຂ່າວ ສານ ແລະ ການສື່ສານ ຟື້ນຟູຄຸນນະພາບຊີວິດການເປັນຢູ່ ຂອງຜູ້ປະສົບໄພ ຢູ່ເຂດດົງບາກ.
ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍ ຕໍ່ອໍານາດການປົກຄອງແຂວງອັດຕະປື ແລະ ໜ່ວຍງານຕ່າງໆ ທີ່ໄດ້ເອົາໃຈໃສ່ແກ້ໄຂບັນຫາໄພພິບັດ ທີ່ເກີດຂຶ້ນຢູ່ທີ່ເມືອງສະໜາມໄຊ ໃນໄລຍະຜ່ານມາ. ພ້ອມດຽວກັນນີ້, ທ່ານ ສອນໄຊ ສີພັນດອນ ໄດ້ເນັ້ນໜັກໃຫ້ອໍານາດການປົກ ຄອງແຂວງອັດຕະປື ໃນຕໍ່ໜ້າໃຫ້ສຸມໃສ່ວຽກງານຍົກຍ້າຍຈັດສັນ ປະຊາຊົນຜູ້ທີ່ຖືກຜົນກະທົບ ເພື່ອເຂົ້າໄປຢູ່ທີ່ພັກເຊົາຊົ່ວຄາວໃຫ້ສໍາເລັດໂດຍໄວ, ເອົາໃຈໃສ່ ບຸກເບີກເນື້ອທີ່ທໍາການຜະລິດ, ເນື້ອທີ່ບຸກສ້າງທີ່ພັກຖາວອນ; ເອົາໃຈໃສ່ວຽກງານໂຄສະນາເຜີຍແຜ່ຄວາມຄືບໜ້າ ໃນການແກ້ໄຂຢູ່ເມືອງສະໜາມໄຊ ໃຫ້ສັງຄົມໄດ້ຮັບຮູ້ ແລະ ເຂົ້າໃຈຢ່າງເປັນປົກກະຕິ; ເອົາໃຈໃສ່ຕິດຕາມ ສະພາບ ຊີວິດ ການເປັນຢູ່ຂອງປະຊາຊົນ ຢູ່ທີ່ສູນພັກ ເຊົາຊົ່ວຄາວ ເປັນປົກກະຕິ; ເອົາໃຈໃສ່ເຕົ້າໂຮມຄວາມສາມັກຂອງປະຊາຊົນພາຍໃນສູນຕ່າງໆ ພ້ອມທັງເອົາໃຈໃສ່ວຽກງານສຶກສາອົບຮົມ ການເມືອງແນວຄິດ, ເຜີຍແຜ່ແນວທາງນະໂຍບາຍຂອງ ພັກ-ລັດ ໃຫ້ ປະຊາຊົນໄດ້ຮັບຮູ້ ແລະ ເຂົ້າໃຈ ເປັນຕົ້ນ ນະໂຍບາຍກ່ຽວກັບໂພສະນາການ, ການສ້າງບ້ານພັດທະນາ, ວຽກງານ 3 ສ້າງ, ການຊົດເຊີຍ, ເວນຄືນ ແລະ ອື່ນໆ; ເອົາໃຈໃສ່ຈັດຕັ້ງການຜະລິດຂອງປະຊາຊົນ, ການນໍາໃຊ້ທ່າແຮງກັບທີ່, ສໍາ ລັບວຽກງານການສຶກສາ ໃຫ້ເອົາໃຈໃສ່ປັບປຸງການຮຽນການສອນໃຫ້ເປັນປົກກະຕິ