ປະກາດປິດການຊອກຄົ້ນຜູ້ສູນຫາຍຢູ່ອັດຕະປື ໄລຍະທີ 1 ແຕ່ຍັງຮັກສາກໍາລັງເພື່ອສືບຕໍ່ຊອກຫາຕາມການແຈ້ງຂ່າວ

ຂປລ. ຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ໄດ້ປະກາດປິດການຊອກຄົ້ນຜູ້ສູນຫາຍ ຈາກເຫດໄພພິບັດທີ່ເກີດຂຶ້ນຢູ່ເມືອງ ສະໜາມໄຊ ແຂວງ ອັດຕະປື ໃນວັນທີ 24 ກໍລະກົດ 2018 ໄລຍະທີ 1 ເພື່ອວາງແຜນສືບຕໍ່ຊອກຄົ້ນໃນໄລຍະຕໍ່ໄປ, ແຕ່ຍັງຮັກສາກໍາລັງທະ ຫານ, ພະຫະນະ ແລະ ເຄື່ອງມືຊອກຄົ້ນ ເພື່ອດໍາເນີນພາລະກິດ ການຊອກຄົ້ນຕໍ່ໄປ ຕາມການແຈ້ງຂ່າວ, ມີເບາະແສ ແລະ ການສະເໜີຂອງປະຊາຊົນ.

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດແກ້ໄຂໄພພິບັດລະດັບຊາດ ກ່າວໃນພິທີຖະແຫລງຂ່າວ ໃນວັນທີ 15 ຕຸລາ 2018 ນີ້ວາ: ພາຍຫລັງເຫດການເກີດຂຶ້ນ ແຕ່ວັນທີ 24 ກໍລະກົດ 2018 ຈົນເຖິງປັດຈຸບັນ, ກອງທັບປະຊາຊົນລາວ ກໍໄດ້ນໍາເອົາກຳລັງຂອງຕົນ ຈໍານວນ 583 ສະຫາຍ ຈາກກະຊວງປ້ອງກັນປະເທດ, ກອງພັນ 11 ຂອງກອງພົນທີ 5, ກອງພັນ 19 ທະຫານແຂວງອັດຕະປື, ທະຫານເມືອງ ສະໜາມໄຊ ແລະ ໜ່ວຍງານກູ້ໄພ 1623 ຂອງລາວ ຕະລຸມບອນເຂົ້າພື້ນທີ່ ເກີດໄພພິບັດ ເພື່ອຊ່ວຍເຫລືອກອບກູ້ ເອົາປະຊາຊົນອອກຈາກເຂດໄພພິບັດ ໄປສູ່ເຂດປອດໄພ ແລະ ສືບຕໍ່ຊອກຄົ້ນເກັບກູ້ຜູ້ສູນຫາຍ.
ນອກຈາກນັ້ນ, ກໍາລັງພົນ, ພາຫະນະ ແລະ ເຄື່ອງມືອື່ນໆ ຈາກຂະແໜງການ ແລະ ປະເທດເພື່ອນມິດ ກໍໄດ້ເຂົ້າມາຊ່ວຍໃນການຊອກຄົ້ນເຊັ່ນ: ສສ ຫວຽດນາມ ກໍເອົາກໍາລັງທະຫານມາ 2 ຮອບ (ຮອບທີ 1 ແມ່ນເອົາແພດມາ ແລະ ຮອບທີ 2 ແມ່ນເອົາກໍາລັງມາຊ່ວຍຊອກຄົ້ນ), ສປ ຈີນ ກໍໄດ້ສົ່ງກໍາລັງ 30 ຄົນ ມາຊ່ວຍຊອກຄົ້ນ, ປະເທດສິງກະໂປ ໄດ້ນໍາເອົາກໍາລັງພົນ 31 ຄົນ ໃນນັ້ນ ຊຸດທີ 1 ຈໍານວນ 14 ຄົນ ແລະ ຊຸດທີ 2 ຈໍານວນ 17 ຄົນ ແລະ ນໍາໃຊ້ເຄື່ອງມືທີ່ທັນສະໄໝ ເຂົ້າໃນການສະແກນ (Scan) ແລະ ໝາວິຊາສະເພາະ, ເຊັ່ນກັນກັບກະຊວງປ້ອງກັນ ຄວາມສະຫງົບ ຂອງລາວເຮົາ ກໍນໍາກໍາລັງພົນຂອງຕົນເອງ ແລະ ໝາຮັບໃຊ້ວິຊາສະເພາະເຂົ້າໄປຊອກຄົ້ນ.
ສະພາບການຊອກຄົ້ນຜູ້ສູນຫາຍ ເຊິ່ງເລີ່ມແຕ່ ວັນທີ 24 ກໍລະກົດ ເຖິງ ວັນທີ 31 ສິງຫາ 2018 ເຕັມໄປດ້ວຍຄວາມຍາກລໍາບາກ, ຜ່ານຜ່າຄວາມຫຍຸ້ງຍາກ ແລະ ອຸປະສັກ ນາໆປະການ ເພາະວ່າ ໄດ້ດໍາເນີນໄປໂດຍການຍ່າງ ເປັນໜ້າກະດານ ຂອງໜ່ວຍງານກູ້ໄພ ຜ່ານຂີ້ຕົມ, ດິນໂຄນທີ່ແຫລວ ແລະ ເລິກ; ຜ່ານຊາກຕົ້ນໄມ້, ຊາກເຮືອນເພພັງ, ຂີ້ເຫຍື້ອ ແລະ ສິ່ງເສດເຫລືອຕ່າງໆ ທີ່ນໍ້າອູ້ມມາຖົມ.
ດັ່ງນັ້ນ, ການຊອກຄົ້ນຈຶ່ງໄດ້ດໍາເນີນ ໄປຫລາຍຫລົບຫລາຍຕ່າວ, ນໍາໃຊ້ກໍາລັງພົນເປັນໜ້າກະດານ, ນໍາໃຊ້ເຄື່ອງມື ທີ່ທັນສະໄໝເຂົ້າໃນການ Scan ແລະ ນຳໃຊ້ໝາວິຊາສະເພາະ ທີ່ໄດ້ຮັບການຝຶກແອບມາ, ແຕ່ກໍບໍ່ສາມາດຊອກຄົ້ນໃຫ້ເຫັນໄດ້ ຍ້ອນວ່າມີຂີ້ຕົມຫລາຍ, ດິນໂຄນ, ນໍ້າເລິກ ແລະ ບາງບ່ອນ ກໍບໍ່ສາມາດເຂົ້າເຖິງໄດ້ເຊັ່ນ: ຂອບເຂດ ໜອງອິນທີ ທີ່ຢູ່ລະຫວ່າງບ້ານ ປິນດົງ ແລະ ບ້ານ ຕະມໍຢອດ ຊຶ່ງເປັນເຂດນໍ້າໜອງເລິກ ທີ່ເຕັມໄປດ້ວຍ ຂີ້ຕົມ, ດິນໂຄນທີ່ແຫລວ. ອີກດ້ານໜຶ່ງ ໃນວັນທີ 13-14 ເດືອນສິງຫາ 2018 ຝົນຕົກແຮງຕິດຕໍ່ກັນ ເຮັດໃຫ້ນໍ້າເຊປຽນຂຶ້ນຖ້ວມບໍລິເວນໄພພິບັດຮອບ 2, ນໍ້າຖ້ວມເປັນພື້ນທີ່ກວ້າງ, ຖ້ວມຮອດສູນບັນຊາການ ຊອກຄົ້ນຢູ່ບ້ານໃຫມ່. ດັ່ງນັ້ນ, ວັນທີ 15 ສິງຫາ 2018 ຈຶ່ງໄດ້ຖອນ ກໍາລັງຊອກຄົ້ນດ້ວຍເຮືອ ມາຢູ່ສູນບັນຊາການ ເມືອງສະໜາມໄຊ. ສະພາບການຊອກຄົ້ນ ທີ່ມີຄວາມຫຍຸ້ງຍາກຫລາຍ ຄືແນວນັ້ນ ເຮັດໃຫ້ກໍາລັງທະຫານ ຂອງພວກເຮົາ ໄດ້ຮັບບາດເຈັບ ຍ້ອນຢຽບສັງກະສີ, ເຫລັກຕະປູ, ເສດໄມ້ທີ່ເປັນສ້ຽນ ແລະ ໜາມ, ເກີດພະຍາດຄັນຄາຍ ແລະ ຕີນເປື່ອຍ ຈຳນວນ 56 ສະຫາຍ.
ດັ່ງນັ້ນ, ມາຮອດວັນທີ 31 ສິງຫາ 2018 ກອງທັບປະຊາຊົນລາວ ຈຶ່ງໄດ້ຕົກລົງເປັນເອກະພາບ ແລະ ຖະແຫລງຂ່າວຮ່ວມກັບ ເຈົ້າເມືອງ ສະໜາມໄຊ ກ່ຽວກັບການປິດ ການຊອກຄົ້ນໄລຍະທີ 1 ໂດຍຫັນປ່ຽນວິທີການຊອກຄົ້ນຄື ຍັງຮັກສາກໍາລັງທະຫານ ຈາກກອງບັນຊາການທະຫານ ເມືອງສະໜາມໄຊ ແລະ ປະກອບພະຫະນະ, ເຄື່ອງມືຊອກຄົ້ນ ເພື່ອດໍາເນີນພາລະກິດ ການຊອກຄົ້ນຕໍ່ໄປ ຕາມການແຈ້ງຂ່າວ, ມີເບາະແສ ແລະ ການສະເໜີຂອງປະຊາຊົນ; ດ້ວຍເຫດນັ້ນຈຶ່ງໄດ້ ຖອນກໍາລັງຫລວງອອກຈາກພື້ນທີ່ຊອກຄົ້ນ ເພື່ອວາງແຜນການ ໃນການ ຊອກຄົ້ນ ໃນໄລຍະທີ 2 ດ້ວຍການນຳໃຊ້ ກໍາລັງຫລວງ 250 ສະຫາຍ ເພື່ອໄປປະຕິບັດໜ້າທີ່ ຊ່ວຍຄະນະສະເພາະກິດ ໃນການຈັດສັນພື້ນທີ່ ແລະ ຊ່ວຍປຸກສ້າງທີ່ພັກອາໄສຊົ່ວຄາວ ແລະ ຖາວອນໃຫ້ປະຊາຊົນ ໃນຕໍ່ໜ້າ ແລະ ກຽມພ້ອມປະ ຕິບັດໜ້າທີ່ການຊອກຄົ້ນ ຕາມຄວາມຕ້ອງການ ແລະ ຕາມການສະເໜີ ຂອງກອງບັນຊາການທະຫານເມືອງສະຫນາມໄຊ.
ເພື່ອຕອບແທນຄຸນງາມຄວາມດີ ຂອງບັນດານາຍ ແລະ ພົນທະຫານ ທີ່ໄດ້ປະກອບສ່ວນໃນການຊອກຄົ້ນຄັ້ງນີ້ ພັກ-ລັດຖະບານ ເວົ້າລວມ, ເວົ້າສະເພາະ ຄະນະນຳກະຊວງປ້ອງກັນປະເທດ ກໍໄດ້ປະຕິບັດ ນະໂຍບາຍຍ້ອງຍໍເຂົາເຈົ້າຢ່າງສົມກຽດ.