ມອບ-ຮັບການປັບປຸງບູລະນະ-ສ້ອມແປງຖ້ຳແມ່ຍິງລາວຮັກຊາດ

ຂປລ. ເມື່ອບໍ່ດົນມານີ້, ສູນກາງສະຫະະພັນແມ່ຍິງລາວ ສົມທົບກັບ ແຂວງຫົວພັນ ຈັດພິທີ ມອບ-ຮັບການປັບປຸງບູລະນະ, ສ້ອມແປງຖ້ຳແມ່ຍິງລາວຮັກຊາດ ຢູ່ເມືອງວຽງໄຊ ແຂວງຫົວພັນ ພາຍ ຫລັງເລີ່ມລົງມືຈັດຕັ້ງ ປະຕິບັດມາແຕ່ຕົ້ນປີ 2012 ແລະ ສຳເລັດໃນທ້າຍປີ 2018 ນຳໃຊ້ທຶນທັງໝົດ 271 ລ້ານກວ່າກີບ.

ໂຄງການປັບປຸງບູລະນະ, ສ້ອມແປງຖ້ຳແມ່ຍິງລາວຮັກຊາດ ແມ່ນທຶນສົມທົບ-ຊ່ວຍເຫລືອ ຈາກຫລາຍພາກສ່ວນນັບທັງສູນກາງ, ກະຊວງ, ອົງການ, ບັນດາແຂວງ ແລະ ເມືອງຂອບເຂດທົ່ວປະເທດ ເພື່ອປະກອບສ່ວນຊື້ຜະລິດຕະພັນ ຂອງສູນກາງສະຫະພັນແມ່ຍິງລາວ ໂດຍແມ່ນສະຫະພັນແມ່ຍິງແຂວງຫົວພັນ ສົມທົບກັບເມືອງວຽງໄຊ ຈັດຕັ້ງປະຕິບັດ, ໃນນັ້ນບັນດາໜ້າວຽກທີ່ສຳເລັດແລ້ວມີຄື: ປູກຕົ້ນ ອ້ອຍນາງນີ ຈຳນວນ 112 ຕົ້ນ, ປູແຮ່ໃສ່ທາງຍ່າງຂຶ້ນຖໍ້າ ແລະ ເດີ່ນຕໍ່ໜ້າຖ້ຳ, ສ້ອມແປງເຮືອນຄົວ, ປູກດອກໄມ້, ຕົ້ນໄມ້ປະດັບປະດາໃສ່ບໍລິເວນຖໍ້າ, ທາສີກຳແພງຖໍ້າ, ປະຕູເຂົ້າຖໍ້າ ພ້ອມນີ້ຍັງ ມີວຽກ ຄົງຄ້າງທີ່ຈະໄດ້ສືບຕໍ່ປັບປຸງກໍ່ສ້າງ ເປັນຕົ້ນແມ່ນ ຕໍ່ໄຟຟ້າເຂົ້າໃນຖໍ້າ, ກໍ່ສ້າງຫ້ອງນ້ຳສາທາລະນະ, ປັບປຸງເດີ່ນບຸ້ນ ແລະ ເດີ່ນບານສົ່ງ, ປັບປຸງ-ຈັດວັດຖຸພັນໃສ່ພາຍໃນຖໍ້າ ແລະ ອື່ນໆ.