ລັດຖະມົນຕີກະຊວງ ຖວທ ຕ້ອນຮັບປະທານສູນແລກປ່ຽນມິດຕະພາບສາກົນ ສປ ຈີນ

ຂປລ. ໃນວັນທີ 9 ຕຸລາ 2018 ທີ່ນະຄອນຫລວງວຽງຈັນ, ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ເຄີ່ຈື້ຫົວ ປະທານສູນແລກ ປ່ຽນ ມິດຕະພາບສາກົນ ແຫ່ງ ສປ ຈີນ, ເນື່ອງໃນໂອກາດມາຢ້ຽມຢາມ ແລະ ແລກປ່ຽນ ກ່ຽວກັບວຽກງານການຮ່ວມມື ໃນການຊ່ວຍເຫລືອ ສປປ ລາວ ຈາກຜົນກະທົບ ຈາກໄພທຳມະຊາດທີ່ຜ່ານມາ.

ໃນໂອກາດນີ້, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ທ່ານ ເຄີ່ຈື້ຫົວ ທີ່ໄດ້ນຳພາຄະນະມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນອັນສຳຄັນ ເຂົ້າໃນການຮັດ ແໜ້ນ, ສົ່ງເສີມສາຍພົວພັນມິດຕະພາບ ແລະ ການຮ່ວມມື ໃນຊະຕາກຳດຽວກັນ ທີ່ຕັດແຍກກັນບໍ່ໄດ້ ລະຫວ່າງ ສອງປະເທດ ລາວ ແລະ ຈີນ.
ໃນໂອກາດດຽວກັນ, ທ່ານ ເຄີ່ຈື້ຫົວ ກໍໄດ້ສະແດງຄວາມຂອບໃຈຕໍ່ ທ່ານ ບໍ່ແສງຄຳ ວົງດາລາ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບຢ່າງອັນອົບອຸ່ນໃນຄັ້ງນີ້, ພ້ອມທັງໄດ້ແຈ້ງຈຸດປະສົງໃນການມາຢ້ຽມຢາມຄັ້ງນີ້ ໃຫ້ທ່ານລັດຖະມົນ ຕີຊາບ.