ລັດຖະມົນຕີ ກະຊວງ ຖວທ ຕ້ອນຮັບປະທານສະມາຄົມມິດຕະພາບເຢຍລະມັນ-ລາວ

ຂປລ. ວັນທີ 1 ຕຸລາ 2018, ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ກຽດຕ້ອນຮັບ ທ່ານ ລຸດວິກ ນອຍເບີ (Ludwig Neuber) ປະທານສະມາຄົມມິດຕະພາບ ເຢຍລະມັນ-ລາວ, ພ້ອມດ້ວຍຄະນະ ໃນໂອກາດເດີນທາງ ມາຢ້ຽມຢາມ ແລະ ເຮັດວຽກ ຢູ່ ສປປ ລາວ.

ໃນໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ໄດ້ກ່າວສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ທ່ານ ລຸດວິກ ນອຍເບີ ທີ່ໄດ້ນຳພາຄະນະ ເດີນທາງມາຢ້ຽມຢາມ ສປປ ລາວ ໃນຄັ້ງນີ້, ອັນເປັນ ການປະກອບ ສ່ວນສໍາຄັນ ເຂົ້າໃນການເພີ່ມທະວີ ແລະ ຮັດແໜ້ນສາຍ ພົວພັນຮ່ວມມື ລະຫວ່າງສອງຊາດ ລາວ-ເຢຍລະມັນ ໃຫ້ໄດ້ຮັບການພັດທະນາ ແລະ ສືບຕໍ່ ໃຫ້ການສະໜັບສະໜູນ, ຊ່ວຍເຫລືອເຊິ່ງກັນ ແລະ ກັນ ເວົ້າລວມ, ເວົ້າສະເພາະ ແມ່ນການພົວພັນຮ່ວມມື ທາງດ້ານຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ໂດຍສະເພາະ ວຽກງານປີທ່ອງທ່ຽວລາວ 2018 ເພື່ອດຶງດູດ ແລະ ເຜີຍແຜ່ ໃຫ້ຊາວເຢຍລະມັນ ຮັບຮູ້ປະເທດລາວຢ່າງກວ້າງ ຂວາງ, ເຊິ່ງໃນແຕ່ລະປີ ສປປ ລາວ ໄດ້ຈັດງານວາງສະແດງທ່ຽວທ່ອງ ITB ທີ່ ນະຄອນແບັກແລັງ.
ໃນໂອກາດນີ້, ທ່ານ ລຸດວິກ ນອຍເບີ ກໍໄດ້ສະແດງຄວາມຂອບໃຈ ຕໍ່ທ່ານ ບໍ່ແສງຄຳ ວົງດາລາ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງ ຂອງການເດີນທາງມາຢ້ຽມຢາມ ສປປ ລາວ ໃນຄັ້ງນີ້ ໃຫ້ທ່ານ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວຮັບຊາບຕື່ມອີກ.