ບໍລິສັດເອບີ ມອບໂທລະໂຄ່ງ 5 ຊຸດ ໃຫ້ແຂວງປະສົບໄພພິບັດ

ຂປລ. ໃນຕອນແລງຂອງວັນທີ 24 ສິງຫາ 2018 ທີ່ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ກຸ່ມບໍລິສັດເອບີ ຈຳກັດ ໄດ້ນຳເອົາໂທລະໂຄ່ງ ຈຳນວນ 5 ຊຸດ ລວມມູນຄ່າຫລາຍກວ່າ 55 ລ້ານກີບ ມອບໃຫ້ກະຊວງ ຖວທ ເພື່ອນຳໄປມອບຕໍ່ໃຫ້ພະແນກ ຖວທ ແຂວງຈຳນວນໜຶ່ງ ໂດຍສະເພາະ ແມ່ນ ແຂວງຄຳມ່ວນ ແລະ ສະຫວັນນະເຂດ ທີ່ກຳລັງປະສົບໄພພິບັດນ້ຳຖ້ວມ.

ເຄື່ອງຊ່ວຍເຫລືອຄັ້ງນີ້, ມອບໂດຍທ່ານ ເຊີນ ຊຽງ ຜູ້ອຳນວຍການໃຫຍ່ ກຸ່ມບໍລິສັດ ເອບີ ຈຳກັດ, ກ່າວຮັບໂດຍ ທ່ານ ສະຫວັນຄອນ ລາຊະມົນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ມີບັນດາພະນັກງານທີ່ກ່ຽວຂ້ອງ ທັງສອງຝ່າຍເຂົ້າຮ່ວມ.
ໃນໂອກາດດັ່ງກ່າວ, ທ່ານ ສະຫວັນຄອນ ລາຊະມົນຕີ ກໍໄດ້ສະແດງຄວາມຂອບໃຈມາຍັງ ກຸ່ມບໍລິສັດດັ່ງກ່າວ, ທີ່ໄດ້ໃຫ້ການຊ່ວຍເຫລືອຊຸດໂທລະໂຄ່ງ ໃນຄັ້ງນີ້ ເຊິ່ງທ່ານໄດ້ຢືນຢັນວ່າ ຈະນຳເອົາເຄື່ອງດັ່ງກ່າວ ໄປມອບຕໍ່ ໃຫ້ພະແນກ ຖວທ ແຂວງ ເພື່ອສ້າງຄວາມເຂັ້ມແຂງ, ເພື່ອປະກອບ ສ່ວນເຂົ້າໃນການປະຕິບັດໜ້າທີ່ຂອງພະແນກ ຫລື ຫ້ອງການ ຖວທ ເມືອງ.