ສະຫະພັນລັດເຊຍ ມອບເຄື່ອງຊ່ວຍເຫລືອຜູ້ປະສົບໄພ

ຂປລ. ລັດຖະບານແຫ່ງສະຫະພັນລັດເຊຍ ໄດ້ມອບເຄື່ອງຊ່ວຍເຫລືອໃຫ້ລັດຖະບານ ແຫ່ງ ສປປ ລາວ ເພື່ອນຳໄປຊ່ວຍເຫລືອບັນເທົາສຸກເສີນ ໃຫ້ແກ່ປະຊາຊົນລາວ ທີ່ໄດ້ຮັບຜົນກະທົບຈາກໄພ ພິບັດທຳມະຊາດ ໃນທົ່ວ ປະເທດ, ໂດຍສະເພາະຢູ່ ເມືອງ ສະໜາມໄຊ ແຂວງ ອັດຕະປື.

ເຄື່ອງຊ່ວຍເຫລືອດັ່ງກ່າວ, ປະກອບມີ ເຄື່ອງປັ່ນໄຟຟ້າ (120kv) ຈຳນວນ 2 ໜ່ວຍ, ເຕັ້ນ (ສຳລັບນອນ 10 ຄົນ) ຈຳນວນ 100 ເຕັ້ນ, ຜ້າຫົ່ມ 1.000 ຜືນ, ເຮືອກູ້ໄພ (ໃຊ້ພະລັງງານແສງຕາເວັນ) 60 ລໍາ, ເຄື່ອງໃຊ້ ສອຍສຳລັບເຮືອນຄົວ 1.500 ອັນ, ເຂົ້າສານ 5 ໂຕນ ແລະ ນໍ້າຕານ 5 ໂຕນ ໂດຍເຄື່ອງຈຳນວນດັ່ງກ່າວນີ້, ໄດ້ມາຮອດສະໜາມບິນສາກົນວັດໄຕ ນະຄອນຫລວງວຽງຈັນ ໃນຄືນຂອງວັນທີ 25 ສິງຫາ 2018 ໂດຍຖ້ຽວບິນ IL-76 SUM 9127.
ພິທີມອບ-ຮັບ ຢ່າງເປັນທາງການ ໄດ້ຈັດຂຶ້ນໃນວັນທີ 25 ສິງຫາ 2018 ທີ່ສະໜາມບິນສາ ກົນວັດໄຕ, ຊຶ່ງຕາງໜ້າໃຫ້ລັດຖະບານແຫ່ງສະຫະພັນລັດເຊຍ ມອບໂດຍ ທ່ານ ປູໂດບກິນ ອັນເດຣ ຫົວໜ້າກົມອົງການ ຊ່ວຍເຫລືອມະນຸດສະທຳ, ກະຊວງໄພພິບັດລັດເຊຍ ແລະ ກ່າວຮັບຕາງໜ້າລັດ ຖະບານລາວ ໂດຍ ທ່ານ ຢ່າງກູ ຢ່າງລືໄຊ ຫົວໜ້າກົມແຜນການ ແລະ ການຮ່ວມມື, ກະຊວງແຮງງານ ແລະ ສະຫວັດດີການສັງຄົມ.