ລັດຖະມົນຕີ ຖວທ ຕ້ອນຮັບການເຂົ້າຢ້ຽມຂຳນັບ ຂອງລັດ ຖະມົນຕີ ກະຊວງວັດທະນະທຳ ແຫ່ງ ຣາຊະອານາຈັກໄທ

ຂປລ. ໃນວັນທີ 24 ສິງຫາ 2018 ທີ່ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຕ້ອນຮັບການເຂົ້າພົບ ຂອງທ່ານ ວິຣະ ໂຣດພົດຈະນະຣັດ ລັດຖະມົນຕີ ກະຊວງວັດທະນະທຳ ແຫ່ງ ຣາຊະອານາຈັກໄທ, ເນື່ອງໃນໂອກາດເດີນທາງມາຢ້ຽມຢາມ ໃນລະຫວ່າງວັນທີ 24-25 ສິງຫາ 2018.

ຈຸດປະສົງຂອງ ການພົບ ປະຄັ້ງນີ້, ແມ່ນເພື່ອປຶກສາຫາລື ໃນການຮ່ວມມືທາງດ້ານວັດທະນະທຳ ລະຫວ່າງສອງປະເທດ ໃຫ້ສືບຕໍ່ນັບມື້ນັບຂະຫຍາຍຕົວ.
ໃນໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຍິນດີຕ້ອນຮັບ ແລະ ຕີລາສູງຕໍ່ ທ່ານ ວິຣະ ໂຣດພົດຈະນະຣັດ ໃນການເດີນທາງມາຢ້ຽມຢາມ ສປປ ລາວ ໃນຄັ້ງນີ້, ເຊິ່ງເປັນການປະກອບສ່ວນອັນສຳຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ 2 ປະເທດໂດຍສະເພາະ ໃນຂົງເຂດວຽກງານວັດທະນະທຳ ແລະ ທ່ອງທ່ຽວ.
ພ້ອມນີ້, ທ່ານ ວິຣະ ໂຣດພົດຈະນະຣັດ ກໍໄດ້ສະແດງຄວາມຂອບໃຈ ຕໍ່ ທ່ານລັດຖະມົນຕີ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງສະແດງຄວາມຢືນຢັນວ່າ ຈະສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ 2 ປະເທດ ລາວ-ໄທ, ໄທ-ລາວ ຂອງພວກເຮົາ ໃຫ້ແຕກດອກອອກຜົນ ແລະ ແໜ້ນແຟ້ນຍິ່ງຂຶ້ນ.