ຍົກລະດັບຄວາມຮູ້ໃນການສ້າງປັບປຸງກົດໝາຍ ແລະ ນິຕິກຳໃຕ້ກົດໝາຍ

ຂປລ. ກົມນິຕິກຳ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ( ຖວທ )ຈັດຊຸດຝຶກອົບຮົມໃນຫົວຂໍ້ “ການສ້າງ, ປັບປຸງກົດໝາຍ ແລະ ນິຕິກຳໃຕ້ກົດໝາຍ” ໃຫ້ແກ່ສຳມະນາກອນ ຈາກກົມ, ກອງ, ສະຖາບັນ ແລະ ໂຮງຮຽນຂອງຂະແໜງການ ຖວທ ອ້ອມຂ້າງກະຊວງ ແຕ່ວັນທີ 2-3 ສິງຫາ 2018 ທີ່ກະຊວງດັ່ງກ່າວ, ໂດຍການເປັນປະທານຂອງ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ.

ຊຸດຝຶກອົບຮົມດັ່ງກ່າວ, ບັນດາສໍາມະນາກອນ ຈະໄດ້ຮັບຟັງການບັນຍາຍ, ການແລກປ່ຽນບົດຮຽນ ເຊິ່ງກັນ ແລະ ກັນ ໃນ 3 ຫົວຂໍ້ໃຫຍ່ ຄື: 1 ເຕັກນິກການສ້າງນິຕິກຳ ເຊິ່ງຈະໄດ້ລົງເລີກ ໃນສ່ວນປະກອບຂອງຮ່າງນິຕິກຳ, ໂຄງປະກອບຂອງຮ່າງນິຕິກຳ, ການຂຽນ ແລະ ຊັບຊ້ອນເນື້ອໃນ ຂອງຮ່າງນິຕິກຳ, ເຕັກນິກການປັບປຸງນິຕິກຳ, ການອ້າງອີງໃສ່ບົດບັນຍັດ ແລະ ນິຕິກຳອື່ນໆ; 2 ຂັ້ນຕອນ ແລະ ວິທີການສ້າງກົດໝາຍ, ໂດຍຈະໄດ້ລົງເລີກ ກ່ຽວກັບຄວາມຈຳເປັນ ໃນການສ້າງກົດໝາຍ, ຫລັກການພື້ນຖານ ໃນການສ້າງກົດໝາຍ, ບ່ອນອີງໃນການສ້າງກົດໝາຍ ແລະ ອື່ນໆ; 3 ການສ້າງນິຕິກຳໃຕ້ກົດໝາຍ ຈະໄດ້ລົງເລີກກ່ຽວກັບ ຄວາມຈຳເປັນ ໃນການສ້າງນິຕິກຳ, ບ່ອນອີງໃນການສ້າງນິຕິກຳໃຕ້ກົດໝາຍ ແລະ ອື່ນໆ ເພື່ອແນໃສ່ສ້າງໃຫ້ພະນັກງານ ຂະແໜງການ ຖວທ ມີຄວາມຮູ້ ແລະ ຄວາມເຂົ້າໃຈ ກ່ຽວກັບວຽກງານດັ່ງກ່າວ ແລະ ນຳໄປໝູນໃຊ້ເຂົ້າ ໃນວຽກງານຕົວຈິງ ໃຫ້ເກີດ ຜົນປະໂຫຍດສູງສຸດ.
ໂອກາດນີ້, ທ່ານ ບົວເງິນ ຊາພູວົງ ໄດ້ສະແດງຄວາມຊົມເຊີຍ ຕໍ່ຄະນະຮັບຜິບຊອບຊຸດຝຶກອົບຮົມຄັ້ງນີ້ ພ້ອມຮຽກຮ້ອງມາຍັງ ບັນດາສຳມະນາກອນ ຈົ່ງເອົາໃຈໃສ່ຕິດຕາມຮັບຟັງ ເອົາໃຈໃສ່ໃນການຄົ້ນຄວ້າປະກອບຄຳຄິດເຫັນຮ່ວມກັນ ເພື່ອເຮັດໃຫ້ ຊຸດຝຶກອົບຮົມໄດ້ຮັບຜົນສຳເລັດ ຕາມລະດັບຄາດໝາຍ.