ທາງການອັດຕະປື ເລັ່ງກອບກູ້ຊີວິດຜູ້ປະສົບໄພນ້ຳຖ້ວມ

ຂປລ.ເລີ່ມແຕ່ວັນທີ 23/7/2018 ເປັນຕົ້ນມາ ທາງການແຂວງອັດຕະປື ເລັ່ງອົບພະຍົກປະຊາ ຊົນຜູ້ທີ່ລອດຊີວິດ ແລະ ຕົກຄ້າງຢູ່ຕາມຈຸດຕ່າງໆ ໄປຢູ່ເຂດທີ່ປອດໄພຊົ່ວຄາວ, ພາຍຫລັງທີ່ໄດ້ຮັບຜົນກະທົບ ຈາກໄພພິບັດ, ເນື່ອງຈາກມວນນ້ຳ 500 ລ້ານແມັດກ້ອນ ຂອງອ່າງເຂື່ອນໄຟຟ້າເຊປຽນ-ເຊນ້ຳນ້ອຍ ໄດ້ໄຫລຊຸຖ້ວມເປັນບໍລິເວນກວ້າງ ສົ່ງຜົນເຮັດໃຫ້ສູນເສຍຊັບສິນຊີວິດ, ເນື້ອທີ່ການຜະລິດ ແລະ ຊີວິດຂອງປະຊາຊົນ ທີ່ເມືອງສະໜາມໄຊ ແຂວງອັດຕະປື. ໃນຂະນະດຽວກັນ ລັດຖະບານ ກໍໄດ້ປະກາດເປັນເຂດໄພພິບັດ.

ທ່ານ ເລັດ ໄຊຍະພອນ ເຈົ້າແຂວງອັດຕະປື ພ້ອມຄະນະ ໄດ້ສືບຕໍ່ລົງຕິດຕາມ ຊ່ວຍເຫລືອ ປະຊາຊົນຜູ້ໄດ້ຮັບຜົນກະທົບ, ໂດຍມີຄະນະກູ້ໄພຈາກ ສູນກາງສົມທົບກັບຄະນະກູ້ໄພ ຈາກແຂວງ ອັດຕະປື, ຄະນະກູ້ໄພຈາກກອງພົນນ້ອຍທີ 5, ຄະນະກູ້ໄພແຂວງເຊກອງ ແລະ ຄະນະກູ້ໄພ ຂັ້ນເມືອງ ສຸມໃສ່ ໃນການຊ່ວຍເຫລືອປະຊາຊົນ ທີ່ໄດ້ຮັບຜົນກະທົບ. ເສັ້ນທາງລົດຖືກຕັດຂາດບາງຈຸດ ຈໍາເປັນຕ້ອງເດີນທາງດ້ວຍເຮືອ ແລະ ໄດ້ນຳໃຊ້ຍົນກອງທັບ ລຳລຽງຂົນຢາ, ເຄື່ອງນຸ່ງຫົ່ມ, ເຊິ່ງນໍາ ໂດຍທ່ານ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ພ້ອມດ້ວຍວິຊາການ ທາງດ້ານ ການເເພດ. ໄປປະຕິບັດການມອບເຄື່ອງບັນເທົາທຸກ ເບື້ອງຕົ້ນ ພ້ອມທັງດູເເລຮັກສາປິ່ນປົວ ຜູ້ໄດ້ຮັບ ໃນເຂດປະສົບໄພນໍ້າຖ້ວມ.
ອີງຕາມການລາຍງານຫລ້າສຸດ ຂອງຄະນະໄພພິບັດຂັ້ນແຂວງ ແລະ ຂັ້ນເມືອງ ໃນຕອນບ່າຍຂອງວັນທີ 25 ກໍລະກົດ 2018, ມີບ້ານໄດ້ຮັບຜົນກະທົບນໍ້າຊຸໜັກ ຈໍານວນ 6 ບ້ານ ຄື: ບ້ານໃໝ່, ບ້ານຫີນລາດ, ບ້ານທ່າແສງຈັນ, ບ້ານໃຫຍ່ແທ, ບ້ານທ່າຫີນ ແລະ ສະໝອງ, ມີ 1.373 ຄອບຄົວ, ພົນລະເມືອງ 7.424 ກວ່າຄົນ, ເປັນຍິງ 3.630 ຄົນ. ພ້ອມນີ້, ຍັງມີບ້ານໃກ້ຄຽງທີ່ໄດ້ຮັບຜົນກະທົນ ຄື ບ້ານມະຕໍຢອດ ແລະ ບ້ານປີນດົງ ຈຳນວນ 215 ຄອບຄົວ, ພົນລະເມືອງເກືອບ 1.000 ຄົນ. ລວມທັງໝົດມີ 8 ບ້ານ ທີ່ໄດ້ຮັບຜົນກະທົບ, ມີ 1.578 ຄອບຄົວ, ມີພົນລະເມືອງ 8.343 ຄົນ, ຍິງ 3.911 ຄົນ, ເສຍຊີວິດ 26 ຄົນ, ສ່ວນເນື້ອທີ່ການຜະລິດ ທັງ 8 ບ້ານ ຖືກຜົນກະທົບນ້ຳຖ້ວມ 2.030 ເຮັກຕາ.