ນາຍົກລັດຖະມົນຕີຖະແຫລງຂ່າວ ສໍາເລັດການກອບກູ້ ປະຊາຊົນທີ່ຕົກຄ້າງ ໄປຢູ່ບ່ອນປອດໄພ ຈາກອຸ ບັດເຫດເຂື່ອນກັ້ນນ້ຳ ເຊປຽນ-ເຊນ້ຳນ້ອຍ

ຂປລ. ໃນຕອນແລງວັນທີ 25 ກໍລະກົດ 2018 ທີ່ ນະຄອນຫລວງວຽງຈັນ, ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ຖະແຫລງຂ່າວ ຕໍ່ສື່ມວນຊົນ ກ່ຽວກັບອຸບັດເຫດ ການແຕກຫັກຂອງ ເຂື່ອນກັ້ນນ້ຳ ແຫ່ງທີ 3 ເຊປຽນ-ເຊນ້ຳນ້ອຍ ເມືອງສະໜາມໄຊ ແຂວງອັດຕະປື ວ່າ: ປັດຈຸບັນ ໄດ້ສຳເລັດການກອບກູ້ປະຊາຊົນທີ່ຫລົບໄພ ຢູ່ເທິງຫລັງຄາເຮືອນ ແລະ ຢູ່ເທິງຕົ້ນໄມ້ໃຫຍ່ໝົດແລ້ວ,

ພ້ອມທັງນຳເອົາປະຊາຊົນ ຜູ້ທີ່ປະ ສົບໄພ ໄປອາໄສຢູ່ຕາມຫ້ອງການປົກຄອງເມືອງ, ໂຮງ ຮຽນຢູ່ເທດສະບານເມືອງ ແລະ ບ່ອນທີ່ປອດໄພ. ພ້ອມນີ້, ໜ່ວຍກູ້ໄພໄດ້ດຳເນີນການກວດກາລົງທະບຽນ ແລະ ກວດສຸຂະພາບ, ຈັດສັນທີ່ຢູ່ອາໄສຊົ່ວຄາວ, ຊ່ວຍ ບັນເທົາທຸກດ້ວຍເຄື່ອງນຸ່ງຫົ່ມ, ອາຫານ, ຢາປົວພະຍາດ ໄດ້ໃນລະດັບຕົ້ນ.
ນອກຈາກນີ້, ລັດຖະບານກໍໄດ້ມີການປະຊຸມດ່ວນ ແລະ ໄດ້ຕົກລົງສ້າງຕັ້ງຄະນະສະເພາະກິດຂຶ້ນ ໂດຍມອບໃຫ້ທ່ານ ຮອງນາຍົກ ສອນໄຊ ສີພັນດອນ ເປັນຫົວໜ້າໜ້າຄະນະ ປະກອບດ້ວຍພາກ ສ່ວນທີ່ກ່ຽວຂ້ອງ ແລະ ແຂວງອັດຕະປື ເພື່ອສືບຕໍ່ແກ້ໄຂ ທັງໄລຍະສະເພາະໜ້າ ແລະ ໄລຍະຍາວ. ສະພາບການດັ່ງກ່າວ, ເກີດຂຶ້ນໃນຄືນວັນທີ 23 ກໍລະກົດ 2018 ສາເຫດແມ່ນມາຈາກຝົນຕົກໜັກ ຕິດຕໍ່ກັນເປັນເວລາຫລາຍວັນ, ປະລິມານນ້ຳຂຶ້ນ ສູງຫລາຍ ເຮັດໃຫ້ອ່າງເກັບນ້ຳສຳຮອງຂອງເຂື່ອນໄຟຟ້າເຊປຽນ-ເຊນ້ຳນ້ອຍ ຮັບນ້ຳບໍ່ໄດ້, ເຮັດໃຫ້ເຂື່ອນກັ້ນນ້ຳລຸລົງມາ ຊຸບ້ານເຮືອນປະຊາຊົນຢ່າງກະທັນຫັນ ເຮັດໃຫ້ບ້ານເຮືອນຈົມຢູ່ໃຕ້ນ້ຳ, ກະແສນ້ຳໄຫລແຮງພັດເອົາ ບ້ານ ເຮືອນ ແລະ ປະຊາຊົນໄປຕາມກະແສນ້ຳ, ເຮັດໃຫ້ປະຊາຊົນ 13 ບ້ານໄດ້ຮັບຜົນກະທົບ ໃນເບື້ອງຕົ້ນມີຜູ້ຂາດທີ່ຢູອາໄສ 587 ຄອບຄົວ, ຈຳນວນ 3.060 ຄົນ ແລະ ມີຜູ້ສູນຫາຍ 131 ຄົນ.