ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ປິດລົງດ້ວຍຜົນສຳເລັດຢ່າງຈົບງາມ

ຂປລ. ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ໄດ້ປິດລົງດ້ວຍຜົນສຳເລັດຢ່າງຈົບງາມ ໃນຕອນບ່າຍວັນທີ 28 ມິຖຸນາ 2018 ພາຍລັງດຳເນີນມາແຕ່ວັນທີ 5 ມິຖຸນາ ຜ່ານມາ, ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ໃຫ້ກຽດເຂົ້າຮ່ວມໂດຍ ທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ, ທ່ານ ທອງລຸນ ສີສຸລິດນາຍົກລັດຖະມົນຕີ, ມີບັນດາການນຳ, ອະດີດການນຳພັກ-ລັດ, ສະມາຊິກສະພາແຫ່ງຊາດ (ສສຊ) ທຸກເຂດເລືອກຕັ້ງ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.

ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ກ່າວສູນທອນພົດປິດກອງປະຊຸມຄັ້ງນີ້ ວ່າ: ເປັນເວ ລາ 18 ວັນເຕັມ ທີ່ກອງປະຊຸມໄດ້ດຳເນີນໄປດ້ວຍບັນຍາກາດ ສ້າງສັນ ແລະ ໄດ້ຮັບຜົນສຳເລັດຕາມແຜນການທີ່ວາງໄວ້ ຕະຫລອດໄລຍະການດຳເນີນກອງປະຊຸມ ບັນດາ ສສຊ ໄດ້ເຊີດຊູຄວາມຮັບຜິດ ຊອບສູງໃນການຄົ້າຄວ້າ, ປະກອບຄຳຄິດຄຳເຫັນຢ່າງມີເຫດຜົນ, ມີເນື້ອໃນເລິກເຊິ່ງ ແລະ ກວ້າງ ຂວາງ ພ້ອງທັງມີຄວາມເປັນເອກະພາບສູງ ໃນການພິຈາລະນາ ແລະ ຮັບຮອງເອົາບັນດາເນື້ອໃນຕ່າງໆ ເຊັ່ນ: ກອງປະຊຸມໄດ້ຮັບຟັງ ແລະ ປະກອບຄຳຄິດເຫັນ ແລະ ຮັບຮອງເອົາບົດລາຍງານ ຂອງລັດຖະບານໃນຫລາຍຂົງເຂດວຽກງານ ເປັນຕົ້ນ ໄດ້ພິຈາລະນາ ແລະ ຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະ ກິດ-ສັງຄົມ, ແຜນງົບປະມານແຫ່ງລັດ 4 ເດືອນຜ່ານມາ, ຄາດຄະເນ 6 ເດືອນຕົ້ນປີ ແລະ ທິດທາງວຽກງານຈຸດສຸມປະຈຳ 6 ເດືອນທ້າຍປີ 2018; ບົດລາຍງານຂອງລັດຖະບານ ກ່ຽວກັບການປະຕິບັດມະຕິຂອງກອງປະຊຸມ ສະພາແຫ່ງຊາດ ວ່າດ້ວຍການອອກນິຕິກຳລຸ່ມກົດໝາຍ ແລະ ຜົນກະທົບຈາກການນຳໃຊ້ສານເຄມີອັນຕະລາຍ ເກີນຄ່າມາດ ຕະຖານຕໍ່ສິ່ງແວດລ້ອມ, ສັງຄົມ ແລະ ທຳມະຊາດ; ບົດລາຍງານກ່ຽວກັບແຜນແມ່ບົດຈັດສັນທີ່ດິນແຫ່ງຊາດ ແຕ່ນີ້ຮອດປີ 2030, ບົດລາຍງານ ກ່ຽວກັບໂຄງປະກອບລາຄານ້ຳມັນ, ການຈັດຕັ້ງປະຕິບັດວຽກງານ 3 ສ້າງ ຕິດພັນກັບການພັດທະນາຊົນນະບົດ ແລະ ລຶບລ້າງຄວາມທຸກຍາກ, ມາດຕະການ, ວິທີແກ້ໄຂຕໍ່ປະກົດການຫຍໍ້ທໍ້ໃນສັງຄົມ ແລະ ອື່ນໆ.
ພ້ອມນີ້, ກອງປະຊຸມຍັງໄດ້ພິຈະລະນາ ຮັບຮອງເອົາການສ້າງ ແລະ ປັບປຸງກົດໝາຍ ຈຳ ນວນ 13 ສະບັບ. ໃນນັ້ນ, ກົດໝາຍສ້າງໃໝ່ມີ 5 ສະບັບ ຄື: ກົດໝາຍວ່າດ້ວຍສະຫະພັນນັກຮົບເກົ່າ, ກົດໝາຍວ່າ ດ້ວຍການຈັດສັນພູມລຳເນົາ ແລະ ອາຊີບ, ກົດໝາຍວ່າດ້ວຍ ການຄຸ້ມຄອງໜີ້ສິນສາທາລະນະ, ກົດໝາຍວ່າດ້ວຍປ້າຍ ແລະ ກົດໝາຍວ່າດ້ວຍ ການໃຫ້ວັກຊິນກັນພະຍາດ. ສ່ວນກົດໝາຍປັບປຸງໃໝ່ ມີ 8 ສະບັບ ຄື: ກົດໝາຍວ່າດ້ວຍ ນາຍທະຫານກອງທັບປະຊາຊົນລາວ, ກົດ ໝາຍວ່າດ້ວຍທະບຽນຄອບຄົວ, ກົດໝາຍວ່າດ້ວຍທະນາຄານແຫ່ງ ສປປ ລາວ, ກົດໝາຍວ່າດ້ວຍ ອາກອນມູນຄ່າເພີ່ມ, ກົດໝາຍວ່າດ້ວຍແນວລາວສ້າງຊາດ, ກົດ ໝາຍວ່າດ້ວຍ ຂໍ້ຂັດແຍ່ງທາງດ້ານເສດຖະກິດ, ກົດໝາຍວ່າດ້ວຍການບິນພົນລະເຮືອນ ແລະ ກົດໝາຍວ່າດ້ວຍປະກັນສັງຄົມ. ພ້ອມນີ້, ກອງປະຊຸມຍັງໄດ້ພິຈາລະນາ ແລະ ຮັບຮອງ ການສະເໜີແຕ່ງຕັ້ງສະ ມາຊິກສະ ພາຜູ້ພິພາກສາ ຂອງສານປະຊາຊົນສູງສຸດ ຈໍານວນ 11 ທ່ານ ແລະ ພິຈາລະນາຮັບຮອງເອົາບົດລາຍງານການ ເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ຂອງຄະນະ ປະຈຳສະພາແຫ່ງຊາດ.