ການພົບປະສອງຝ່າຍ ລາວ-ຈີນ ນຳຜົນປະໂຫຍດຕົວຈິງມາສູ່ປະຊາຊົນສອງຊາດ

ຂປລ. ໃນໂອກາດເດີນທາງຢ້ຽມຢາມ ສາທາລະນະລັດ ປະຊາຊົນຈີນ ຂອງຄະນະຜູ້ແທນຂັ້ນສູງ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລະຫານງານສູນກາງພັກ, ປະທານປະເທດ ແຫ່ງ ສປປ ລາວ ໄດ້ພົບປະສອງຝ່າຍ ກັບ ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກ, ປະທານປະເທດ ແຫ່ງ ສປ.ຈີນ ທີ່ນະຄອນຫລວງປັກກິ່ງ.

ໃນການພົບປະສອງຝ່າຍ ໄດ້ຕີລາຄາສູງຕໍ່ການແລກປ່ຽນ ຄະນະຜູ້ແທນຂັ້ນສູງຂອງສອງພັກ, ສອງປະເທດ ເຊິ່ງສອງຝ່າຍ ໄດ້ເປັນເອກະພາບກັນໃນຫລາຍເນື້ອໃນ. ປັດຈຸບັນພວມໄດ້ຮັບການຈັດຕັ້ງ ປະຕິບັດຢ່າງຕັ້ງໜ້າ ແລະ ມີປະສິດທິຜົນ ນຳເອົາຜົນປະໂຫຍດຕົວຈິງມາ ສູ່ ປະຊາຊົນສອງຊາດ.
ສະຫາຍ ສີ ຈິ້ນຜິງ ໄດ້ເນັ້ນໜັກວ່າ: ໃນປີ 2013 ສາທາລະນະລັດ ປະຊາຊົນຈີນ ໄດ້ສະເໜີກ່ຽວກັບການພົວພັນ ລາວ-ຈີນ ແມ່ນຄູ່ຮ່ວມຊະຕາກຳ ທີ່ມີຜົນປະໂຫຍດ ກວ້າງຂວາງຮ່ວມກັນເປັນຄັ້ງທຳອິດ ແລະ ກໍໄດ້ຮັບການສະໜັບສະໜູນຈາກຝ່າຍລາວ. ການນຳສູງສຸດຂອງສອງປະເທດ ໄດ້ເປັນເອກະພາບຮ່ວມກັນ ໃນການສ້າງປະຊາຄົມຮ່ວມຊະຕາກຳ ທີ່ມີຄວາມໝາຍທາງຍຸດທະສາດ ລະຫວ່າງສອງປະເທດ ແລະ ໄດ້ລະບຸເນື້ອໃນດັ່ງກ່າວ ເຂົ້າໃນຖະແຫລງການຮ່ວມຂອງສອງປະເທດ ໃນປີ 2016 ເຊິ່ງໄດ້ສະແດງໃຫ້ເຫັນ ເຖິງບົດບາດສຳຄັນ ໃນການ ນຳເອົາການພົວພັນ ລະຫວ່າງ ສອງພັກ, ສອງລັດ ກ້າວເຂົ້າສູ່ໄລຍະທີ່ດີທີ່ສຸດ ໃນປະຫວັດສາດແຫ່ງການພົວພັນ ລະຫວ່າງ ສອງປະເທດ. ຄ່ຽງຄູ່ກັບສາຍພົວພັນລາວ-ຈີນ ທີ່ໄດ້ກ້າວເຂົ້າສູ່ໄລຍະການພັດທະນາອັນໃໝ່ ທັງສອງຝ່າຍຄວນໄດ້ມີການຮັດແໜ້ນພື້ນຖານ ຄວາມຮັບຮູ້ ກ່ຽວກັບຄູ່ຮ່ວມຊະຕາກຳ ສຸ່ມໃສການສ້າງປະຊາຄົມຮ່ວມຊະຕາກຳ ຊຸກຍູ້ເຮັດໃຫ້ເນື້ອໃນດັ່ງກ່າວ ກາຍເປັນການກະທຳ ເຮັດໃຫ້ຄວາມມຸ້ງ ໝາດປາດຖະໜາກາຍເປັນຈິງ, ເຮັດໃຫ້ຄູ່ຮ່ວມຊະຕາກຳ ຈີນ-ລາວ ເກີດດອກອອກຜົນ, ເຊິ່ງມີເນື້ຶອໃນສຳຄັນດັ່ງນີ້:
1. ຕ້ອງໄດ້ເພີ່ມທະວີການປະສານງານ ດ້ານຍຸດທະສາດ ຮັດແໜ້ນພື້ນຖານການເມືອງ ຄູ່ຮ່ວມຊະຕາກຳ ທັງສອງຝ່າຍຄວນ ມີການຮ່ວມມືແລກປ່ຽນຢ່າງຮອບດ້ານ ຫລາຍລະດັບ ແລະ ເປັນກົນໄກ ເພື່ອຍົກສູງລະດັບຄວາມເຊື່ອໝັ້ນ ເຊິ່ງກັນ ແລະ ກັນ.
2. ຕ້ອງໄດ້ລົງເລິກຮ່ວມມື ໃຫ້ເປັນຮູບປະທຳ ຮັດແໜ້ນ ສາຍພົວພັນດ້ານຜົນປະໂຫຍດ ຮ່ວມກັນ ສອງຝ່າຍຄວນສຸ່ມໃສ່ ຊຸກຍູ້ການຮ່ວມມືໃນໂຄງການທີ່ສຳຄັນ ໃນຂອບໜຶ່ງແລວ ໜຶ່ງເສັ້ນທາງ, ເພີ່ມທະວີການຮ່ວມມື ໃນການປັບປຸງຊີວິດການເປັນຢູ່ ແລະ ແກ້ໄຂຄວາມທຸກຍາກ ໃຫ້ແກ່ປະ ຊາຊົນຂອງສອງປະເທດ ນັບແຕ່ເທິງລົງລຸ່ມ ເຮັດໃຫ້ໄປພ້ອມກັນ ແລະ ເຮັດໃຫ້ການຮ່ວມມື ຂອງທັງສອງຝ່າຍມີໂສມໜ້າອັນໃໝ່.
3. ຕ້ອງເພີ່ມທະວີ ການຮ່ວມມືໃນດ້ານຄວາມປອດໄພ ຮັດແໜ້ນພື້ນຖານການຮັກສາຄວາມປອດໄພ ແບບຄູ່ຮ່ວມຊະຕາກຳ, ສອງຝ່າຍຄວນເພີ່ມທະວີການປະສານສົມທົບນຳກັນ ໃນກົນໄກຫລາຍຝ່າຍ ເຊັ່ນ: ໃນອົງການສະຫະປະຊາຊາດ, ການຮ່ວມມືໃນອາຊີຕາເວັນອອກ, ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ແລະ ອື່ນໆ. ເພື່ອປົກປ້ອງຜົນປະໂຫຍດຮ່ວມກັນ ຂອງບັນດາປະເທດໃຫ້ໄດ້ຢ່າງແທ້ຈິງ.
4. ຄວນເພີ່ມທະວີການພົວພັນ ລະຫວ່າງປະຊາຊົນສອງປະເທດ ເພື່ອຮັດແໜ້ນຄວາມຮັກແພງຂອງປະຊາຊົນ ແບບຄູ່ຮ່ວມຊະຕາກຳ ໂດຍຜ່ານການ ໄປມາຫາສູ່ ລະຫວ່າງ ປະຊາຊົນສອງປະເທດ.
5. ຕ້ອງເອົາໃຈໃສ່ລະບົບນິເວດ ເພື່ອຊຸກຍູ້ການພັດທະນາຄູ່ຮ່ວມ ຊະຕາກຳແບບຍືນຍົງ, ສອງຝ່າຍຄວນ ເພີ່ມທະວີແລກປ່ຽນ ແລະ ຖອດຖອນບົດຮຽນ ໃນການຮັກສາສິ່ງແວດລ້ອມ ແລະ ລະບົບນິເວດ ເພື່ອຊອກຫາຊ່ອງທາງອັນໃໝ່ ໃນການສ້າງຄູ່ຮ່ວມຊະຕາກຳສີຂຽວ.
ໃນຂະນະດຽວກັນ, ສະຫາຍ ບຸນຍັງ ວໍລະຈິດ ໄດ້ກ່າວວ່າ: ສະຫາຍ ສີ ຈິ້ນ ຜິງ ແມ່ນເພື່ອນ ມິດຜູ້ທີ່ສະໜິດສະໜົມ ແລະ ໄວ້ເນື້ອເຊື່ອໃຈຂອງພັກ, ລັດ ແລະ ປະຊາຊົນລາວ. ໃນໂອກາດຢ້ຽມ ຢາມສາທາລະນະລັດ ປະຊາທິປະໄຕ ປະຊາຊົນລາວ ສະຫາຍ ເລຂາທິການໃຫຍ່ ສີ ຈິ້ນຜິງ ແລະ ການນຳສູງສຸດຂອງລາວ ກໍໄດ້ເປັນເອກະພາບຮ່ວມກັນ ໃນຫລາຍບັນຫາ, ເຊິ່ງໄດ້ຮັບການຈັດຕັ້ງປະຕິ ບັດ ຢ່າງຕັ້ງໜ້າ ແລະ ຮອບດ້ານ, ເຊິ່ງເປັນການນຳເອົາການພົວພັນ ລະຫວ່າງສອງພັກ, ສອງລັດ ໃຫ້ກ້າວເຂົ້າສູ່ລະດັບສູງອັນໃໝ່.
ສະຫາຍ ບຸນຍັງ ວໍລະຈິດ ໄດ້ສະແດງ ຄວາມເປັນເອກະພາບກັບ ສະຫາຍ ເລຂາທິການໃຫຍ່ ສີ ຈິ້ນຜິງ ໃນການຊຸກຍູ້ການສ້າງປະຊາຄົມ ຄູ່ຮ່ວມຊະຕາກຳ ລາວ-ຈີນ ພ້ອມຍິນດີທີ່ຈະເສີມຂະຫຍາຍ ບົດບາດການນຳພາດ້ານການເມືອງ ລະຫວ່າງສອງພັກ ໂດຍສືບຕໍ່ ຮັກສາການພົບປະຂອງການນຳຂັ້ນສູງ ຂອງສອງພັກ, ເພີ່ມທະວີການແລກປ່ຽນ ບົດຮຽນໃນດ້ານການກໍ່ສ້າງພັກ, ການປົກຄອງລັດ, ບໍລິຫານປະເທດ ແລະ ການຮ່ວມມື ໃຫ້ເປັນຮູບປະທຳໃນຂົງເຂດຕ່າງໆ, ຊຸກຍູ້ການຮ່ວມມືໃນຂົງເຂດ ທີ່ຢູ່ໃນຂອບການຮ່ວມມື ໜຶ່ງແລວ ໜຶ່ງເສັ້ນທາງ, ມີການປະສານກັນຢ່າງໃກ້ຊິດ ໃນກິດຈະການພາກພື້ນ ແລະ ສາກົນ, ຮ່ວມກັນສ້າງເປັນປະຊາຄົມຮ່ວມຊະຕາກຳສັງຄົມນິຍົມ ທີ່ບໍ່ສາມາດທັບມ້າງໄດ້ ເພື່ອສ້າງຄວາມຜາສຸກ ໃຫ້ແກ່ປະຊາຊົນສອງຊາດ.
ພ້ອມນີ້, ສອງຝ່າຍຍັງໄດ້ແຈ້ງໃຫ້ກັນຊາບ ກ່ຽວກັບສະພາບການກໍ່ສ້າງພັກ ແລະ ສະພາບການພາຍໃນຂອງແຕ່ລະຝ່າຍ, ເຊິ່ງສະຫາຍ ສີ ຈິ້ນຜິງ ໄດ້ສະແດງ ຄວາມຊົມເຊີຍ ຕໍ່ຜົນສຳເລັດອັນໃໝ່ ຂອງພັກປະຊາຊົນ ປະຕິວັດລາວ ອັນມີ ສະຫາຍ ເລຂາທິການໃຫຍ່ ບຸນຍັງ ວໍລະຈິດ ເປັນຜູ້ນຳໜ້າເຮັດໃຫ້ປະຊາຊົນລາວ ສາມາດຍາດໄດ້ຜົນສຳເລັດຫລາຍດ້ານ ໃນການພັດທະນາປະເທດຊາດຂອງຕົນ, ພ້ອມທັງໄດ້ແຈ້ງໃຫ້ຊາບ ກ່ຽວກັບບັນດາຜົນສຳເລັດ ແລະ ບົດຮຽນໃນການປະຕິຮູບ ແລະ ການເປີດປະຕູສູ່ພາຍນອກຂອງຈີນ ແລະ ຈະສືບຕໍ່ຈັດຕັ້ງປະຕິບັດວຽກງານ ດັ່ງກ່າວຢ່າງຕັ້ງໜ້າ, ຊຸກຍູ້ການເປີດກວ້າງພາຍນອກ ຂຶ້ນສູ່ລະດັບສູງກວ່າເກົ່າ ເພື່ອເປັນການປະກອບສ່ວນ ເຂົ້າໃນການພັດທະນາ ແລະ ຄວາມຈະເລີນຮຸ່ງເຮືືອງ ຂອງອາຊີ ແລະ ທົ່ວໂລກ ໃຫ້ຫລາຍຂຶ້ນ.
ສະຫາຍ ບຸນຍັງ ວໍລະຈິດ ໄດ້ເນັ້ນຕື່ມວ່າ: ພາຍໃຕ້ການນຳພາອັນສະຫລາດສ່ອງໃສ ແລະ ຖືກຕ້ອງຂອງພັກກອມມູນິດຈີນ ອັນມີສະຫາຍ ສີ ຈິ້ນຜິງ ເປັນແກນນຳນັ້ນ ເຮັດໃຫ້ເສດຖະກິດຂອງຈີນ ມີການຂະຫຍາຍຕົວຢ່າງວ່ອງໄວ ແລະ ໜັກແໜ້ນ, ສັງຄົມມີຄວາມກົມກຽວ ປອງດອງ, ພາລະກິດປະຕິຮູບເປີດປະຕູສູ່ພາຍນອກ ແລະ ຂະບວນການສ້າງສັງຄົມ ອີ່ມໜຳສຳລານຮອບດ້ານ ນັບມື້ມີຜົນສຳເລັດອັນໃໝ່, ລວມທັງການປະກອບສ່ວນ ເຂົ້າໃນການປົກປັກຮັກສາສັນຕິພາບ ແລະ ການພັດທະນາຂອງອາຊີຕາເວັນອອກ ແລະ ຂອງໂລກ. ນອກຈາກນີ້, ຝ່າຍລາວ ຍັງໄດ້ສະແດງຄວາມຂອບໃຈ ຢ່າງຈິງໃຈ ຕໍ່ຈີນ ທີ່ໄດ້ໃຫ້ການ ສະໜັບສະໜູນຊ່ວຍເຫລືອອັນລ້ຳຄ່າ ມາໂດຍຕະຫລອດ.