ການນຳກະຊວງ ຖວທ ຮ່ວມປູກຕົ້ນໄມ້ ໂອກາດວັນປູກຕົ້ນ ໄມ້ແຫ່ງຊາດ

ຂປລ. ຕອນເຊົ້າວັນທີ 1 ມິຖຸນາ 2018 ຢູ່ຫໍພິພິທະພັນແຫ່ງຊາດ ນະຄອນຫລວງວຽງຈັນ ບັນດາການນຳກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຈັດກິດຈະກຳປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ນຳໂດຍ ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ບັນດາຮອງລັດຖະມົນຕີ, ຫົວໜ້າກົມ, ຮອງກົມ ພ້ອມດ້ວຍພະນັກງານ-ລັດຖະກອນ ອ້ອມຂ້າງກະຊວງ ເຂົ້າຮ່ວມ.
ຕົ້ນໄມ້ທີ່ນຳມາປູກໃນຄັ້ງນີ້, ມີທັງໝົດ 60 ກວ່າຕົ້ນ ໃນນັ້ນ ມີໄມ້ໃຫ້ໝາກ, ໄມ້ປະດັບ ແລະ ອື່ນໆ, ທັງນີ້ແນໃສ່ສ້າງເຮັດໃຫ້ຫໍພິພິ ທະພັນແຫ່ງຊາດ ເປັນພື້ນທີ່ສີຂຽວ, ຮົ່ມເຢັນ ແລະ ເພື່ອປະຕິບັດຕາມນະໂຍບາຍ 6 ສ ຂອງນະຄອນຫລວງວາງອອກ, ໂດຍສະເພາະ ສສີຂຽວ ໃຫ້ປະກົດຜົນເປັນຈິງ ເທື່ອລະກ່າວ.

ໃນວັນດຽວກັນ, ສຳນັກງານນາຍົກລັດຖະມົນຕີ ກໍໄດ້ຈັດກິດຈະກຳສະຫລອງ ວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ 1 ມິຖຸນາ ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ, ນຳໂດຍ ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ ມີບັນດາຫົວໜ້າກົມ, ຮອງກົມ, ພະນັກງານ -ລັດຖະກອນ ພ້ອມດ້ວຍນ້ອງເຍົາວະຊົນ ເຂົ້າຮ່ວມຢ່າງຄຶກຄື້ນ. ພ້ອມດຽວກັນນັ້ນ, ສະມາຄົມຜູ້ສູງອາຍຸ ນະຄອນຫລວງວຽງຈັນ ຮ່ວມກັບຄະນະຮັບຜິດຊອບ ຫໍພິພິທະພັນ ໄກສອນ ພົມວິຫານ ກໍໄດ້ຈັດກິດຈະກຳປູກຕົ້ນໄມ້ ເຊັ່ນດຽວກັນ ນຳໂດຍ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ທ່ານ ສົມພົງ ມົງຄົນວິໄລ ປະທານສະມາຄົມ ຜູ້ສູງອາຍຸ ນະຄອນຫລວງວຽງຈັນ.
ປັດຈຸບັນ ລັດຖະບານ ໄດ້ຖືເອົາວຽກງານຄຸ້ມຄອງ ປົກປັກຮັກສາ ແລະ ພັດທະນາປ່າໄມ້ ເປັນວຽກຍຸດທະສາດທີ່ສໍາຄັນ ຂອງການພັດທະນາເສດຖະກິດ -ສັງຄົມແຫ່ງຊາດ ໂດຍສະເພາະເລັ່ງໃສ່ ວຽກງານການປົກປັກຮັກສາປ່າໄມ້, ການປູກໄມ້ ແລະ ຟື້ນຟູປ່າ ໃຫ້ເປັນປ່າສີຂຽວ ແນໃສ່ເຮັດໃຫ້ເນື້ອທີ່ ປ່າໄມ້ປົກຫຸ້ມ ໃນທົ່ວປະເທດ 70% ໃນປີ 2020.