ລັດຖະມົນຕີກະຊວງ ຖວທ ຕ້ອນຮັບຮອງລັດຖະມົນຕີກະຊວງ ວັດທະນະທຳ ແລະ ທ່ອງທ່ຽວ ແຫ່ງ ສປ ຈີນ

ຂປລ. ໃນວັນທີ 15 ພຶດສະພາ 2018 ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບ ທ່ານ ຕູ່ ຈ່ຽງ ( Du JIANG )ຮອງລັດຖະມົນຕີ ກະຊວງວັດທະນະທຳ ແລະ ທ່ອງທ່ຽວ ແຫ່ງ ສປ ຈີນ ພ້ອມດ້ວຍຄະນະ, ໃນໂອກາດເດີນທາງມາເຂົ້າຮ່ວມກອງປະຊຸມ ເວທີສົນທະນາການຮ່ວມມື ດ້ານການທ່ອງທ່ຽວ ລະ ຫວ່າງ ສປ ຈີນ ແລະ ສປປ ລາວ.

ໃນໂອກາດນີ້, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ທ່ານ ຕູ່ ຈ່ຽງ ທີ່ໄດ້ນຳພາຄະນະເດີນທາງມາ ເຂົ້າຮ່ວມກອງປະຊຸມເວທີສົນທະນາ ການຮ່ວມມືດ້ານການທ່ອງທ່ຽວ ລະຫວ່າງ ສປ ຈີນ ແລະ ສປປ ລາວ ໃນຄັ້ງນີ້, ຖືເປັນການປະກອບສ່ວນສຳຄັນ ເຂົ້າໃນການເສີມຂະຫຍາຍ ສາຍພົວພັນມິດຕະພາບ ອັນເປັນມູນເຊື້ອ ແລະ ເປັນຄູ່ຮ່ວມມືຍຸດທະສາດ ຮອບດ້ານ ແລະ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ຂະຫຍາຍຕົວເຂົ້າສູ່ລວງເລີກ ແລະ ແໜ້ນແຟ້ນຍິ່ງໆຂຶ້ນ ໂດຍສະເພາະ ວຽກງານໃນການຈັດຕັ້ງປະຕິບັດ ປີທ່ອງທ່ຽວ ລາວ 2018 ແລະ ກຽມຈັດຕັ້ງປີທ່ອງທ່ຽວ ລາວ-ຈີນ 2019.
ໃນໂອກາດດຽວກັນ, ທ່ານ ຕູ່ ຈ່ຽງ ໄດ້ສະແດງ ຄວາມຂອບໃຈ ຕໍ່ທ່ານລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບໃນຄັ້ງນີ້, ພ້ອມທັງລາຍງານໃຫ້ຮັບຊາບ ກ່ຽວກັບຈຸດປະສົງ ໃນການເດີນທາງມາຄັ້ງນີ້.