ກະຊວງປ້ອງກັນຄວາມສະຫງົບ ລາວ-ຈີນ ສືບຕໍ່ຮ່ວມມືວຽກງານຫລາຍດ້ານ

ຂປລ. ໂດຍຕອບສະໜອງ ຕາມການເຊື້ອເຊີນຂອງ ທ່ານ ພົນຕີ ສົມແກ້ວ ສີລາວົງ ລັດຖະ ມົນຕີ ກະຊວງປ້ອງກັນຄວາມສະຫງົບ ແຫ່ງ ສປປ ລາວ, ທ່ານ ຈ້າວ ເຄີຈື້ ທີ່ປຶກສາ ແຫ່ງລັດ, ລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສປ ຈີນ ພ້ອມດ້ວຍຄະນະ, ໄດ້ເດີນທາງມາຢ້ຽມຢາມ ສັນຖະວະໄມຕີ ສປປ ລາວ ເພື່ອເຂົ້າຮ່ວມ ກອງປະຊຸມສອງຝ່າຍ ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສປ ຈີນ.

ພິທີຕ້ອນຮັບທາງການ ໄດ້ຈັດຂຶ້ນຢ່າງສົມກຽດ ຢູ່ທີ່ກະຊວງ ປ້ອງກັນຄວາມສະຫງົບ, ໂດຍການຕ້ອນຮັບຂອງ ທ່ານ ພົນຕີ ສົມແກ້ວ ສີລາວົງ ແລະ ມີຄະນະນຳ ກະຊວງດັ່ງກ່າວ ເຂົ້າຮ່ວມ, ຊຶ່ງການມາຢ້ຽມຢາມ ຂອງຄະນະຜູ້ແທນ ສປ ຈີນ ຄັ້ງນີ້, ໄດ້ເປັນຂີດໝາຍ ທີ່ສຳຄັນ ຕໍ່ສາຍພົວພັນທາງດ້ານການເມືອງ ຂອງສອງປະເທດ ແລະ ເປັນການປະກອບສ່ວນ ເພີ່ມທະວີສາຍພົວພັນມິດຕະພາບ, ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ເວົ້າລວມ, ເວົ້າສະເພາະ ແມ່ນການພົວພັນຮ່ວມມື ລະຫວ່າງສອງກະຊວງ ປ້ອງກັນຄວາມສະຫງົບ ໃຫ້ນັບມື້ແໜ້ນແຟ້ນຍິ່ງໆ ຂຶ້ນ.
ກອງປະຊຸມສອງຝ່າຍ ລະຫວ່າງ ກະຊວງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນ ຄວາມສະຫງົບ ແຫ່ງ ສປ ຈີນ ໄດ້ຈັດຂຶ້ນ ໃນວັນທີ 14 ພຶດສະພາ 2018, ໂດຍການ ເປັນປະທານຮ່ວມ ຂອງທ່ານ ພົນຕີ ສົມແກ້ວ ສີລາວົງ ແລະ ທ່ານ ຈ້າວ ເຄີຈື້ ເພື່ອຕີລາຄາ ຕໍ່ການພົວພັນຮ່ວມມື ລະຫວ່າງ ສອງກະຊວງໃນໄລຍະຜ່ານມາ ແລະ ເພື່ອປຶກສາຫາລືແລກປ່ຽນຄວາມຄິດຄວາມເຫັນ ນຳກັນ ກ່ຽວກັບທິດທາງຮ່ວມມືໃນຕໍ່ໜ້າ.
ໂອກາດນີ້, ທ່ານ ພົນຕີ ສົມແກ້ວ ສີລາວົງ ກ່າວວ່າ: ການພົບປະລະຫວ່າງ ສອງກະຊວງຂອງພວກເຮົາໃນຄັ້ງນີ້, ຈະເປັນການປະກອບສ່ວນເຂົ້າ ໃນການສືບຕໍ່ເສີມສ້າງສາຍພົວພັນ ມິດຕະພາບ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ກໍຄືປະຊາຊົນສອງຊາດລາວ -ຈີນ ໃຫ້ນັບມື້ແໜ້ນແຟ້ນຍິ່ງຂຶ້ນ, ໂດຍສະເພາະ ການຮ່ວມມື ລະຫວ່າງ ສອງກະຊວງ ໃນການຕ້ານການກໍ່ການຮ້າຍ, ອາຊະຍາກຳຂ້າມຂາດ, ການຄ້າຂາຍຢາເສບຕິດ, ການລັກລອບເຂົ້າ-ອອກຊາຍແດນ, ການຄ້າມະນຸດ, ການຮ່ວມມື ໃນການປົກປັກຮັກສາ ຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຕາມບໍລິເວນຊາຍແດນ, ການອຳນວຍຄວາມສະດວກ ແລະ ຄວາມປອດໄພ ໃຫ້ແກ່ ປະຊາຊົນສອງຊາດ ໃນການໄປມາຫາສູ່ກັນ ຢ່າງເປັນປົກກະຕິແນໃສ່ ເຮັດໃຫ້ຊາຍແດນ ລະຫວ່າງ ສອງປະເທດ ເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື.
ໃນກອງປະຊຸມຄັ້ງນີ້, ຄະນະຜູ້ແທນທັງສອງຝ່າຍ ໄດ້ພ້ອມກັນປຶກສາຫາລື ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ຢ່າງກົງໄປກົງມາໃນຫລາຍດ້ານ ເຊັ່ນ: ການຮ່ວມມື ໃນການປົກປັກຮັກສາຄວາມສະຫງົບ ແລະ ຄວາມໝັ້ນຄົງຂອງສອງປະເທດ, ການຮ່ວມມືໃນການຕ້ານ ການກໍ່ການຮ້າຍ, ການຮ່ວມມື ດ້ານວຽກງານຮັກສາ ຄວາມສະຫງົບຮຽບຮ້ອຍ ແລະ ຮັບປະກັນຄວາມປອດໄພ ໃຫ້ແກ່ພົນລະເມືອງຂອງ ສອງປະເທດ, ການຮ່ວມມືປ້ອງກັນໂຄງການ ທີ່ສຳຄັນລາວ-ຈີນ, ການຮ່ວມືດ້ານວຽກງານ ປົກປັກຮັກສາຊາຍແດນ ແລະ ການເຂົ້າ-ອອກ ຊາຍແດນ, ການຮ່ວມມືດ້ານວຽກງານປ້ອງກັນ ແລະ ປາບປາມຢາເສບຕິດ, ການຮ່ວມມືດ້ານວິຊາການ ແລະ ແລກປ່ຽນຄະນະຜູ້ແທນ ເຊິ່ງກັນ ແລະ ກັນ ແລະ ການຮ່ວມມືດ້ານອື່ນໆ. ຜ່ານການປຶກສາຫາລື, ທັງສອງຝ່າຍ ໄດ້ເປັນເອກະພາບສືບຕໍ່ຮ່ວມມືກັນ ໃນດ້ານວຽກງານຕ່າງໆ ແລະ ໄດ້ຮ່ວມລົງນາມ ເອກະສານຮ່ວມມືກັນທັງໝົດ 5 ສະບັບ ຄື: ບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ສ້າງຂີດຄວາມສາມາດ ໃນການເພີ່ມທະວີ ການປະຕິບັດກົດໝາຍ, ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືໄລ່ຊອກໄລ່ຈັບ ຜູ້ຖືກຫາທີ່ເອົາໂຕຫລົບໜີ, ໜັງສືມອບ-ຮັບການຊ່ວຍເຫລືອ ລະຫວ່າງລັດຖະມົນຕີ, ໜັງສືມອບ-ຮັບການຊ່ວຍເຫລືອ ລະຫວ່າງແຂວງ ຢຸນນານ ກັບກະຊວງປ້ອງກັນຄວາມສະຫງົບ ແລະ ເອກະສານຮ່ວມມື ລະຫວ່າງ ປ້ອງກັນຄວາມສະຫງົບນະຄອນຫລວງ, ຊຶ່ງເປັນກຽດລົງນາມ ໂດຍ ທ່ານ ພົນຕີ ສົມແກ້ວ ສີລາວົງ ແລະ ທ່ານ ຈ້າວ ເຄີຈື້ ໂດຍ ມີພະນັກງານສອງຝ່າຍ ເຂົ້າຮ່ວມເປັນສັກຂີພິຍານ.
ທ່ານ ພົນຕີ ສົມແກ້ວ ສີລາວົງ ສະແດງຄວາມເຊື່ອໝັ້ນວ່າ: ພາຍຫລັງກອງປະຊຸມຄັ້ງນີ້, ທຸກພາກສ່ວນທີ່ກ່ຽວຂ້ອງ ຂອງທັງສອງຝ່າຍ ຈະໄດ້ພ້ອມກັນຈັດຕັ້ງຜັນຂະຫຍາຍ ໝາກຜົນຂອງກອງປະຊຸມຄັ້ງນີ້, ໃຫ້ເປັນຮູບປະທຳ ຫລາຍຂຶ້ນກວ່າເກົ່າ ແນໃສ່ເພື່ອຜົນປະໂຫຍດລວມ ຂອງປະຊາຊົນສອງຊາດ, ເສີມຂະຫຍາຍສາຍພົວພັນມິດຕະພາບ, ການຮ່ວມມືຮອບດ້ານ ລະຫວ່າງ ສອງຊາດ ລາວ-ຈີນ, ຈີນ-ລາວ ໃຫ້ດີຂຶ້ນຢ່າງບໍ່ຢຸດຢັ້ງ.