ຫ້ອງການກະຊວງ ຖວທ ຍົກລະດັບວຽກງານຫ້ອງການທົ່ວປະເທດ

ຂປລ. ຫ້ອງການ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຈັດຊຸດຝຶກອົບຮົມ ກ່ຽວກັບວຽກງານຫ້ອງການ ໃນຫົວຂໍ້ “ເອກະສານທາງການ” ໃຫ້ແກ່ພະນັກງານພະແນກຖະແຫລງ ຂ່າວ, ວັດທະນະທຳ ແລະ ທ່ອງທ່ຽວແຂວງ, ນະຄອນຫລວງວຽງຈັນ ແລະ ຫ້ອງການມໍລະດົກໂລກ ຂຶ້ນໃນວັນທີ 10 ພຶດສະພາ 2018 ທີ່ຫໍວັດທະນະທຳແຫ່ງຊາດ, ໂດຍມີ ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ພ້ອມດ້ວຍສຳມະນາກອນ ທົ່ວປະເທດ ເຂົ້າຮ່ວມ.

ຊຸດຝຶກອົບຮົມດັ່ງກ່າວ, ຜູ້ເຂົ້າຮ່ວມທັງໝົດ ຈະໄດ້ຕີລາຖອດຖອນບົດຮຽນຄືນ ໃນການຮ່າງເອກະສານ, ດຳເນີນເອກະສານທາງການ ພາຍໃນກະຊວງ ວ່າມີຄວາມສະດວກ, ມີຂໍ້ຫຍຸ້ງຍາກ, ແນວໃດ ເພື່ອໃຫ້ຮັບຮູ້ເຖິງຄວາມສຳຄັນ ແລະ ຄວາມຈຳເປັນ ຂອງເອກະສານທາງການ; ເຊື່ອມຊຶມຮຽນຮູ້ ກ່ຽວກັບຂໍ້ກຳນົດ, ກົດໝາຍ, ລະບຽບຫລັກການໃນການຮ່າງ, ການດຳເນີນເອກະສານທາງການ ປະເພດຕ່າງໆ ໃຫ້ມີຄວາມເປັນເອກະພາບ, ຍົກສູງຄຸນນະພາບການເປັນເສນາທິການ ແລະ ການເປັນຜູ້ປະສານງານທີ່ດີ ປະຕິບັດຄຳຂວັນຫັນສູ່ “ທັນສະໄໝ, ສີວິໄລ ແລະ ຍືນຍົງ” ໃຫ້ປາກົດຜົນເປັນຈິງ.
ໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ໄດ້ສະແດງຄວາມຊົມເຊີຍ ຕໍ່ຫ້ອງການກະຊວງ ຖວທ ທີ່ໄດ້ຈັດຊຸດຝຶກອົບຮົມຄັ້ງນີ້, ເຊິ່ງເປັນການສ້າງບັນດາພະນັກງານ ທີ່ເຮັດວຽກກ່ຽວກັບຫ້ອງການ ໃນຂອບເຂດທົ່ວປະເທດ ໄດ້ຮຽນຮູ້ ແລະ ເຂົ້າໃຈວຽກງານ ເອກະສານທາງການ, ເຊິ່ງວຽກງານດັ່ງກ່າວ ເປັນວຽກງານໜຶ່ງ ທີ່ສຳຄັນຫລາຍ ເພາະວຽກງານເອກະສານທາງການນັ້ນ ເປັນວຽກທີ່ບັນດາກະຊວງ, ກົມກອງ, ຂະແໜງການ, ໜ່ວຍງານຕ່າງໆ ໄດ້ນຳໃຊ້ ເຂົ້າໃນວຽກງານເປັນປະຈຳ, ໂດຍສະເພາະ ແມ່ນຫ້ອງການທີ່ປະຕິບັດໜ້າທີ ໃນຖານະເປັນເສນາທິການ ແລະ ເປັນຜູ້ປະສານງານ, ບໍລິ ຫານ-ບໍລິການ ສ້າງສິ່ງອຳນວຍຄວາມສະດວກ, ເຮັດໜ້າທີ່ເປັນໃຈກາງ ປະສານງານ ລະຫວ່າງ ຂັ້ນລຸ່ມກັບຂັ້ນເທິງ, ຂັ້ນເທິງກັບຂັ້ນລຸ່ມ ໃຫ້ສາມາດເຄື່ອນໄຫວວຽກງານ ໃຫ້ມີຄວາມຄ່ອງຕົວ ແລະ ໄດ້ຮັບຜົນສຳເລັດ.
ພ້ອມນັ້ນ, ທ່ານ ລັດຖະມົນຕີ ຍັງໄດ້ຮຽກຮ້ອງໃຫ້ ວິຊາການ ຕ້ອງເອົາໃຈໃສ່ ແລະ ທຳຄວາມເຂົ້າໃຈ ດ້ານວິຊາສະເພາະ ແລະ ຈັນຍາບັນ ໃຫ້ສົມຄູ່ກັບໜ້າທີ່ ພາລະບົດບາດ ໃນການຄຸ້ມຄອງລັດ ໃຫ້ດີຂຶ້ນເທື່ອລະກ້າວ.