ປະທານປະເທດ ຕ້ອນຮັບຮອງປະທານ ຜູ້ປະຈຳການ ສະພາແຫ່ງຊາດ ຫວຽດນາມ

ຂປລ. ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂ່ຳນັບຂອງ ທ່ານ ນາງ ຕ໋ອງ ທິ ຝ໋ອງ ຮອງປະທານ ຜູ້ປະຈຳການ ສະພາແຫ່ງຊາດ ແຫ່ງ ສສ ຫວຽດນາມ ພ້ອມດ້ວຍຄະນະ ໃນ ວັນທີ 24 ເມສາ 2018 ທີ່ທຳນຽບ ປະທານປະເທດ ໃນໂອກາດເດີນທາງຢ້ຽມຢາມ ແລະ ແລກປ່ຽນບົດຮຽນ ຢ່າງເປັນທາງການ ຢູ່ ສປປ ລາວ ໃນ ລະຫວ່າງ ວັນທີ 23-26 ເມສາ ນີ້.

ໂອກາດນີ້, ທ່ານ ປະທານປະເທດ ບຸນຍັງ ວໍລະຈິດ ກໍໄດ້ກ່າວສະແດງ ຄວາມຍິນດີຕ້ອນຮັບຕໍ່ ທ່ານ ນາງ ຕ໋ອງ ທິ ຝ໋ອງ ທີ່ໄດ້ນຳພາຄະນະ ເດີນທາງມາເຄື່ອນໄຫວຢ້ຽມຢາມ ແລະ ແລກປ່ຽນບົດ ຮຽນຢູ່ ສປປ ລາວ ຢ່າງເປັນທາງການ ໂດຍເຊື່ອໝັ້ນວ່າ ການມາຢ້ຽມຢາມຄັ້ງນີ້ ຈະປະກອບສ່ວນສຳຄັນ ໃນການເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມ ມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ເຕີບ ໃຫຍ່ຂະຫຍາຍຕົວ ແລະ ເກີດດອກອອກຜົນຍິ່ງໆ ຂຶ້ນ. ພ້ອມນັ້ນ, ຍັງໄດ້ຕີລາຄາສູງ ທີ່ເຫັນວ່າ ການພົວ ພັນຮ່ວມມື ລະຫວ່າງສອງປະເທດ ໂດຍສະເພາະ ສອງສະພາແຫ່ງຊາດ ໃນໄລຍະຜ່ານມາ ກໍຄື ປັດຈຸບັນ ສືບຕໍ່ໄດ້ຮັບການເພີ່ມພູນ ຄູນສ້າງ ແລະ ພັດທະນາຂຶ້ນຢ່າງບໍ່ຢຸດຢັ້ງ ໃນທຸກຂົງເຂດ ວຽກງານ.
ໃນໂອກາດດຽວກັນ, ທ່ານ ນາງ ຕ໋ອງ ທິ ຝ໋ອງ ໄດ້ສະແດງຄວາມຂອບໃຈ ມາຍັງທ່ານ ບຸນຍັງ ວໍລະຈິດ ທີ່ໄດ້ສະຫລະເວລາ ອັນມີຄຸນຄ່າ ໃຫ້ການຕ້ອນຮັບ ອັນອົບອຸ່ນ ໃນຄັ້ງນີ້, ພ້ອມທັງໄດ້ລາຍງານກ່ຽວກັບ ຈຸດປະສົງ ຂອງການເດີນທາງມາ ຢ້ຽມຢາມ ສປປ ລາວ ໃນຄັ້ງນີ້ໃຫ້ທ່ານ ປະທານປະເທດຊາບ ຕື່ມອີກ.