ປາຖະກະຖາບາງບົດຮຽນ ຂອງສະພາແຫ່ງຊາດ ສສ. ຫວຽດນາມ

ຂປລ. ໃນ ວັນທີ 24 ເມສາ 2018 ທີ່ ນະຄອນຫລວງວຽງຈັນ, ສະພາແຫ່ງຊາດລາວ ໄດ້ຈັດກອງປະຊຸມ ປາຖະກະຖາບາງບົດຮຽນ ຂອງ ສະພາແຫ່ງຊາດ ສສ.ຫວຽດນາມ ກ່ຽວກັບຂັ້ນຕອນ ການລົງມະຕິໄວ້ວາງໃຈ ຕາມມະຕິ ຂອງສະພາແຫ່ງຊາດຫວຽດນາມ ຊຸດທີ XIII ສະບັບ ເລກທີ 85/ 2014/QH13,

ການລົງມະຕິໄວ້ວາງໃຈຕໍ່ ບຸກຄະລາກອນ ທີ່ສະພາແຫ່ງຊາດ ຫລື ສະພາປະຊາຊົນຂັ້ນແຂວງ ເລືອກຕັ້ງ ແລະ ຮັບຮອງເອົາການແຕ່ງຕັ້ງ, ໂດຍການ ເປັນປະທານຂອງ ທ່ານ ນາງ ປານີ ຢາທໍ່ຕູ້ ກຳມະການກົມການເມືອງ ສູນກາງພັກ, ປະທານ ສະພາແຫ່ງຊາດ, ທ່ານ ນາງ ຕ໋ອງ ທິ ຝອງ ກຳມະການກົມການເມືອງສູນກາງພັກ ກອມມູນິດຫວຽດນາມ, ຜູ້ປະຈຳການ ສະພາແຫ່ງຊາດ ສສ.ຫວຽດນາມ ແລະ ທ່ານ ສົມພັນ ແພງຄຳມີ ກຳມະການກົມການເມືອງສູນກາງພັກ, ຮອງ ປະທານສະພາແຫ່ງຊາດ ມີບັນດາການນຳພັກ-ລັດ, ສະມາຊິກສະພາແຫ່ງຊາດ ແລະ ພະນັກງານທີ່ກ່ຽວຂ້ອງ ເຂົ້າຮ່ວມ.
ທ່ານ ສົມພັນ ແພງຄຳມີ ກ່າວວ່າ: ກອງປະຊຸມຄັ້ງນີ້, ແມ່ນມີເນື້ອໃນ ທີ່ສຳຄັນ, ສືບຕໍ່ຢັ້ງຢືນ ເຖິງຄວາມໄວ້ເນື້ອເຊື່ອໃຈ ດ້ານການເມືອງ, ແບ່ງປັນແລກປ່ຽນປະສົບການ ລະຫວ່າງ ສອງສະພາແຫ່ງຊາດ ກໍຄື ການຢັ້ງຢືນ ຄວາມຮອບຄອບ ຂອງສອງສະພາແຫ່ງຊາດ, ຍົກສູງຄວາມຮັບຜິດຊອບ ຕໍ່ກັບບັນຫາຕ່າງໆ ທີ່ສຳຄັນ ຂອງປະເທດ, ໂດຍສະເພາະ ແມ່ນການປຶກສາຫາລື ບັນຫາ ທີ່ເປັນຮາກຖານສຳຄັນ ທີ່ກ່ຽວພັນເຖິງພະນັກງານ ແລະ ບຸກຄະລາກອນຂອງລັດ.
ທ່ານ ນາງ ຕ໋ອງ ທີ ຝອງ ກ່າວວ່າ: ການລົງມະຕິໄວ້ວາງໃຈ ໄດ້ບັນລຸຈຸດປະສົງ ແມ່ນການເພີ່ມທະວີປະສິດທິພາບ ການຕິດຕາມກວດກາ, ຮັບປະກັນເພື່ອໃຫ້ສະພາແຫ່ງຊາດ, ສະພາປະຊາຊົນປະຕິບັດໜ້າທີ່ ຄວາມຮັບຜິດຊອບ ທີ່ເປັນອົງການອຳນາດແຫ່ງລັດ, ອົງການຕົວແທນ ຂອງປະຊາຊົນ, ຕາງໜ້າ ປະຊາຊົນຕິດຕາມກວດກາ ຜູ້ທີ່ດຳລົງຕຳແໜ່ງ ໃນການປະຕິບັດໜ້າທີ່ ຮັບຜິດຊອບ, ໜ້າທີ່ໆ ຖືກມອບໝາຍ, ຍົກສູງຄວາມຮັບຜິດຊອບກວ່າເກົ່າ ຂອງບັນດາທ່ານຕໍ່ສະພາແຫ່ງຊາດ, ສະພາປະຊາຊົນ, ຕໍ່ຜູ້ມີສິດເລືອກຕັ້ງ, ຕໍ່ທ້ອງຖິ່ນ. ພ້ອມກັນນີ້, ກໍໄດ້ຕອບສະໜອງ ຄວາມຮຽກຮ້ອງຂອງພະນັກງານ ຕໍ່ວຽກງານ, ເພີ່ມເຕີມບ່ອນອີງທີ່ສຳຄັນ ເພື່ອປະຕິບັດວຽກງານກຳນົດວາງແຜນ, ຕີລາຄາ, ຊັບຊ້ອນ, ນຳໃຊ້ພະນັກງານ ແບບມີປະສິດທິພາບ ເພື່ອຊັບຊ້ອນ ໃຫ້ຖືກວຽກຖືກຄົນ. ສົ່ງເສີມໃຫ້ຜູ້ທີ່ໄດ້ຮັບ ຄວາມໄວ້ວາງໃຈຕ່ຳ ສະໝັກໃຈລາອອກຈາກຕຳແໜ່ງ, ຄຸ້ມຄອງຄົນ ຜູ້ທີ່ບໍ່ເຮັດສຳເລັດໜ້າທີ່ຮັບ ຜິດຊອບ, ໜ້າທີ່ໆໄດ້ມອບໝາຍ ໂດຍບໍ່ລໍຖ້າຈົນຮອດໝົດວາ ລະສະໄໝ ຫລື ຮອດອາຍຸການບຳນານ.