ພະນັກງານ ກະຊວງ ຖວທ ໄດ້ຮັບການຍົກລະດັບວຽກງານເອກະສານທາງການ

ຂປລ. ກະຊວງ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດຊຸດຝຶກອົບຮົບ ວຽກງານຫ້ອງການ ໃນຫົວຂໍ້ “ເອກະສານທາງການ” ໃຫ້ແກ່ພະນັກງານ ຜູ້ທີ່ເຮັດວຽກກ່ຽວກັບຫ້ອງການ ໃນບັນດາກົມ, ກອງ, ສະຖາບັນ, ໂຮງຮຽນ, ແລະ ລັດວິສາຫະກິດ ອ້ອມຂ້າງກະຊວງ ຖວທ ເພື່ອເປັນການຍົກລະດັບ ຄວາມຮູ້ ຄວາມສາມາດ ໃຫ້ພະນັກງານ ໃນການຮ່າງ ແລະ ການດຳເນີນເອກະສານ ທາງການປະເພດຕ່າງໆ ໃຫ້ມີຄວາມເປັນເອກະພາບກັນ ໃນທົ່ວປະເທດ.

ການຈັດ ຝຶກອົບຮົບຄັ້ງນີ້, ຈະດຳເນີນ ໄປເປັນເວລາ 2 ວັນ (28-29 ມີນາ 2018) ທີ່ນະ ຄອນຫລວງວຽງຈັນ, ໂດຍການເປັນປະທານ ຂອງ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ບັນລະຍາຍໂດຍ ພະນັກງານວິຊາການຈາກ ກົມເອກະສານ ແຫ່ງຊາດ, ກະຊວງພາຍໃນ.
ຈຸດປະສົງ ຂອງການຝຶກອົບຮົມ ແມ່ນເພື່ອ ເປັນການຕີລາຄາຖອດຖອນບົດຮຽນ ຄືນ ໃນການຮ່າງເອກະສານ, ດຳເນີນເອກະສານທາງການ ພາຍໃນກະຊວງ ຖວທ ໃນໄລຍະຜ່ານມາ ວ່າມີຂໍ້ສະດວກ, ມີຂໍ້ຫຍຸ້ງຍາກ, ມີອັນຖືກຕ້ອງ ແລະ ມີອັນໃດຜິດພາດ ແນວໃດ; ເພື່ອໃຫ້ນັກສຳມະນາກອນ ຮັບຮູ້ເຖິງຄວາມໝາຍຄວາມສຳຄັນ ແລະ ຄວາມຈຳເປັນ ຂອງເອກະສານທາງການ ແລະ ເພື່ອເປັນການເຊື່ອມຊຶມ ຮຽນຮູ້ກຽ່ວກັບຂໍ້ກຳນົດ, ກົດໝາຍ, ລະບຽບຫລັກການ ໃນການຮ່າງ, ການດຳເນີນເອກະສານທາງການ ປະເພດຕ່າງໆ ໃຫ້ມີຄວາມເປັນເອກະພາບ ເພື່ອຍົກສູງຄຸນນະພາບ ການເປັນເສນາທິການ ແລະ ການເປັນຜູ້ປະສານງານ ທີ່ດີ ປະຕິບັດຄຳຂັວນຫັນສູ່ “ທັນສະໄໝ, ສີວິໄລ ແລະ ຍືນຍົງ”, ຊຶ່ງ ເປັນຄຳຂວັນ ທີ່ຫ້ອງການ ກະຊວງ ຖວທ ໄດ້ມີວິໄສທັດ ໃຫ້ປະກົດຜົນເປັນຈິງ.
ທ່ານ ບົວເງິນ ຊາພູວົງ ກ່າວວ່າ: ຊຸດຝຶກ ອົບຮົມຄັ້ງນີ້, ແມ່ນມີຄວາມໝາຍ ຄວາມສຳຄັນຫລາຍ ເພາະວຽກເອກະສານ ທາງການນັ້ນ ເປັນວຽກທີ່ບັນດາ ກະຊວງ, ກົມກອງ, ຂະແໜງການ, ໜ່ວຍງານຕ່າງໆ ໄດ້ນຳໃຊ້ເຂົ້າ ໃນວຽກງານປະຈຳວັນ, ໂດຍສະເພາະ ແມ່ນຫ້ອງການທີ່ປະຕິບັດໜ້າທີ່ ໃນຖານະເປັນເສນາທິການ ແລະ ເປັນຜູ້ປະສານງານ, ບໍລິຫານ-ບໍລິການ ສ້າງສິ່ງ ອຳນວຍຄວາມສະດວກ, ເຮັດໜ້າທີ່ເປັນໃຈກາງ ປະສານງານ ລະຫວ່າງ ຂັ້ນລຸ່ມກັບຂັ້ນເທິງ, ຂັ້ນເທິງກັບຂັ້ນລຸ່ມ ໃຫ້ສາມາດເຄື່ອນໄຫວ ວຽກງານໃຫ້ມີຄວາມຄ່ອງຕົວ ແລະ ໄດ້ຮັບຜົນສຳເລັດ.
ເພື່ອຮັບປະກັນເຮັດໃຫ້ການດຳເນີນບັ້ນຝຶກອົບຮົມ ດັ່ງກ່າວ ບັນລຸຜົນສຳເລັດ ຕາມຈຸດປະສົງ ແລະ ລະດັບຄາດໝາຍ ທີ່ວາງໄວ້ນັ້ນ, ທ່ານ ບົວເງິນ ຊາພູວົງ ໄດ້ຮຽກຮ້ອງ ມາຍັງສຳມະນາກອນຈົ່ງເອົາໃຈໃສ່ ຕິດຕາມຮັບຟັງການສິດສອນ, ເອົາໃຈໃສ່ ປະກອບ ຄຳຄິດຄຳເຫັນແລກປ່ຽນບົດຮຽນ ທີ່ດີຮ່ວມກັນ ເພື່ອເປັນບົດຮຽນ ນຳໄປໝູນໃຊ້ເຂົ້າສູ່ວຽກງານຕົວຈິງ ໃນຕໍ່ໜ້າ.