ເມືອງປາກລາຍ ຈັດເທສະຫານບຸນຜີໂຂນ ພ້ອມສະເຫລີມສະຫລອງປີທ່ອງທ່ຽວລາວ 2018

ຂປລ. ໃນ ວັນທີ 28 ກຸມພາ 2018, ເມືອງປາກລາຍ ແຂວງ ໄຊຍະບູລີ ໄດ້ຈັດເທສະການບຸນຜີໂຂນ ແລະ ສະເຫລີມສະຫລອງ ປີທ່ອງທ່ຽວລາວ 2018 ໂດຍມີ ທ່ານ ພົງສະຫວັນ ສິດທະວົງ ເຈົ້າ ແຂວງ ໄຊຍະບູລີ, ມີຜູ້ປະກອບການທຸລະກິດ, ພ້ອມດ້ວຍ ພໍ່ແມ່ປະຊາຊົນ ແລະ ພາກສ່ວນທີ່ກ່ຽວຂ້້ອງ ເຂົ້າຮ່ວມ.

ເຊິ່ງການຈັດງານດັ່ງກ່າວ ເປັນການເຜີຍແຜ່ແນວທາງ ນະໂຍບາຍຂອງ ພັກ-ລັດ ກໍຄື ຜົນສຳເລັດ ໃນການສ້າງສາພັດທະນາ ເມືອງປາກລາຍ, ເປັນການຊຸກຍູ້ ປຸກລະດົມຂະບວນການພັດທະນາ ແລະ ສົ່ງເສີມ ການທ່ອງທ່ຽວເມືອງ ໃຫ້ມີການຂະຫຍາຍຕົວ ຢ່າງແຂງແຮງຕໍ່ເນື່ອງ ແລະ ຍືນຍົງ, ຍົກສູງຄຸນະພາບ ຂອງການບໍລິການທ່ອງທ່ຽວ ໃຫ້ເປັນທີ່ປະທັບໃຈ ຮັບປະກັນ ຄວາມປອດໄພຂອງນັກທ່ອງທ່ຽວ, ສະໜອງການບໍລິການ ດ້ານການທ່ອງທ່ຽວທີ່ ຫລາກຫລາຍ ເພື່ອໃຫ້ມີຫລາຍທາງເລືອກ ແລະ ສ້າງຄວາມພໍໃຈ ໃຫ້ແກ່ຜູ້ທີ່ມາຢ້ຽມຢາມ ແລະ ມາທ່ອງທ່ຽວ ເມືອງປາກລາຍ.
ທ່ານ ບຸນລັບ ແສງອາພອນ ເຈົ້າເມືອງປາກລາຍ ໄດ້ກ່າວໃນພິທີເປີດງານ ຄັ້ງນີ້ວ່າ: ການຈັດ ເທສະການບຸນຜີໂຂນ ຂອງເມືອງປາກລາຍ ເນື້ອແທ້ກໍແມ່ນ ການສືບຕໍ່ປົກປັກຮັກສາ ແລະ ເສີມຂະຫຍາຍ ວັດທະນະທຳ, ຮີດຄອງປະເພນີ ອັນດີງານຂອງຊາດ, ຂອງທ້ອງຖິ່ນ, ເປັນການສືບທອດ ມູນເຊື້ອກໍຄືການດຳລົງຊີວິດ ທີ່ອຸດົມສົມບູນຂອງປະຊາຊົນ ເມືອງປາກລາຍ ໃຫ້ຍືນຍົງໄປຊົ່ວລູກຊົ່ວຫລານ, ອີກອັນໜຶ່ງ ກໍເພື່ອເປັນການສົ່ງເສີມການທ່ອງທ່ຽວ ທາງດ້ານວັດທະນະທຳ ແລະ ທຳມະຊາດ ເຊິ່ງເມືອງປາກລາຍ ມີແຫລ່ງທ່ອງທ່ຽວ ທາງປະຫວັດສາດ, ປູນິຍະສະຖານເກົ່າແກ່ ທີ່ເປັນເອກະລັກຂອງເມືອງເຊັ່ນ: ຫໍຄຳ, ຄ້າຍຄຸກເຮືອນຝຣັ່ງ, ວັດສີສະຫວ່າງວົງ ແລະ ວັດສີສະອາດຊົມພູ ແລະ ມີແຫລ່ງທ່ອງທ່ຽວທາງທຳມະຊາດ ທີ່ສວຍງາມອີກຫລາຍແຫ່ງ.
ພາຍໃນງານ ປະກອບມີຫລາຍກິດຈະກໍາ ທີ່ສະແດງເຖິງ ຄວາມອຸດົມສົມບູນ ຂອງເມືອງ ປາກລາຍ ໃນນັ້ນ ປະກອບມີ: ພິທີປ່ອຍ ຂະບວນຜີໂຂນ, ການສະແດງ ສິນຄ້າກະສິກຳ, ຫັດຖະກຳ ຂອງປະຊາຊົນ, ການແຂ່ງຂັນກິລາ ເຮືອເຈັດສະກີ, ຊົມການປະກວດ ເດັກໜ້າຮັກ, ຄັດເລືອກ ກັນຫາ-ສາລີ, ຊົມການເດີນແບບ ອາພອນເພດຊົງລາວ ແລະ ການປະກວດ ທິດາ-ພຣະເຫວດສັນດອນ, ຂີ່ເຮືອທ່ຽວຊົມສອງຝາກ-ຝັ່ງແມ່ນໍ້າ ຂອງ, ພິທີແຫ່ພະເຫວດສັນດອນ ເຂົ້າເມືອງ ແລະ ຂະບວນຂອງ ຜີໂຂນ, ຊົມການສະແດງ ສິລະປະວັນນະຄະດີ ແລະ ການປະກວດ ນັກຮ້ອງສຽງດີ, ແຂ່ງຂັນຈູດບັ້ງໄຟດອກ ຂອງແຕ່ລະບ້ານ ແລະ ການປ່ອຍໂຄມໄຟ, ຊົມການແຂ່ງຂັນ ຊ່ວງເຮືອຊາຍ 12 ສີພາຍ.