ລັດຖະມົນຕີ ຖວທ ຮ່ວມງານວັນລາວ ທີ່ປະເທດໄທ

ຂປລ.ໃນວັນທີ 23 ມັງກອນ 2018, ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ກຽດເຂົ້າຮ່ວມງານວັນລາວ ທີ່ຈັງຫວັດຊຽງໃໝ່ ຣາຊະອາ ນາຈັກໄທ ເຊິ່ງໃນງານໄດ້ຈັດໃຫ້ມີຫລາກຫລາຍກິດຈະກຳ, ພ້ອມທັງມີການນຳສະເໜີລາຍການສະແດງສິ ລະປະວັນນະຄະດີ ທີ່ເປັນເອກະລັກວັດທະນະທຳລາວ ກໍຄື ຮີດຄອງປະເພນີອັນດີງາມຂອງປະຊາຊົນລາວບັນດາເຜົ່າ.

ໃນໂອກາດນີ້, ທ່ານ ບໍ່ແສງຄຳ ວົງດາລາ ຊີ້ໃຫ້ເຫັນວ່າ: ການທ່ອງທ່ຽວແມ່ນຂະແໜງໜຶ່ງທາງເສດຖະກິດ ທີ່ໄດ້ຮັບການຂະຫຍາຍຕົວຢ່າງຕໍ່ເນື່ອງ ແລະ ວ່ອງໄວ ຢູ່ຫລາຍປະເທດໃນພາກພື້ນ ແລະ ໃນໂລກ. ລັດຖະບານ ແຫ່ງ ສປປ ລາວ ກໍໄດ້ຖືເອົາຂະແໜງການທ່ອງທ່ຽວ ເປັນໜຶ່ງໃນຂະແໜງບູລິມະສິດຍຸດທະສາດ ໃນການພັດທະນາເສດຖະກິດ-ສັງຄົມຂອງຊາດ ໂດຍໄດ້ກຳນົດນະໂຍບາຍດ້ານການທ່ອງ ທ່ຽວ ທັງດ້ານວັດທະນະທຳ, ທຳມະຊາດ ແລະ ດ້ານປະຫວັດສາດ ເປັນທ່າແຮງດຶງດູດນັກທ່ອງທ່ຽວສາ ກົນໃຫ້ໄປທ່ຽວປະເທດລາວນັບມື້ຫລາຍຂຶ້ນ.
ລັດຖະບານ ສປປ ລາວ ໄດ້ປະກາດປີ 2018 ເປັນປີທ່ອງທ່ຽວລາວ ແລະ ໄດ້ສ້າງບັນດາກິດຈະ ກຳການທ່ອງທ່ຽວ, ພື້ນຖານໂຄງລ່າງ, ສິ່ງຮອງຮັບ ແລະ ອື່ນໆ ເພື່ອບໍລິການແກ່ນັກທ່ອງທ່ຽວ. ສຳລັບງານວັນລາວໃນຄັ້ງນີ້, ຈະໄດ້ສ້າງຄວາມປະທັບໃຈ ຄວາມມ່ວນຊື່ນໃຫ້ແກ່ແຂກ ແລະ ມວນຊົນ ທີ່ເຂົ້າມາຮ່ວມງານ ລວມທັງນັກທ່ອງທ່ຽວ ຈຶ່ງຂໍເຊີນຊວນທຸກທ່ານໄປທ່ຽວໄປເບິ່ງປະເທດລາວ ອັນສວຍສົດງົດງາມອີກດ້ວຍ.