10 ສະຖານທີ່ທີ່ຕ້ອງໄປ

1.ຖ້ຳຕິ່ງ ( ຖ້ຳປາກອູ )

 

ຖ້ຳຕິ່ງ ຫຼື ຖ້ຳປາກອູຕັ້ງຢູ່ແຄມແມ່ນ້ຳຂອງເຂດບ້ານ ແລະ ເມືອງປາກອູ, ຫ່າງຈາກຕົວເມືອງຫຼວງພະບາງໄປທາງເໜືອຕາມລຳນ້ຳຂອງ ປະມານ 32 ກມ, ເຊິ່ງສະດວກທີ່ສຸດແມ່ນເດີນທາງໄປທາງເຮືອ ລ່ອງໄປຕາມລຳນ້ຳຂອງ ໂດຍມີເຮືອບໍລິສັດທ່ອງທ່ຽວ ແລະ ເຮືອເອກະຊົນຈຳນວນໜຶ່ງໄວ້ຄອຍບໍລິການທ່ານເປັນປະຈຳທຸກມື້. ຖ້ຳດັ່ງກ່າວປະກອບດ້ວຍ 2 ຖ້ຳ ຄື: ຖ້ຳຕິ່ງລຸ່ມ ແລະ ຖ້ຳຕິ່ງເທິງ, ເປັນຖ້ຳທຳມະຊາດທີ່ເກີດຈາກໜ່ວຍພູໜຶ່ງທີ່ຕັ້ງຢູ່ແຄມຝັ່ງແມ່ນ້ຳຂອງເບື້ອງທິດຕາເວັນຕົກ ກົງກັນຂ້າມກັບບ້ານປາກອູ ( ບ່ອນນ້ຳອູໄຫຼລົງໃສ່ນ້ຳຂອງ ). ຖ້ຳຕິ່ງເປັນບ່ອນສັກກາລະບູຊາທາງສາດສະໜາເປັນທີ່ນັບຖືຂອງປະຊາຊົນຂົງເຂດນີ້ທີ່ຍັງຄົງຖືຜີ ຫຼື ເທວາພິບານທຳມະຊາດຢູ່. ຖ້ຳຕິ່ງເປີດໃຫ້ເຂົ້າທ່ຽວຊົມທຸກມື້ ເວລາ 8:00–16:30ໂມງ.


 

2.ພະທາດຫຼວງວຽງຈັນ

ພະທາດຫຼວງວຽງຈັນ ປະກາຍສີທອງຄຳອັນຮຸ່ງເຮືອງ ຕັ້ງຢູ່ຢ່າງໂດດເດັ່ນທີ່ເຂດບ້ານທາດຫຼວງ ເມືອງໄຊເສດຖາ ເປັນປູຊະນິຍະສະຖານບູຮານອັນເປັນສັນຍາລັກຂອງປະເທດລາວ, ເປັນພະທາດໂລກະຈຸນມະນີ ທີ່ບັນຈຸພະສາລິຣິກະທາດຂອງພະພຸດທະເຈົ້າ ແລະ ເປັນສູນລວມແຫ່ງຈິດວິນຍານຂອງປວງຊົນລາວທັງຊາດ. ພະທາດຫຼວງຖືກສ້າງຕັ້ງຂຶ້ນເທື່ອທຳອິດໃນປີ ພສ 236 ໂດຍ ການນຳພາຂອງເຈົ້າເມືອງວຽງຈັນ ຈັນທະບູລີປະສິດທິສັກ ຫຼື ບູລີຈັນ ເຊິ່ງທຳອິດມີລັກສະນະຄ້າຍຄືອຸໂມງຫີນ ກວ້າງ 10 ແມັດ ສູງ 9 ແມັດ ແລະ ຖືກສ້າງຕໍ່ເຕີມອີກໃນປີ ຄສ 1566 ໂດຍເຈົ້າໄຊເສດຖາທິຣາຊ ໃນຕອນທີ່ເພິ່ນຍ້າຍເມືອງຫຼວງຈາກຊຽງທອງ ( ຫຼວງພະບາງ ) ມາວຽງຈັນ ໂດຍໄດ້ສ້າງເປັນທາດໃຫຍ່ກວມອຸໂມງຫີນອັນເກົ່າພ້ອມສ້າງພະທາດນ້ອຍ 30 ອົງເປັນບໍລິເວນອ້ອມພະທາດໃຫຍ່ ເອີ້ນວ່າປາລະມີສາມສິບທັດ, ພ້ອມກົມມະລຽນດ້ານນອກແຕ່ລະດ້ານຍາວ 91,75 ແມັດ ແລະ ຫໍໄຫວ້ທັງສີ່ທິດ. ພະທາດຫຼວງມີລວງສູງ 45 ແມັດ, ມີໃບສີມາອ້ອມ 228 ໃບ, ຕີນພະທາດແຕ່ດ້ານຕາເວັນອອກຫາຕາເວັນຕົກຍາວ 69 ແມັດ, ແຕ່ດ້ານເໜືອຫາໃຕ້ຍາວ 68 ແມັດ. ນອກນັ້ນ ເພິ່ນຍັງໄດ້ຫຼໍ່ຄຳໜັກສີ່ບາດ ບັນຈຸໄວ້ໃນທາດນ້ອຍແຕ່ລະທາດ, ມີໃບລານທີ່ເຮັດດ້ວຍຄຳ ຈາລຶກພາສາບາລີ ດ້ວຍອັກສອນທຳໄວ້ຮອງແຕ່ລະທາດ, ແຕ່ກໍ່ຖືກທຳລາຍໃນສະໄໝສັກດີນາຕ່າງດ້າວ ເຂົ້າມາຮຸກຮານ. ພະທາດຫຼວງໄດ້ຮັບການບູລະນະໃໝ່ໃນປີ ຄສ 1953 ແລະ ມາຮອດປີ 1957 ລັດຖະບານລາວພາຍໃຕ້ພະບໍລົມມະຊູປະຖຳຂອງເຈົ້າສີສະຫວ່າງວົງ ກໍ່ໄດ້ພາປະຊາຊົນ ເຮັດບຸນສະເຫຼີມສະຫຼອງພະພຸດທະສາສະໜາ ຄົບຮອບ 2500 ປີ ( ພສ 2500 ) ໂດຍໄດ້ທຳການຟອກຄຳຈາກສ່ວນກາງຂຶ້ນໄປ ແລະ ໄດ້ປັ້ນພະບໍລົມມະຮູບຂອງເຈົ້າໄຊເຊດຖາທິຣາຊປະດິດສະຖານໄວ້ຢູ່ໜ້າທາງເຂົ້າດ້ານຕາເວັນຕົກ ເພື່ອເປັນອະນຸສາວະລີທີ່ພະອົງໄດ້ສ້າງພະທາດຫຼວງ ຂຶ້ນມາເປັນສັກກະລະ ບູຊາ ຈົນຮອດປະຈຸບັນ. ໃນວັນເພັງເດືອນສິບສອງຂອງທຸກໆປີ ( ໄລຍະເດືອນຕຸລາ-ພະຈິກ ) ປະຊາຊົນລາວຈາກທົ່ວທຸກສາລະທິດ ຈະພາກັນເດີນທາງມາສະເຫຼີມສະຫຼອງ ບຸນນະມັດສະການພະທາດຫຼວງເຊິ່ງເປັນບຸນມະໂຫລານທີ່ໃຫຍ່ທີ່ສຸດໃນປະເທດລາວຈັດຂຶ້ນເປັນເວລາ 7 ມື້ 7 ຄືນ ພ້ອມການສະແດງມາໂຫລີສິລະປະວັນນະຄະດີ ແລະ ງານວາງສະແດງສິນຄ້າຈາກຫຼາກຫຼາຍຫ້າງຮ້ານ. ບຸນທາດຫຼວງສະແດງໃຫ້ເຫັນເຖິງວັດທະນະທຳ ແລະ ຮີດຄອງປະເພນີອັນດີງາມຂອງຊາວພຸດກໍ່ຄືຊາວລາວທັງຊາດ ໂດຍມີພິທີສຳຄັນທາງສາສະໜາເຊັ່ນ: ພິທີແຫ່ຜາສາດເຜິ້ງ, ວຽນທຽນ ແລະ ຕັກບາດຖວາຍທານ ເຊິ່ງມີພະສົງຈາກທົ່ວທຸກແຂວງໃນປະເທດລາວເດີນທາງມາ ແລະ ພາຍຫຼັງຕັກບາດກໍ່ມີການຕີຄີເຊິ່ງເປັນກິລາພື້ນເມືອງທີ່ຈັດຂຶ້ນທຸກໆປີໆ. ພະທາດຫຼວງເປີດໃຫ້ເຂົ້າທ່ຽວຊົມ ວັນອັງຄານ-ວັນອາທິດ ເວລາ 8:00-12:00 ໂມງ, 13:00-16:00 ໂມງ ( ປິດວັນຈັນ ).


3.ວັດພູຈຳປາສັກ

ວັດພູສ່ອງແສງໃຫ້ເຫັນເຖິງຄວາມຈະເລີນຮຸ່ງເຮືອງທາງດ້ານວັດທະນະທຳໃນສະໄໝກ່ອນ, ເປັນສະຖານທີ່ທ່ອງທ່ຽວທີ່ມີຄວາມສວຍສົດງົດງາມ ແລະ ໜ້າອັດສະຈັນໃຈຫຼາຍ ເຊິ່ງໄດ້ຖືກຮັບຮອງໃຫ້ເປັນມໍລະດົກໂລກ ຈາກອົງການຢູເນສໂກ. ວັດພູຕັ້ງຢູ່ຫ່າງຈາກຕົວເມືອງປາກເຊໄປປະມານ 40 ກມ ເປັນປູຊະນິຍະສະຖານອັນສຳຄັນ ແລະ ເປັນສະຖາປັດຕະຍະກຳຈາກຍຸກອັງກໍວັດໃນໄລຍະສະຕະວັດທີ 7-12, ວັດພູເປັນໃຈກາງວັດທະນະທຳຂອງຂົງເຂດທົ່ງພຽງຈຳປາສັກໂດຍມີຈອມພູເກົ້າເປັນຈຸດສຸມ. ວັດພູກວມເອົາເນື້ອທີ່ກວ່າ 400 ເຮັກຕາ ເຊິ່ງພາຍໃນບໍລິເວນນີ້ ປະກອບດ້ວຍວັດວາອາຮາມ, ອ່າງເກັບນ້ຳ ( ໜອງນ້ຳບູຮານ ), ຮ່ອງລະບາຍນ້ຳ, ແຫຼ່ງຕັດຫີນ, ຖະໜົນບູຮານ ທີ່ເຊື່ອມຕໍ່ໄປຫາອັງກໍວັດລວມທັງແຜນຜັງ ເມືອງເກົ່າໃນຍຸກເລີ່ມຕົ້ນຂອງອານາຈັກຂະແມ ( ຕໍ່ມາໄດ້ກາຍເປັນເມືອງບູຮານ ). ນອນນັ້ນ ກໍ່ຍັງມີແຫຼ່ງທີ່ຕັ້ງຊຸມຊົນ ແຫ່ງທີ 2 ໃນຍຸກອັງກໍວັດຢູ່ທາງຕອນໃຕ້ຂອງວັດພູອີກເຊິ່ງລວມມີໂຮງນາງສີດາ, ໂຮງທ້າວເຕົ່າ ແລະ ວັດໂຕະໂໝະຢູ່ເບື້ອງຕາເວັນອອກຝັ່ງແມ່ນ້ຳຂອງ, ໃນເດືອນສາມເພັງ ( ເດືອນລາວ ) ຂອງທຸກປີປະຊາຊົນຈາກທົ່ວທຸກສາລະທິດຈະພາກັນເດີນທາງມາກາບໄຫວ້ ສັກກາລະບູຊາໃນງານບຸນນະມັດສະການຜາສາດຫີນວັດພູຈຳປາສັກແຫ່ງນີ້. ວັດພູຈຳປາສັກເປີດໃຫ້ເຂົ້າທ່ຽວຊົມທຸກມື້ ເວລາ 8:00 – 16:30 ໂມງ.


4.ຖ້ຳກອງລໍ-ນາຕານ

ຕັ້ງຢູ່ລະຫວ່າງເຂດບ້ານກອງລໍ-ນາຕານ ຫ່າງຈາກເທດສະບານເມືອງຄູນຄຳ ປະມານ 46 ກມ, ຖ້ຳກອງລໍມີຄວາມງົດງາມຫຼາຍ ເປັນຖ້ຳທີ່ມີສາຍນ້ຳຫີນບູນໄຫຼຜ່ານອຸໂມງຂອງພູຫີນບູນ ເຂົ້າໄປແລ້ວປ່ອງໃສ່ແມ່ນ້ຳຂອງ, ພາຍໃນຖ້ຳມີແກ້ງ, ມີຫີນຍ້ອຍ,ຫີນງອກ ແລະ ຫາດຊາຍ ຈຳນວນ 20 ກວ່າຈຸດ, ສາມາດຂີ່ເຮືອລ່ອງເຂົ້າໄປໃນໄດ້. ລະດູແລ້ງເປັນໄລຍະທີ່ເໝາະສົມຫຼາຍໃນການເຂົ້າໄປທ່ຽວຊົມສີສັນ ຂອງຖ້ຳນີ້ເພາະລະດັບນ້ຳຫຼຸດລົງ, ເມື່ອງລ່ອງເຮືອເຂົ້າໄປກໍສາມາດຍ່າງເລາະຫຼິ້ນຕາມຫາດຊາຍຂາວ ເພື່ອສຳຜັດກັບອາກາດເຢັນສະບາຍພາຍໃນຖ້ຳ. ຄຳວ່າກອງລໍມີຄວາມໝາຍມາຈາກ “ ກອງທັບລໍຖ້າ “ໃນສະໄໝທີ່ກອງທັບຂອງອານາຈັກລ້ານຊ້າງພວມລໍຖ້າຕີຕ້ານການເຂົ້າມາຮຸກຮານ ຂອງກອງທັບສັກດີນາສະຫຍາມ. ຖ້ຳດັ່ງກ່າວມີຄວາມຍາວປະມານ 7.500 ແມັດ ກວ້າງ 30 ແມັດ ແລະ ສູງແຕ່ 20-100 ແມັດ, ຖືກຄົ້ນພົບໃນປີ 1989 ແລະ ເລີ່ມເປີດໃຫ້ເຂົ້າທ່ຽວຊົມຢ່າງເປັນທາງການໃນປີ 2002 ເປັນຕົ້ນມາ. ຖ້ຳກອງລໍເປີດໃຫ້ເຂົ້າທ່ຽວຊົມທຸກມື້ ເວລາ 8:00-16:30 ໂມງ.

 

 


5.ຄອນພະເພັງ

ຄອນພະເພັງແມ່ນໜຶ່ງໃນຈຳນວນນ້ຳຕົກຕາດຂອງສາຍພູເຫຼັກອັນຍາວຢຽດ ຂະໜານຕາມລຳນ້ຳຂອງຕອນໃຕ້ ຂອງລາວ, ເຊິ່ງນອນຢູ່ໃນດິນແດນເຂດມະຫານະທີສີພັນດອນ ທີ່ຍາວເຖິງ 15 ກມ ແລະ ໄດ້ຮັບການຂະໜານ ນາມວ່າ “ ໄຂ່ມຸກແຫ່ງແມ່ນ້ຳຂອງ “ມີຄວາມງົດງາມໜ້າອັດສະຈັນໃຈ ຍາກທີ່ຈະຫາບ່ອນອື່ນໃດມາປຽບປານ. ຄອນພະເພັງເປັນນ້ຳຕົກຕາດໃຫຍ່ທີ່ສຸດໃນອາຊີຕາເວັນອອກສ່ຽງໃຕ້ ( ອາຊຽນ ), ເຊິ່ງໃນລະດູຝົນຂອງທຸກໆປີ ຄອນພະເພັງຈະມີປະລິມານນ້ຳຫຼາຍ ກະແສນ້ຳໄຫຼແຮງຄົດລ້ຽວ ແລະ ໂຫດຮ້າຍ. ຄອນພະເພັງເຕັມໄປດ້ວຍ ໂງ່ນຫີນທີ່ຢັ່ງຢາຍກັນໄປ ປະກອບກັບພາບການຫາປາຂອງຊາວປະມົງ ແຖວນີ້ເປັນພາບ ບັນຍາກາດອັນໜ້າ ຕິດຕາຕຶງໃຈຫຼາຍ.ຄອນພະເພັງຕັ້ງຢູ່ເຂດບ້ານທ່າຄູ້ ຫ່າງຈາກເທດ ສະບານເມືອງໂຂງໄປປະມານ 148 ກມ.

 

 

 

 


6.ຕາດຊາຍ

ຕາດຊາຍຕັ້ງຢູ່ໃກ້ກັບຕາດເລີກເຂດບ້ານຫາດໄຄ້ໃນບໍລິເວນປ່າສະຫງວນພູເຂົາຄວາຍ ຫ່າງຈາກເທດສະບານເມືອງທ່າພະບາດ ປະມານ 19 ກມ, ໃນລະດູຝົນຕາດຊາຍຈະມີຄວາມງົດງາມເປັນພິເສດ, ເປັນນ້ຳຕົກຕາດຫຼາຍຊັ້ນ, ສາມາດໄປທ່ຽວຊົມໄດ້ດ້ວຍການຂີ່ເຮືອ ຫຼື ຂີ່ລົດກໍ່ໄດ້. ນອນນັ້ນ ບໍລິເວນຜາຊາຍຍັງເປັນບ່ອນສຶກສາຄົ້ນຄວ້າວິໄຈຊີວະນາໆພັນ ໂດຍສະເພາະແມ່ນດອກເຜິ້ງປ່າ ເຊິ່ງມີ ຫຼາຍສາຍພັນ. ຕາດຊາຍໄດ້ເລີ່ມເປີດໃຫ້ບໍລິການມາແຕ່ປີ 2004, ລວມມີສິ່ງອຳນວຍຄວາມສະດວກ ໃຫ້ແກ່ນັກທ່ອງທ່ຽວບໍ່ວ່າຈະເປັນສາລາຊົມວິວ, ເຮືອນພັກແລະ ຫ້ອງນ້ຳ. ບັນຍາກາດຕາດຊາຍເໝາະສົມ ແກ່ການພັກຜ່ອນກິນເຂົ້າປ່າ, ລົງຫຼິ້ນນ້ຳເຢັນສະບາຍ ແລະ ສຳຜັດກັບທຳມະຊາດອັນອຸດົມສົມບູນຢ່າງແທ້ຈິງ.

 

 


7. ຕາດນ້ຳກັດ

ຕັ້ງຢູ່ເຂດບ້ານແຟນ ເມືອງໄຊ ຫ່າງຈາກເທດສະບານເມືອງປະມານ 24 ກມ, ຢູ່ໃນເຂດປ່າສະຫງວນຂອງພູຫີຜີ ທີ່ມີປ່າດົງດິບດົກໜາ, ເຕັມໄປດ້ວຍຕົ້ນໄມ້ໃຫຍ່ ແລະ ຊີວະນາໆພັນອັນອຸດົມສົມບູນກາຍເປັນສິ່ງດຶງດູດໃຈ ໃຫ້ແກ່ນັກທ່ອງທ່ຽວ. ຕາດນ້ຳກັດເປັນຕາດຊັ້ນດຽວສູງປະມານ 15-20 ແມັດ ແລະ ກວ້າງປະມານ 20-50 ແມັດ, ມີອ່າງອາບນ້ຳທຳມະຊາດທີ່ເຢັນສະບາຍຢູ່ດ້ານໜ້າຂອງຕາດ ເໝາະສົມແກ່ການພັກຜ່ອນຢ່ອນໃຈ ຕາມໂງ່ນຫີນ ແລະ ສາຍນ້ຳພ້ອມກິນເຂົ້າສາມັກຄີກັບຄອບຄົວ. ຕາດນີ້ຖືກຄົ້ນພົບໃນປີ ຄ.ສ 1999 ແລະ ເປີດໃຫ້ບໍລິການໃນປີ 2006.ສຳລັບຊື່ຕາດນ້ຳກັດນີ້ໝາຍເຖິງນ້ຳເຢັນສຸດໆເຢັນຈັດ ແລະ ປະຈຸບັນໄດ້ມີ ບໍລິສັດຂອງເອກະຊົນສຳປະທານ ແລະ ພວມມີການພັດທະນາດ້ານໂຄງລ່າງພື້ນຖານສິ່ງອຳນວຍຄວາມສະດວກ ເຊັ່ນ: ທາງຍ່າງ, ຂົວຂ້າມນ້ຳ, ຂົວອູ່ມີຄວາມຍາວປະມານ 1,500 ແມັດ ເຊິ່ງເນັ່ງຈາກຕົ້ນໄມ້ຫາອີກຕົ້ນໄມ້ໃສ່ກັນ ເມື່ອທ່ານເຂົ້າຊົມຕາດນ້ຳກັດກໍ່ຈະໄດ້ສຳຜັດ ກັບການຍ່າງເທິງຂົວນ້ຳອູ່ເພື່ອຊົມຄວາມງົດງາມຂອງທຳມະຊາດ ໃນເຂດປ່າສະຫງວນແຫ່ງນີ້ຢ່າງເບີກບານໃຈ ແລະ ບໍ່ຫຼົງລືມໄດ້. ຕາດນ້ຳກັດເປີດໃຫ້ເຂົ້າທ່ຽວຊົມທຸກມື້ ເວລາ 8:00-16:30 ໂມງ.


 

8.ທົ່ງໄຫຫີນ

ໄຫຫີນອັນໃຫຍ່ຫຼວງຈຳນວນຫຼາຍຮ້ອຍໄຫຢັ່ງຢາຍໄປທົ່ວທົ່ງຫຍ້າອັນຂຽວງາມແຫ່ງນີ້ເປັນເວລາຫຼາຍພັນປີ ແຕ່ສິ່ງທີ່ເປັນປິດສະໜາໜ້າງຶດງໍ້ອັດສະຈັນໃຈກໍ່ຄືຈົນເທົ່າທຸກມື້ນີ້ຍັງບໍ່ມີໃຜຮູ້ວ່າຫີນດັ່ງກ່າວແມ່ນຫຍັງກັນແທ້, ມີປະຫວັດຄວາມເປັນມາແນວໃດ ແລະ ມາຕັ້ງຢູ່ທີ່ນີ້ໄດ້ແນວໃດ? ທົ່ງໄຫຫີນເຂດທີໜຶ່ງຕັ້ງຢູ່ເຂດບ້ານນາໂອ ຫ່າງຈາກເທດສະບານໂພນສະຫວັນ ( ເມືອງແປກ ) ໄປທາງທິດຕາເວັນອອກສ່ຽງເໜືອ ປະມານ 8 ກມ. ທົ່ງໄຫຫີນ 1 ປະກອບດ້ວຍໄຫຫີນທັງໝົດ 334 ໜ່ວຍ ແລະ ໜ່ວຍທີ່ໃຫຍ່ທີ່ສຸດແມ່ນມີນ້ຳໜັກຫຼາຍກວ່າ 10.000 ກິໂລກຣາມ ແລະ ມີເສັ້ນຜ່າກາງກວ້າງເຖິງ 8,14 ແມັດ ( ສຳຫຼວດໂດຍອົງການຢູເນສໂກ ). ທົ່ງໄຫຫີນດັ່ງກ່າວຖືກສ້າງຂຶ້ນກວ່າ 2500-3000 ປີທີ່ຜ່ານມາໃນສະໄໝທີ່ຍັງບໍ່ທັນມີກົນຈັກທັນສະໄໝຈຶ່ງເຮັດ ໃຫ້ເປັນທີ່ງຶດງໍ້ ວ່າຄົນສະໄໝນັ້ນຂົນຍ້າຍໄຫຫີນຈາກບ່ອນຜະລິດຢູ່ບໍລິເວນພູເກັງທີ່ມີໄລຍະທາງໄກເກືອບ 10 ກິໂລແມັດ ມາຢູ່ບ່ອນນີ້ໄດ້ດ້ວຍວິທີໃດ? ເປັນປິດສະໜາອັນລຶກລັບສ້າງຄວາມປະຫຼາດໃຈໃຫ້ແກ່ທັງບຸກຄົນ ທົ່ວໄປ ແລະ ນັກຄົ້ນຄວ້ານຳອີກ. ນອກຈາກນັ້ນ ຢູ່ບໍລິເວນທົ່ງໄຫຫີນດັ່ງກ່າວກໍ່ຍັງມີຖ້ຳລຶກລັບທາງດ້ານ ປະຫວັດສາດ ອີກຫຼາຍແຫ່ງເຮັດໃຫ້ ຜູ້ຄົນທີ່ມາຢ້ຽມຢາມຢາກສຶກສາຄົ້ນຄວ້ານຳອີກ. ປະຈຸບັນ ເຂດດັ່ງກ່າວລວມມີຫ້ອງຂໍ້ມູນ ແລະ ຕະຫຼາດຂາຍຂອງທີ່ລະນຶກໃຫ້ແກ່ນັກທ່ອງທ່ຽວໄດ້ແວ່ຊົມ. ທົ່ງໄຫເປີດໃຫ້ເຂົ້າທ່ຽວຊົມທຸກມື້ ເວລາ 8:00-16:30 ໂມງ.

 


9.ຖ້ຳປະຫວັດສາດທ່ານຜູ້ນຳ

ຖ້ຳປະຫວັດສາດຂອງບັນດາທ່ານຜູ້ນຳສ່ວນໃຫຍ່ລ້ວນແຕ່ຕັ້ງຢູ່ພາຍໃນຕົວເມືອງວຽງໄຊເຊິ່ງມີ ຄວາມສະດວກໃນການເຂົ້າທ່ຽວຊົມ. ຢູ່ບໍລິເວນນີ້ມີຖ້ຳຂອງບັນດາອະດີດທ່ານຜູ້ນຳສັນຄັນຫຼາຍທ່ານເຊັ່ນ: ທ່ານ ໄກສອນ ພົມວິຫານ, ທ່ານ ສຸພານຸວົງ, ທ່ານ ໜູຮັກ ພູມສະຫວັນ, ທ່ານ ພູມີ ວົງວິຈິດ, ທ່ານ ຄຳໄຕ ສີພັນດອນ, ທ່ານ ສີສະຫວາດ ແກ້ວບຸນພັນ, ທ່ານ ສີທົນ ກົມມະດຳ, ທ່ານ ໄຟດ່າງ ລໍເບຼຍຢາວ, ທ່ານ ພູນ ສີປະເສີດ ເປັນຕົ້ນ. ໃນນັ້ນ ບາງຖໍ້າຍັງບໍ່ທັນປັບປຸງດ້ານສະຖານທີ່ ແລະ ສິ່ງອຳນວຍຄວາມສະດວກເພື່ອຮອງຮັບການ ທ່ອງທ່ຽວເທື່ອ ເຊັ່ນ: ຖ້ຳທ່ານ ພູມີ ວົງວິຈິດ, ຖ້ຳທ່ານ ໄຟດ່າງ ລໍເບຼຍຢາວ, ຖ້ຳທ່ານ ສີທົນ ກົມມະດຳ, ຖ້ຳທ່ານ ສີສົມພອນ ລໍວັນໄຊ, ຖ້ຳທູດຈີນ ແລະ ຖ້ຳທ່ານຜູ້ນຳອື່ນໆ. ຖ້ຳປະຫວັດສາດທ່ານຜູ້ນຳເປີດໃຫ້ທ່ຽວຊົມ ວັນຈັນ-ວັນສຸກ ເວລາ 8:00-16:30 ໂມງ.


 

10.ລ່ອງເຮືອນ້ຳຊ່ອງ

ເມືອງວັງວຽງເປັນເມືອງນ້ອຍໆແຕ່ມີຊື່ສຽງໂດ່ງດັງໄປທົ່ວໂລກເນື່ອງຈາກຄວາມງົດງາມຂອງຕົວເມືອງ ທີ່ໂອບອ້ອມໄປດ້ວຍພູຜາ ແລະ ສາຍນ້ຳຊອງ ກາຍເປັນສະຫວັນອັນນ້ອຍໆຂອງນັກທ່ອງທ່ຽວທັງພາຍໃນ ແລະ ຕ່າງປະເທດ, ໄດ້ຮັບສົມຍານາມວ່າເປັນ “ ກຸ້ຍຫຼິນແຫ່ງເມືອງລາວ “ ເຊິ່ງຄ້າຍຄືກັບເມືອງກຸ້ຍຫຼິນໃນ ສປ ຈີນ. ເມືອງທ່ອງທ່ຽວຍອດນິຍົມນີ້ຢູ່ຫ່າງຈາກນະຄອນຫຼວງວຽງຈັນໄປທາງທິດເໜືອພຽງ 160 ກມ, ຈຶ່ງເປັນທີ່ນິຍົມຂອງນັກທ່ອງທ່ຽວຕ່າງຊາດທີ່ເດີນທາງມາປະເທດລາວ ແລະ ຍັງເປັນທີ່ນິຍົມໃນໝູ່ຄົນລາວເອງ ທີ່ຕ້ອງການພັກຜ່ອນທ້າຍອາທິດ, ເມືອງວັງວຽງມີກິດຈະກຳການທ່ອງທ່ຽວພະຈົນໄພຫຼາກຫຼາຍຢ່າງ, ບໍ່ວ່າຈະເປັນການພາຍເຮືອຄາຍັກ ຫຼື ການພະຈົນໄພປີນໄຕທ່ຽວຖ້ຳງາມໂດຍສະເພາະຖ້ຳຈັງ, ຖ້ຳຊ້າງ, ຖ້ຳຫອຍ, ຖ້ຳປູຄຳ, ຖ້ຳນອນ ແລະ ຖ້ຳຜາຕັ້ງ.ອີກກິດຈະກຳໜຶ່ງທີ່ພາດບໍ່ໄດ້ແມ່ນການຂີ່ກົງເບັງລ່ອງລົງຕາມລຳນ້ຳຊອງ ຫຼົງໄຫຼໄປກັບທຳມະຊາດຜູພາອັນງົດງາມຮູ້ສຶກຜ່ອນຄາຍທີ່ສຸດພໍປານວ່າເວລາໄດ້ຢຸດເດີນໃນຂະນະນັ້ນ.