ປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງ
ວຽກງານຖະແຫລງຂ່າວ, ວັດທະນະທຳ ແລະ ທ່ອງທ່ຽວ

ນັບແຕ່ມມື້ມີຂະບວນການປະຕິວັດຕໍ່ສູ້ກູ້ຊາດ ພາຍໃຕ້ການນຳພາຂອງພັກ ປະຊາຊົນ ປະຕິວັດລາວເປັນຕົ້ນມາ, ວຽກງານຖະແຫລງຂ່າວ ແລະ ວັດທະນະທຳໄດ້ເປັນວຽກງານໜຶ່ງທີ່ສຳຄັນຂອງການປະຕິວັດ, ເປັນພາຫະນະ ແລະ ເຄື່ອງມີໂຄສະນາ, ສຶກສາອົບຮົມ ແລະ ປຸກລະດົມ ປະຊາຊົນລາວບັນດາເຜົ່າໃຫ້ມີນ້ຳໃຈຮັກຊາດ. ຄຽດແຄ້ນສັດຕູ ແລະ ລຸກຂຶ້ນຕໍ່ສູ້ກັບສັດຕູຮຸກຮານ ເພື່ອປົດປ່ອຍຊາດ. ໃນເບື້ອງຕົ້ນໄດ້ສ້າງກອງປະກອບອາວຸດໂຄສະນາ, ສ້າງໜັງສືພິມອິດສະລະ, ຈັດຕັ້ງໜ່ວຍສິລະປະວັນນະ ຄະດີ, ໜ່ວຍສາຍຮູບເງົາເຄື່ອນທີ່. ມາຮອດຊຸມປີ 1960-1970 ເພື່ອສ້າງເຂດປົດປ່ອຍຢ່າງຮອບດ້ານ: ການເມືອງ, ເສດຖະກິດ, ວັດທະນະທຳ-ສັງຄົມ ໃຫ້ຄຽງຄູ່ກັນ, ພັກປະຊາຊົນ ປະຕິວັດລາວ ຈຶ່ງໄດ້ວາງແນວທາງນະໂຍບາຍກໍ່ສ້າງວັດທະນະທຳໃໝ່ທີ່ມີລັກສະນະຊາດ, ປະຊາຊົນ ແລະ ກ້າວໜ້າ, ກຳນົດທິດທາງກໍ່ສ້າງຂະຫຍາຍວຽກງານຖະແຫລງຂ່າວ, ຖືວຽກງານຖະແຫລງຂ່າວ ແລະ ວັດທະນະທຳເປັນ “ສະໜາມຮົບໜຶ່ງ”ແລະ ຜູ້ເຮັດວຽກງານຖະແຫລງຂ່າວ, ວັດທະນະທຳ ກໍ່ແມ່ນນັກລົບປະຕິວັດ, ໄດ້ຈັດຕັ້ງໃຫ້ມີອົງການ ແລະ ຄະນະຮັບຜິດຊອບຂຶ້ນ ເອີ້ນວ່າ: ຄະນະໂຄສະນາອົບຮົມ ແລະ ວັດທະນະທຳ ຂຽນຫຍໍ້ວ່າ: ຄ.ອ.ວ ມີທີ່ຕັ້ງຢູ່ພູແຄນ ແຂວງຫົວພັນ.
ຕັ້ງແຕ່ນັ້ນມາ, ວຽກງານຖະແຫລງຂ່າວ ແລະ ວັດທະນະທຳໄດ້ມີບົດບາດອັນສຳຄັນໃນພາລະກິດປະຕິວັດ. ເມື່ອຫວນຄືນອາດີດ ວິວັດທະນາການແຫ່ງການສ້າງຕັ້ງ ແລະ ການເຕີບໃຫຍ່ຂະຫຍາຍຕົວຂອງວຽກງານສື່ມວນຊົນ ແລະ ການເຄື່ອນໄຫວວຽກງານວັດທະນະທຳທີ່ມີການປະກອບສ່ວນອັນສຳຄັນ ແລະ ມີກຽດຂອງບັນດານັກຂ່າວ, ໂຄສົກ, ນັກຂຽນ, ນັກໜັງສືພິມ, ນັກສິລະປິນ, ນັກຖ່າຍຮູບ ເຂົ້າໃນການຕໍ່ສູ້ກັບເລກົນຂອງຈັກກະພັດລ່າເມືອງຂຶ້ນ, ມັນຄືໝາກຜົນຂອງພາລະກິດແຫ່ງການຕໍ່ສູ້ກູ້ຊາດ ຊຶ່ງມີເລືອດເນື້ອເຫື່ອໄຄ, ກຳລັງວັງຊາ, ສະຕິປັນຍາອັນສະຫຼາດແຫຼມ ຄົມຂອງບັນດານັກລົບ ແນວຄິດວັດທະ ນະທຳຂອງພວກເຮົາໄດ້ສຸມໃສ່ການປະດິດຄິດແຕ່ງບົດ-ຂ່າວ, ບົດເລື່ອງ, ບົດນຳ, ບົດຄວາມ, ບົດວິຈານ, ກາບກອນ, ບົດເພັງ, ຂັບລຳ ດົນຕີ ແລະ ບົດຟ້ອນຕ່າງໆເພື່ອໂຄສະນາປຸກລະດົມນ້ຳໃຈຮັກຊາດ, ສ້າງບັນຍາກາດເບີກບານມ່ວນຊື່ນ ໃນເຂດປົດປ່ອຍ ກໍ່ຄືທົ່ວປະເທດໃນເວລານັ້ນ ແລະ ໄດ້ກາຍເປັນມູນເຊື້ອ, ເປັນມໍລະດົກຕົກທອດ ມາເຖິງປັດຈຸບັນນີ້.
ພາຍຫຼັງປະເທດຊາດໄດ້ຮັບການປົດປ່ອຍ, ສປປ.ລາວ ໄດ້ຮັບການສ້າງຕັ້ງຂຶ້ນໃນວັນທີ 2 ທັນວາ ປີ 1975 ວຽກງານຖະແຫລງຂ່າວ, ວັດທະນະທຳໄດ້ຖືກສ້າງເປັນກະຊວງໂຄສະນາຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ໂດຍແມ່ນທ່ານ ສີສະນະ ສີສານ ເປັນລັດຖະມົນຕີວ່າການ ໄດ້ນຳພາພະນັກງານໃນຂະແໜງການດັ່ງກ່າວ ເຄື່ອນໄຫວປະຕິບັດໜ້າທີ່ຂອງຕົນຢ່າງຕັ້ງໜ້າ ເພື່ອນຳເອົາແນວ ທາງນະໂຍບາຍ ແລະ ປະຊາຊົນໃນທົ່ວປະເທດໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງ, ກໍ່ສ້າງວັດທະນະ ທຳໃໝ່ທີ່ມີລັກສະນະຊາດ, ປະຊາຊົນ ແລະ ກ້າວໜ້າ, ສ້າງຄົນລາວໃຫ້ມີນ້ຳໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ອອກແຮງງານຢ່າງມີລະບຽບວິໄນ, ມີປະສິດທິພາບ, ດຳລົງຊີວິດແລະ ເຮັດວຽກຕາມຫຼັກການທີ່ວ່າ: “ແຕ່ລະຄົນເພື່ອທຸກຄົນ, ທຸກຄົນເພື່ອແຕ່ລະຄົນ“, ປະກອບສ່ວນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດກ້າວຂຶ້ນສູ່ຄວາມຈະເລີນສີວິໄລ.
ມາຮອດປີ 1983 ເພື່ອເຮັດໃຫ້ຂະແໜງການຕ່າງໆໃນກົງຈັກການຈັດຕັ້ງກະຊວງ ໄດ້ເຄື່ອນໄຫວປະຕິບັດໜ້າທີ່ຂອງຕົນໃຫ້ສອດຄ່ອງ ກັບຄວາມຮຽກຮ້ອງຕ້ອງການແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ Ⅲ ຂອງພັກ, ກະຊວງໂຄສະນາຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ປັບປຸງການຈັດຕັ້ງໃໝ່ ໂດຍແຍກເອົາຂະແໜງໂຄສະນາຖະແຫຼງຂ່າວອອກໄປເປັນຄະນະກຳມະການຂ່າວສານ, ໜັງສືພິມ, ວິທະຍຸກະຈາຍສຽງ ແລະ ໂທລະພາບແຫ່ງຊາດ ມີຖານະທຽບເທົ່າກະຊວງ ໂດຍແມ່ນທ່ານ ສອນ ຄຳວານວົງສາ ເປັນຫົວໜ້າ, ຂະແໜງທ່ອງທ່ຽວຍົກຍ້າຍໄປຂຶ້ນກັບກະຊວງອຸດສາຫະກຳການຄ້າ ມີຖານະເທົ່າກົມ ແລະ ພາກສ່ວນວຽກງານຕ່າງໆທີ່ຍັງເຫຼືອໄວ້ສ້າງເປັນກະຊວງວັດທະນະທຳ ຊຶ່ງແມ່ນທ່ານ ທອງສິງ ທຳມະວົງ ເປັນລັດຖະມົນຕີວ່າການ ແລະ ດຳເນີນການເຄື່ອນໄຫວນຳພາວຽກງານວັດທະນະທຳ.
ເພື່ອປະຕິບັດມະຕິກອງປະຊຸມໃຫຍ່ຄັ້ງທີ Ⅳ ຂອງພັກ ຊຶ່ງເປັນກອງປະຊຸມປ່ຽນແປງໃໝ່, ການຕໍ່ສູ້ໃນຂົງເຂດແນວຄິດວັດທະນະທຳໄດ້ຜັນແປໄປຢ່າງດຸເດືອດ ແລະ ສັບສົນນັ້ນ ພັກໄດ້ຖືເອົາການເຄື່ອນໄຫວວຽກງານຖະແຫຼງຂ່າວ, ວັດທະນະທຳເປັນແນວຮົບອັນໜຶ່ງ, ເປັນອາວຸດທາງດ້ານແນວຄິດ, ເປັນພາຫະນະຕໍ່ສູ້ອັນແຫຼມຄົມຂອງພັກ, ຂະແໜງຂອງພວກເຮົາໄດ້ປະກອບສ່ວນຢ່າງຫ້າວຫັນ ເພື່ອຮັບໃຊ້ໜ້າທີ່ການເມືອງ ແລະ ໜ້າທີ່ເສດຖະກິດ ສັງຄົມທີ່ພັກວາງອອກ, ຕິດພັນແໜ້ນກັບປະຊາຊົນ, ສະທ້ອນໃຫ້ເຫັນການດຳລົງຊີວິດທີ່ບໍລິສຸດ, ສັດຊື່, ສົ່ງເສີມອັນໃໝ່, ອັນກ້າວໜ້າ, ຕຳນິວິຈານອັນຫຼ້າຫຼັງ ເພື່ອປົວແປງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ.
ຈາກນັ້ນມາປີ 1989 ກະຊວງວັດທະນະທຳ ແລະ ຄະນະກຳມະການຂ່າວສານ, ໜັງສືພິມ, ວິທະຍຸກະຈາຍສຽງ ແລະ ໂທລະພາບແຫ່ງຊາດໄດ້ໂຮມເຂົ້າເປັນກະຊວງດຽວເອີ້ນວ່າ: ກະຊວງຖະແຫຼງຂ່າວ ແລະ ວັດທະນະທຳ ໂດຍແມ່ນທ່ານ ສອນ ຄຳວານວົງສາ ເປັນລັດຖະມົນຕີວ່າການ. ສ່ວນວຽກງານທ່ອງທ່ຽວຍັງຢູ່ນຳກະຊວງອຸດສາຫະກຳການຄ້າ ຮອດປີ 1999 – 2000 ໄດ້ສ້າງເປັນອົງການທ່ອງ ທ່ຽວແຫ່ງຊາດ ຂຶ້ນກັບສຳນັກນາຍົກລັດຖະມົນຕີ ໂດຍແມ່ນ ທ່ານ ແຈ້ງ ໄຊຍະວົງ ເປັນຫົວໜ້າ ແລະ ຕໍ່ມາປີ 2006 ແມ່ນທ່ານ ສົມພົງ ມົງຄຸນວິໄລ ເປັນຫົວໜ້າ.
ຫຼັງກອງປະຊຸມໃຫຍ່ຄັ້ງທີ Ⅴ ຂອງພັກ, ປີ 1991 – 1992 ທ່ານ ໝູນແກ້ວ ອໍລະບູນ ໄດ້ມາເປັນລັດຖະມົນ ຕີວ່າການແທນທ່ານ ສອນ ຄຳວານວົງສາ. ກອງປະຊຸມໃຫຍ່ຄັ້ງທີ Ⅴ ຂອງພັກໄດ້ກຳນົດທິດທາງຂະຫຍາຍພາຫະນະສື່ມວນຊົນຢ່າງແຂງແຮງ ແລະ ນະໂຍບາຍກໍ່ສ້າງວັດທະນະທຳທີ່ມີລັກສະ ນະຊາດ, ປະຊາຊົນ ແລະ ກ້າວໜ້າ. ເພື່ອປະຕິບັດມະຕິດັ່ງກ່າວໃຫ້ເກີດຜົນເປັນຈິງ ທ່ານ ໝູນແກ້ວ ອໍລະບູນ ໄດ້ສຸມໃສ່ປັບປຸງການຈັດຕັ້ງ, ສັບຊ້ອນ ພະນັກງານໃນກົມກອງ ໃຫ້ເປັນຮູບເປັນຮ່າງຄືນໃໝ່ ແລະ ໄດ້ຄົ້ນຄວ້າກຳນົດແຜນຍຸດທະສາດ ຂະຫຍາຍຕາໜ່າງສື່ມວນຊົນ ແລະ ຍຸດທະສາດອະນຸລັກຮັກສາຟື້ນຟູ, ສົ່ງເສີມ ແລະ ພັດທະນາວັດທະນະທຳ ແຕ່ປີ 1991 ຫາປີ 2000 ຫຼື 2012, ກຳນົດ 5 ຈຸດໝາຍ ແລະ 5 ໂຄງການວັດທະນະທຳ ໃນນັ້ນມີໂຄງການກໍ່ສ້າງສະຖາບັນຄອບຄົວໃຫ້ເຂັ້ມແຂງ (ຄອບຄົວວັດທະນະທຳ).
ຕໍ່ຈາກນັ້ນມາ ປີ 1993 ທ່ານ ໂອສະກັນ ທຳມະເທວາ ໄດ້ມາເປັນລັດຖະມົນຕີວ່າການ ແທນທ່ານ ໝູນແກ້ວ ອໍລະບູນ, ເປັນຜູ້ສືບຕໍ່ຈັດຕັ້ງ ປະຕິບັດ ແຜນຍຸດທະສາດ ດັ່ງກ່າວ ໃຫ້ເປັນຈິງ, ເຮັດໃຫ້ ຂະ ແໜງຖະແຫຼງຂ່າວ ແລະ ວັດທະນະທຳໄດ້ຮັບການປັບປຸງ ແລະ ມີບາດກ້າວຂະຫຍາຍຕົວ, ມີບົດບາດ ນຳໜ້າໃນແນວທາງປ່ຽນແປງໃໝ່, ຈິນຕະນາການໃໝ່ຂອງພັກ, ເອົາວຽກງານຖະແຫຼງຂ່າວ ແລະ ວັດທະ ນະທຳເຂົ້າພັດທະນາຈິດໃຈຂອງຄົນ, ເຮັດໃຫ້ຄົນມີນ້ຳໃຈບໍລິສຸດ ຜ່ອງໃສ, ສ້າງສັນສິ່ງດີໆຕໍ່ສັງຄົມ ແລະ ປະເທດຊາດ, ປົກປັກຮັກສາວັດທະນະທຳອັນດີງາມຂອງຊາດ ກໍຄືມູນເຊື້ອປະເພນີ ອັນເປັນເອກກະລັກຂອງຊົນເຜົ່າຕ່າງໆ, ໄດ້ສືບຕໍ່ເສີມສ້າງວັດທະນະທຳທີ່ມີລັກສະນະຊາດ, ປະຊາຊົນ ແລະ ກ້າວໜ້າ, ສົມ ທົບກັບການຮັບເອົາວັດທະນະທຳອັນດີງາມ ແລະ ກ້າວໜ້າຂອງມວນມະນຸດໂລກ ສ້າງຜະລິດຕະພັນວັດທະນະທຳ, ສິນລະປະວັນນະຄະດີທີ່ອຸດົມສົມບູນດ້ວຍເນື້ອໃນອັນຖືກຕ້ອງ, ຕຳນິວິຈານອັນຫຍໍ້ທໍ້ ແລະ ທ່າອ່ຽງທີ່ຜິດເຂວ, ຮີດຄອງທີ່ກົດໜ່ວງຄວາມກ້າວໜ້າ, ນຳເອົາເນື້ອໃນວັດທະນະທຳເຂົ້າສູ່ຫຼັກສູດການສຶກສາ, ຮີບຮ້ອນອອກຂໍ້ກຳນົດ, ກົດໝາຍເພື່ອຄຸ້ມຄອງການເຄື່ອນໄຫວຂອງວັດທະນະທຳ ແລະ ສື່ມວນຊົນໃນໄລຍະໃໝ່, ຄຸ້ມຄອງບູຮານສະຖານ, ຮ່ອງຮອຍປະຫວັດສາດ, ທິວທັດທຳມະຊາດອັນສວຍງາມ, ຈັດຕັ້ງ ແລະ ຊຸກຍູ້ການເຄື່ອນໄຫວວັດທະນະທຳ, ສິລະປະວັນນະຄະດີຂອງປະຊາຊົນບັນດາເຜົ່າຢ່າງກ້ວາງຂວາງ, ໂຄສະນາສົ່ງເສີມການສ້າງຄອບຄົວວັດທະນະທຳ, ບ້ານວັດທະນະທຳທີ່ມີແບບແຜນດຳລົງຊີວິດອັນຈົບງາມ, ສ້າງຫໍວັດທະນະທຳແຫ່ງຊາດ, ສວນວັດທະນະທຳ, ສະໂມສອນວັດທະນະທຳ, ໂຮງຮຽນສິລະປະກຳ, ປັບປຸງ ແລະ ຂະຫຍາຍຫໍສະໝຸດ, ພິພິທະພັນ, ຫໍມູນເຊື້ອ, ອະນຸສາວະລີຕ່າງໆ; ປັບປຸງ ແລະ ຂະຫຍາຍພາຫະນະຂ່າວສານ, ໜັງສືພິມ, ການພິມຈຳໜ່າຍ, ວິທະຍຸກະຈາຍສຽງ,ໂທລະພາບດ້ວຍການປົວແປງ ແລະ ເພີ້ມພື້ນຖານວັດຖຸເຕັກນິກ ແລະ ຍົກລະດັບຄວາມສາມາດຮັບຜິດຊອບຂອງພະນັກງານ ແລະ ຄຸນນະພາບຂອງວຽກງານໃຫ້ດີຂື້ນ, ນຳເອົາຂ່າວສານ ແລະ ວັດທະນະທຳໄປສູ່ປະຊາຊົນ ນັບທັງຜູ້ຢູ່ເຂດພູດອຍຫ່າງໄກສອກຫຼີກໄດ້ຟັງ, ໄດ້ເບິ່ງ, ໄດ້ອ່ານຢ່າງກວ້າງຂວາງ. ພ້ອມກັນນັ້ນກໍໄດ້ເປີດກວ້າງການແລກປ່ຽນຂໍ້ມູນຂ່າວສານ ແລະ ວັດທະນະທໍາກັບພາຍນອກ, ສົ່ງເສີມຄຸນຄ່າວັດທະນະທຳອັນດີງາມຂອງຊາດ ແລະ ບົດບາດຂອງສື່ມວນຊົນລາວໃຫ້ສູງເດັ່ນຂຶ້ນໃນເວທີສາກົນ.
ຕໍ່ນັ້ນມາແຕ່ປີ 1998-2001 ກະຊວງໄດ້ມີການສັບຊ້ອນຕໍາແໜ່ງໃໝ່ ໂດຍໄດ້ເອົາທ່ານສີເຫຼືອ ບຸນຄໍ້າ ມາເປັນລັດຖະມົນຕີວ່າການ ແລະ ສືບຕໍ່ນຳພາການເຄື່ອນໄຫວຂອງວຽກງານຖະແຫຼງຂ່າວ ແລະ ວັດທະນະທຳໃຫ້ບັນລຸຜົນສຳເລັດໃນຫຼາຍດ້ານ ແລະ ການປັບປຸງການຈັດຕັ້ງພັກເປັນຕົ້ນແມ່ນ ການເປີດກອງປະຊຸມໃຫຍ່ຄັ້ງທີ I ຂອງອົງຄະນະພັກກະຊວງຖະແຫຼງຂ່າວ ແລະ ວັດທະນະທໍາ.
ປີ 2001-2005 ທ່ານ ດຣ. ພັນດວງຈິດ ວົງສາ ໄດ້ມາດໍາລົງຕໍາແໜ່ງເປັນລັດຖະມົນຕີວ່າການກະຊວງຖະແຫຼງຂ່າວ ແລະ ວັດທະນະທຳ, ທ່ານໄດ້ສືບຕໍ່ນຳພາການເຄື່ອນໄຫວວຽກງານຕ່າງໆ ແລະ ໄດ້ຄົ້ນຄ້ວາປັບປຸງລະບຽບ, ກົດໝາຍ, ສ້າງເງື່ອນໄຂອຳນວຍໃຫ້ແກ່ວຽກງານຖະແຫຼງຂ່າວ ແລະ ວັດທະນະທຳ ໄດ້ເຄື່ອນໄຫວປະຕິບັດໜ້າທີ່ວຽກງານຂອງຕົນໄດ້ຢ່າງເຕັມສ່ວນ.
ທ້າຍປີ 2005 ເພື່ອກຽມ ແລະ ດຳເນີນກອງປະຊຸມໃຫຍ່ຄັ້ງທີ II ຂອງອົງຄະນະພັກກະຊວງຖະ ແຫຼຂ່າວ ແລະ ວັດທະນະທຳ ແລະ ເພື່ອກະກຽມການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VIII ຂອງພັກ, ຄະນະນໍາ ແລະ ບາງກົມ, ກອງໃນກົງຈັກການຈັດຕັ້ງຂອງກະຊວງຖະແຫລງຂ່າວ ແລະ ວັດທະ ນະທຳ ໄດ້ຮັບການປັບປຸງປ່ຽນແປງ ແລະ ຈັດຕັ້ງຄືນໃໝ່ຈຳນວນໜຶ່ງ ໂດຍແມ່ນ ທ່ານ ໝູນແກ້ວ ອໍລະບູນ ໄດ້ກັບຄືນມາເປັນລັດຖະມົນຕີວ່າການ, ທ່ານ ສຈ.ດຣ ບໍ່ແສງຄຳວົງດາລາ ເປັນລັດຖະມົນຕີຊ່ວຍວ່າການ ຮັບຜິດຊອບວຽກງານຖະແຫຼງຂ່າວ ແລະ ທ່ານ ບົວເງິນ ຊາພູວົງ ເປັນລັດຖະມົນຕີຊ່ວຍວ່າການ ຮັບຜິດຊອບວຽກງານວັດທະນະທຳ.
ພາຍໃຕ້ແສງສະຫວ່າງ ມະຕິກອງປະຊຸມໃຫຍ່ຄັ້ງທີ VIII ຂອງພັກ ແລະ ການນໍາພາສະຫຼາດສ່ອງໃສຂອງສູນກາງພັກ, ປະເທດເຮົາສືບຕໍ່ມີສະຖຽນລະພາບທາງດ້ານການເມືອງ, ມີຄວາມສະຫງົບປອດໄພທາງດ້ານສັງຄົມ, ເສດຖະກິດ-ສັງຄົມ ໄດ້ຮັບການຂະຫຍາຍຕົວຢ່າງຕໍ່ເນື່ອງ ແລະ ເວົ້າສະເພາະຂະແໜງຖະແຫຼງຂ່າວ ແລະ ວັດທະນະທຳໄດ້ຮັບການພັດທະນາມີບາດກ້າວຂະຫຍາຍຕົວໃໝ່ ທີ່ກ້າວໜ້າໃນຫຼາຍດ້ານດ້ວຍຈັງຫວະວ່ອງໄວກ່ວາຊຸມປີຜ່ານມາຢ່າງຈະແຈ້ງ.
ມາຮອດວັນທີ 16/6/2011 ກອງປະຊຸມຄັ້ງປະຖົມມະເລີກຂອງສະພາແຫ່ງຊາດຊຸດທີ VII ໄດ້ຮັບຮອງເອົາກົງຈັກການຈັດຕັ້ງຂອງລັດຖະບານແຫ່ງ ສປປລາວ ລວມມີ 16 ກະຊວງ ແລະ 3 ອົງການທຽບເທົ່າ,ໃນນັ້ນມີກະຊວງຖະແຫຼຂ່າວ, ວັດທະນະທຳ ແລະ ທ່ອງທ່ຽວ ຂຽນຫຍໍ້ແມ່ນ (ຖວທ) ໂດຍແມ່ນທ່ານ ສຈ.ດຣ ບໍ່ແສງຄຳ ວົງດາລາ ເປັນລັດຖະມົນຕີວ່າການ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານບົວເງິນ ຊາພູວົງ ເປັນລັດຖະມົນຕີຊ່ວຍວ່າການ ຮັບຜິດຊອບວຽກງານວັດທະນະທຳ, ທ່ານ ສະຫວັນຄອນ ລາຊະມົນຕີ ເປັນລັດຖະມົນຕີຊ່ວຍວ່າການ ຮັບຜິດຊອບວຽກງານຖະແຫຼງຂ່າວ ແລະ ທ່ານ ຈະເລີນ ວາລິນທະລາສັກ ເປັນລັດຖະມົນຕີຊ່ວຍວ່າການ ຮັບຜິດຊອບວຽກງານທ່ອງທ່ຽວ. ເປັນອັນວ່າຜ່ານໄລຍະເວລາ 28 ປີແຕ່ 1983-2011 ວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໄດ້ກັບຄືນມາເປັນກະຊວງດຽວກັນອີກ ແລະ ໃນໄລຍະເວລາ 36 ປີ ແຕ່ປີ 1975 – 2011 ກະຊວງດັ່ງກ່າວນີ້ໄດ້ແຍກອອກ ແລະ ໂຮມເຂົ້າກັນເຖີງ 3 ຄັ້ງຄື: ປີ 1983, ປີ 1989 ແລະ ປີ 2011. ພ້ອມກັນນັ້ນ ບົດບາດ, ໜ້າທີ່, ການຈັດຕັ້ງພະນັກງານ ກໍ່ໄດ້ຮັບການປັບປຸງ ປ່ຽນແປງຢ່າງເປັນລະບົບໃຫ້ສອດຄ່ອງກັບແຕ່ລະໄລຍະ ແລະ ມີລັດຖະມົນຕີວ່າການ 9 ທ່ານຜັດປ່ຽນກັນຄື:
1. ປີ 1975 – 1983 ແມ່ນທ່ານ ສີສະນະ ສີສານ.
2. ປີ 1983 – 1989 ແມ່ນທ່ານ ທອງສິງ ທຳມະວົງ.
3. ປີ 1989 – 1990 ແມ່ນທ່ານ ສອນ ຄຳວານວົງສາ.
4. ປີ 1991 – 1992 ແມ່ນທ່ານ ໝູນແກ້ວ ອໍລະບູນ.
5. ປີ 1993 – 1998 ແມ່ນທ່ານ ໂອສະກັນ ທຳມະເທວາ.
6. ປີ 1998 – 2001 ແມ່ນທ່ານ ສີເຫຼືອ ບຸນຄ້ຳ.
7. ປີ 2001 – 2005 ແມ່ນທ່ານ ດຣ. ພັນດວງຈິດ ວົງສາ.
8. 07/2005 – 07/2011 ແມ່ນທ່ານ ໝູນແກ້ວ ອໍລະບູນ.
9. 07/2011 ...... ແມ່ນທ່ານ ສຈ.ດຣ. ບໍ່ແສງຄຳ ວົງດາລາ.
ເວົ້າລວມແລ້ວວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວຂອງຊາດລາວເຮົາແມ່ນໄດ້ຮັບການພັດທະນາ ແລະ ຂະຫຍາຍຕົວເປັນແຕ່ລະໄລຍະ, ເປັນຕົ້ນແມ່ນໄລຍະມີການປ່ຽນແປງໃໝ່ ສະເພາະແມ່ນຫຼັງກອງປະຊຸມໃຫຍ່ຄັ້ງທີ V ຂອງພັກ (1991) ເປັນຕົ້ນມາ, ມາຮອດປະຈຸບັນນີ້ ໜັງສືພິມ ມີ 27 ສະບັບ, ວາລະສານ ມີ 96 ສະບັບ, ພາສາຕ່າງປະເທດ 4 ສະບັບ, ມີວິທະຍຸກະຈາຍສຽງ 63 ສະຖານີ, ໂທລະພາບ 37 ສະຖານີ, ອັນສຳຄັນແມ່ນພື້ນຖານເຕັກນິກໄດ້ຫັນຈາກ ອານາລ໋ອກ ໄປສູ່ ດີຈີຕອນ, ຜ່ານລະບົບດາວທຽມ, ສາມາດຮັບ ແລະ ກະຈາຍຂ່າວຢ່າງກວ້າງ ຂວາງ - ເຊື່ອມກັບໂລກໄດ້.
ດ້ານວັດທະນະທຳເປັນຕົ້ນຄຸນຄ່າວັດທະນະທຳທີ່ມີລັກສະນະຊາດ, ປະຊາຊົນ ແລະ ກ້າວໜ້າໄປຮັບການຟື້ນຟູ ແລະ ເສີມຂະຫຍາຍ, ສ້າງຄອບຄົວວັດທະນະທຳໄດ້ 682.803 ຄອບຄົວ, ບ້ານວັດທະນະທຳ 3.351 ບ້ານ ແລະ 85 ກຸ່ມບ້ານວັດທະນະທຳ, ດ້ານສີລະປະວັນນະຄະດີ, ສີລະປະກຳ, ການປະດິດຄິດແຕ່ງໄດ້ຮັບການຊຸກຍູ້ສົ່ງເສີມ, ພື້ນຖານວັດຖຸເຕັກນິກ ດ້ານວັດທະນະທຳໄດ້ຮັບການກໍ່ສ້າງຂຶ້ນ, ເວົ້າລວມແລ້ວວັດທະນະທຳຍັງຄົງເປັນພື້ນຖານດ້ານຈິດໃຈຂອງສັງຄົມ, ເປັນປັດໃຈພື້ນຖານແຫ່ງຄວາມສາມັກຄີໝັ້ນຄົງຍືນຍົງຂອງຊາດ, ເປັນກຳລັງແຮງ ຊຸກດັນການຂະຫຍາຍຕົວຂອງເສດຖະກິດ - ສັງຄົມ, ເປັນຈຸດໝາຍ ແລະ ປັດໃຈດັດປັບການພັດທະນາ ແລະ ການເຊື່ອມໂຍງສາກົນ.
ສຳລັບການທ່ອງທ່ຽວໄດ້ຮັບການປັບປຸງ, ແຫຼ່ງທ່ອງທ່ຽວໄດ້ຮັບການພັດທະນາ ແລະ ສ້າງຂຶ້ນເປັນຕົ້ນແຫຼ່ງທ່ອງທ່ຽວ ທາງດ້ານວັດທະນະທຳ, ປະວັດສາດ ແລະ ທຳມະຊາດ, ນະໂຍບາຍການທ່ອງທ່ຽວໄດ້ມີການປັບປຸງ ອັນໄດ້ດຶງດູດນັກທ່ອງທ່ຽວຕ່າງປະເທດເຂົ້າມາລາວນັບມື້ນັບຫຼາຍຂຶ້ນເຖິງ 4 ລ້ານຄົນຕໍ່ປີ, ສ້າງລາຍຮັບເຂົ້າປະເທດຫຼາຍຮ້ອຍລ້ານໂດລາ, ສ້າງຄວາມເປັນມິດໄມຕີ ລະຫວ່າງຜູ້ຄົນ ແລະ ບັນດາປະຊາຊາດ, ສ້າງຄວາມນິຍົມຊົມຊອບຂອງຕ່າງປະເທດ ພ້ອມກັນນັ້ນຜ່ານການ ທ່ອງທ່ຽວກໍເກີດການສືບທອດ, ການຫວງແຫນ ແລະ ພາກພູມໃຈນຳພື້ນຖານວັດທະນະທຳ, ປະຫວັດສາດ, ທຳມະຊາດ ອັນພາໃຫ້ເກີດຄວາມຮ່ວມໃຈກັນອະນຸລັກຮັກສາໄວ້ຊຶ່ງມໍລະດົກພື້ນເມືອງຂອງລາວ.
ກ່ຽວກັບຖັນແຖວພະນັກງານ, ລັດຖະກອນ ຂອງຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວແມ່ນໄດ້ຮັບການບຳລຸງສ້າງ, ຂະຫຍາຍຕົວທາງດ້ານປະລິມານ ແລະ ຄຸນນະພາບກໍໄດ້ຮັບການຍົກສູງຂຶ້ນ, ສາມາດນຳພາ, ຄຸ້ມຄອງ ແລະ ພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃຫ້ນັບມື້ຂະຫຍາຍຕົວ ມາຮອດປະຈຸບັນນີ້ ດ້ານຈຳນວນມີເຖິງ 4.000 ກວ່າຄົນ