ປະເທດລາວ ຄົນລາວ ແລະ ມູນເຊື້ອຕໍ່ສູ້ບໍ່ຍອມຈຳນົນ


ຊາດລາວໄດ້ກຳເນີດເກີດຂື້ນ, ຄົງຕົວ ແລະ ຂະຫຍາຍຕົວຢູ່ໃນຜືນແຜ່ນດິນຕອນນີເຊິ່ງຖຶກຈາລຶກໄວ້ໃນປະຫັວດສາດໄດ້ຫຼາຍພັນປີມາແລ້ວ. ໃນສັດຕະວັດທີ 14 ເຈົ້າຟ້າງຸ່ມມະຫາລາດຜູ້ລືຊື່ໄດ້ນຳພາການທ້ອນໂຮມປະເທດລາວເປັນເອກະພາບ ແລະ ໄດ້ສ້າງຕັ້ງອານາຈັກລາວລ້ານຊ້າງທີ່ມີດິນແດນອັນກ້ວາງໃຫ່ຍໄພສານ,ເປັນອານາຈັກໜື່ງທີ່ເຂັ້ມແຂງຢູ່ໃນແຫຼມອິນດູຈີນກໍ່ຄືຂົງເຂດອາຊີຕາເວັນອອກສ່ຽງໃຕ້. ປະເທດລາວມີທີ່ຕັ້ງທີ່ເໝາະສົມທາງດ້ານພູມສາດ, ອຸດົມສົມບູນຮັ່ງມີທາງດ້ານຊັບພະຍາກອນທຳມະຊາດອັນໄດ້ເອື້ອອຳນວຍຄວາມສະດວກໃຫ້ແກ່ການດຳລົງຊິວິດຂອງປະຊາຊົນລາວບັນດາເຜົ່າ. ຊາດລາວເປັນຊາດໜື່ງທີ່ມີອະລິຍະທຳອັນສູງສົ່ງ, ປະຊາຊົນລາວບັນດາເຜົ່າມີນ້ຳໃຈອົບເອື້ອອາລີ ແລະ ມີວັດທະນະທຳທີ່ເປັນເອກະລັກຂອງຕົນເອງ, ມີບົດກາວີສະໄໝກ່ອນໄດ້ກ່າວໄວ້ວ່າ:
”ປະເທດຂ້ອຍຂຶ້ນຊື່ເມືອງລາວ ລວງກ້ວາງຍາວສຸດຕາເຫຼືອອ່ານ ນ້ຳຂອງຜ່ານໄຫລຜ່າທາງກາງ ມີຫົນທາງຖະໜົນສະອາດ ປະເທດຊາດລາວໃຫ່ຍໄພສານເຮົາລູກຫຼານເກີດມາພາຍຊ້ອຍ ຄວນຊູຊ້ອຍສ້າງບ້ານເມືອງລາວ ໃຫ້ຢືນຍາວຕໍ່ໄປພາຍໜ້າ ຢ່າໃຫ້ຫລ້າເຂົາແທ້ໝູ່ລາວ ”.
ໃນໄລຍະປະຫັວດສາດຊາດລາວມີບາງຍຸກສະໄໝກໍ່ຮຸ່ງເຮືອງເຫຼືອງເຫຼື້ອມ ເປັນຕົ້ນແມ່ນສະໄໝເຈົ້າຟ້າງຸ່ມ, ເຈົ້າໂພທິລາດ, ເຈົ້າໄຊເສດຖາທິລາດ, ເຈົ້າສຸລິຍະວົງສາ ເປັນຜູ້ປົກຄອງ ກະສັດ ແລະ ເສນາອາມາດ, ນາຍທະຫານ ໃນລາຊະວັງເປັນຜູ້ເຮັດພາລະບົດບາດນຳພາປະຊາຊົນສ້າງສາ ແລະ ຕໍ່ສູ້ກັບສັດຕູ. ມີບາງໄລຍະເສົ້າໂສກໝອງໝົ່ນຍ້ອນການປົກຄອງທີ່ອອ່ນແອແຕກຄວາມສາມັກຄີ ຂອງກະສັດລາວບາງອົງ. ຈຶ່ງເປັນສາເຫດທີ່ສຳຄັນເຮັດໃຫ້ພວກສັກດີນາ ແລະ ພວກລ່າເມືອງຂຶ້ນຕ່າງດ້າວສວຍໂອກາດເຂົ້າມາຮຸກຮານ ແລະ ຄອບຄອງເອົາປະເທດລາວເປັນຫົວເມືອງຂຶ້ນຍາວນານຮ້ອຍກ່ວາປີ. ແຕ່ເຖິງຢ່າງໃດກໍ່ຕາມປະຊາຊົນລາວທີ່ຢູ່ພາຍໃຕ້ແອກປົກຄອງ ແລະ ການກົດຂີ່ຂູດຮີດຂອງອີດທິກຳລັງຕ່າງຊາດທີ່ແສນທໍລະມານນັ້ນ, ໄດ້ພ້ອມກັນເສີມຂະຫຍາຍມູນເຊື້ອພິລະອາດຫານ ຕໍ່ສູ້ຢ່າງທໍລະຫົດອົດທົນທີ່ບໍ່ຍອມຈຳນົນ ຂອງບັນພະບູລຸດ ໂດຍສະເພາະຕົວຢ່າງທີ່ໂດດເດັ່ນແມ່ນການນຳພາລຸກຮື້ຂຶ້ນຕໍ່ສູ້ຂອງເຈົ້າອານຸວົງ ເພື່ອກອບກູ້ເອົາເອກະລາດຈາກພວກສັກດີນາສະຫຍາມຈົນກາຍເປັນມູນເຊື້ອ ແລະ ວິລະກຳແຫ່ງຄວາມພິລະອາດຫານໃນການຕໍ່ສູ້ ເພື່ອຄວາມເປັນເອກະລາດ ແລະ ອຳນາດອະທິປະໄຕຂອງຊາດ ມາຈົນເຖິງຂະບວນການຕໍ່ສູ້ຂອງພໍ່ກະດວດ, ອົງແກ້ວ, ອົງກົມມະດຳ, ເຈົ້າຟ້າປັດໃຈ ເພື່ອຕ້ານພວກລ່າເມືອງຂຶ້ນແບບເກົ່າ.